Acts 16

1Kuwo Paulo okoy kupunto Terpe oko Listira. Kimite wuloto citake nye kikoyen nye cekure Timosewo weritap korko nye Cepyutaya nye kikoyen mpene, ntene ki Kirikin kwan. 2Yoto kuŋalale mpo yeya piko co kikoyen tokol ce kimite Listira oko Ikoniyom Timosewo. 3Kumac Paulo kule cepetekey Timosewo, Yoto kuwon Paulo Timosewo, omnye kinkete Yutayek tokol ce kimite wuloto kule Kirikin kwan. 4Nteye kimite cek kupeti kupunte moŋosyek, kumwoci piko co kikoyen kuporci ntarastinek co kicömncin kutilta kiyokik oko poyik om Yerusalem, oŋnkumwoci kuywey oŋnkurip ntarastinek coto. 5Yoto kutosyikey pikap Yiyintet kukwilokis om koyenet oŋnkutosyinikey kucoŋitu piko ce keyen pesyosyek tokol. 6Kupa cek kupunte koretap Prukiya oko Kalatiya. Kipuryo kot kucömnci Muyet Nyetilil cekto kumwayte lokoywek koretap Asia. 7Ntowo kupunto cek kurikta kiyotyetap Musia kusyem kule cipe okoy cepunte koretap Pisiniya, ntene kipuryo kot kucömncini Muyet Nyetilil nyepo Yesu. 8Yoto kunomen kupa kupunte Musia oŋnkurekto okoy Troa. 9Kukäs Paulo kwomowunoto ŋoŋutyet nye kikäs citap Maketoniya kukeyo kusome neto kumwoci kule, “Co, yowu okoy Maketoniya ce kalyec acek!’’ 10Yoto pakenke yu kowo kukäs Paulo ŋoŋutyonoto, ceyiytekey acek kule cenomen cipe Maketoniya omnye kacinket kule kokurec Yiyintet wocemwoci pikap wuloto lokoywek ce toponec. 11Cenomene acek Troa celany rapet kyay ceculakisye okoy cepunte Samosrake, ntowo kuyekune cepunte Neapoli. 12Ceŋete wuloto cipe okoy cepunte Filipi nye moŋet nyewo nyepo tayta om koretap Maketoniya nye kiminye Romek. Cepeni ciwany pesyos cemite moŋonoto. 13Nteye kipesyetap Sapat, cipe moŋet saŋ okoy yepo oyinet tapan wule kicisotyini kule toskoy mite otepto nye cesome. Cipur ŋony yoto oŋnkyeŋololyi koruk ce kikikorurukyikey yoto. 14Akenke om korucoto nye kilime ŋalekyacek ku korko nye cekure Litiya nyepo moŋetap Siatira nye kyolyoy sirok ce mur kworornec, nye kisoye neto Yiyintet okokoy. Kuŋany Mokoryontet mukuleynyi kulimnta topon ŋalek ce kimwowu Paulo. 15Yoto cepatisan neto oko pikap konyi tokol. Ntowo kupok kumwowec acek kule, “Akwa cipe wocipurune komwani ye kacämnte akwek kule koyentyi ani Mokoryontet kupoyit manta.’’ Kusaysayec acek okoy cipe. 16Nto mite pesyet ake ye kicemite acek cepeti otepto cesome, yoto kutuyenec mutworinto nye tye nye kiponto oyinot, nye kiŋorsyoti nye kisutyini mokorenikyi pesanik ce caŋ om ŋorsyet. 17Kunamec acek oko Paulo cepoto oŋnkupolon kumwowu kule, “Picu kuce mutworikap Yiyintet nye mite torot koromun ce mwowok akwek aret wule mocisoptok.’’ 18Kikwiye cepoto kuyunyitenyi kuwany pesyos ce caŋ, okoy kunyer Paulo koromun, kuwekyikey oŋnkumwoci oyinot kule, “Komwowuŋ om swametap kaynetap Yesu Kristo kule, ŋet wete neto!’’ Yoto pakenke kuŋet oyinotonoto kuwete cepoto. 19Ntowo kukäs mokorenikyi kule kopot aret wule kunyortoy cekto pesanikwa ce kwenekey, kunäm Paulo oko Sila oŋnkukwer kupa matepo wule mite poytoyik. 20Nteyu kowo kukwer cek okoy taytap ketik; kuŋalal kumwoy kule, “Yutayek picu, ce kosut tankwarat moŋenyacek. 21Nete cek piko kapurto nye yirye ntarastinekyacek. Ciku acek Romek, kunyo puryo kot cimuci kot cenäm nto cerup kopurto nyeyunyo!’’ 22Yoto kuŋetyi pikap kokwet tokol kuporye cekto; kupac ketik sirokap Paulo oko cepo Sila, oŋnkumwayta cepas korokonik. 23Nto om letut yu kowo cepas korokonik ce caŋ, cekerta mopusi oŋnkyemwoci sikorintet nye ripe, kurip topon mente kucilil kumwey. 24Nteyu kowo cemwoci sikorintet ŋalecato, kukerta nye cekto mopusit nyepo orit oŋnkurate kerenkokwa nyororonik kuratita kereywek ce nyikisec. 25Ntowo kupunto komoy kwen ye kimite Paulo oko Sila kusome oŋnkutume kukostoy Yiyintet, kumite yoto mopusinek alake cut kulimntoy. 26Yoto pakenke kuriŋriŋ koret koromun kutimtim koto tokol, kuyotokis pakenke kurkotik tokol cepo mopusit, oŋnkutyokokis nyororonik ce kacerate mopusinek tokol. 27Nteye kotoköse sikorintet nye ripe mopusit, ntopere akäs kayotokis kurkotikap mopusit tokol, yoto kusot kule toskoy komwey mopusinek tokol, kucut rotwenyi, nteye kimite kumöce kule aparkey nkit. 28Yoto kupol Paulo om kutit nyewo kumwoy kule“Mente awurtekey! Cemite acek tokol yu!’’ 29Kukurto sikorintet cesut tarit oŋnkulapat kuwo orit wokoputyi yepo kerenkokap Paulo oko Sila kupotone om Muyotet. 30Yoto kukwer neto cekto kukwa saŋ oŋnkutepe kule, “Merekyo, mosayiy ne ani ye sosop?’’ 31Kumwoci kule, “Yen cömisye oŋnkikasekey Mokoryontet Yesu mosicisopiŋ nyi wanak oko pikap kaŋuŋ.’’ 32Kumwoci cek neto ŋolyontetap Mokoryontet oko piko alak cepo kanyi. 33Kukwer sikorintonoto cekto pesyonoto komoy oŋnkuwokusityi mwoyokwa. Yoto pakenke cepatisan sikorintonoto wanak oko pikap kanyi tokol. 34Kukwer neto Paulo oko Sila kupa konyi torot oŋnkukoci omik kwam. Kuŋerec neto oko pikap kanyi koromun omnye kokuyen yoto cekto Yiyintet. 35Ntowo kuyec koret, kuyokto ketik sikarekwa cewoyec kupa wule mite sikorintet nyo ripsi wokumwoci kule, “Tyakte pico kupecikey.’’ 36Yoto kumwoci sikorintet nye kiripsi Paulo kule, “Kokuyok ketik ŋolyontet kumwoy kule cityaktak akwek. Kunyo roke apecikey poninekwok möt topon om kalya.’’ 37Ntene kumwoci Paulo sikarek kule, “Kumwayta cek cepasec acek om konyekap piko tokol nye puryo kot kuwosontyec kot kunyortec lelis oŋnkurok ciku acek Romek, oŋnkukertec mopusi! Kunyi möce cekto yawut kule cityaktec acek om sisyot nye moköse ci? Puryo kot kuyunyo! Misyini kukwa cek nkit oŋnkwokutyaktec acek.’’ 38Yoto kupa sikarek cewoyec wokumwoci ketik ŋalecato, nteye kotolime ketik kule koko Romek Paulo oko Sila, yoto kumuyo. 39Kupa ketik okoy wule mite mpo Paulo oŋnkwokurenykey, oŋnkukwererune mopusi oŋnkusom kumwoci kule apecikey aŋete moŋet. 40Kunomen Paulo oko Sila kupete mopusi oŋnkupa okoy kotap Litiya, ntowo kupunto wuloto wokunyor mpo yeya co kikoyen, kumwoci ŋalek ce kwile oŋnkunomen kupecikey.

will be added

X\