Acts 15

1Yoto kukwane piko alake Yuteya okoy kupun Antiyok oŋnkwokucec kunet mpo yeya piko co kikoyen kumwoci kule, “Ye puryo kot cewonak akwek kuyu wule mwoytoy ntarastinekap Moses kupuryo kot omuci kot osopce.’’ 2Kutintentyin Paulo oko Parnapa tintenot nyewo koromun oko picoto okoy kupcikey ŋalekwa om ŋalek ce nöme ŋalecato. Yoto kurwoc cek okoy kucömncin kule misyini Paulo oko Parnapa oko piko alak cepo Antiyok kupa Yerusalem wokukäs kiyokik oko poyik om ŋalek ce nöme ŋalecu. 3Yoto kuyokto pikap Yiyintet cek kupa, kunomen kupunte Foyinisiya oko Samariya oŋnkumwaytat om wuloto wule kuwektakey lamek kuwekyikey wule mite Yiyintet. Kukoci lokoywecoto ŋerekwek ce caŋ mpo yeya piko co kikoyen. 4Ntowo kupunto cekto Yerusalem kuŋerekyi pikap Yiyintet oko kiyokik oko poyik. Yoto kumwoci cek cut ŋalek tokol ce kukukalya Yiyintet cekto kwiy. 5Ntene kuyoŋ piko alake co kikoyen cepo luketap Farasayek oŋnkumwoy kule, “Roke cewon cekto oŋnkyemwoci kurip ntarastinekap Moses.’’ 6Yoto koruruckey wanak kiyokik oko poyik kurwoke ŋolyontonoto. 7Nto om letut yu kowo kurwoc cek kuloyit, kuŋet Petero kuyo oŋnkumwoy kule, “Mpo yeyamwani, oŋnket akwek kule om pesyosyek co kutil kikweya ani Yiyintet om wule omite akwek kule saŋet omwoci lokoywek ce toponec lamek, sukuŋet cek kulim oŋnkuyen. 8Yiyintet kunye nkete mukuleywekap piko kunye kwepor cömisyet om wule mite lamek kukoci Muyet Nyetilil kuyu wulo kikonec acek. 9Kunyo puryo kot kupciyec Yiyintet Yutayek oko lamek. Ntene kukukalya miyotyonik ce mite mukuleywekwa omnye kweyen. 10Kunyo yawut omne sasyem akwek Yiyintet kule cetorci terekok piko co kukuyen, torokocato kuco kipuryo kot komuc mpo kukonyo kot kutor oŋnkupuryo kot cimuc mpo acek nkit kot cetor? 11Puryo kot kuyunyo! Ciyeni acek kule mocisopec om poypoyetap Mokoryontet Yesu kuyu wulo mocisopto cekto.’’ 12Kusisio piko tokol ye kimite Parnapa oko Paulo kuroru ŋalek cepo kakitat oko pelutok ce kikwiy Yiyintet kupunte wule mite cekto om wule mite lamek. 13Nteyu kowo kuŋalal okoy kuwany. Kuŋalal Yakopo kumwoy kule, “Mpo yeya, olimwo ani pa! 14Kotokuŋolole kuroru pantanyi Simon wule kiporunto kunyo Yiyintet cömisyenyi om wule mite Lamek, omnye kikwey om wule mite cek piko ce kokwek pikyi. 15Nömntos topon ŋalecu oko ŋalekap workoyik, kuyu wulo mwowu silutekap Yiyintet kule, 16‘Om letutap ŋalecu mosoketukey ani, mwowu Mokoryontet yunyoto, mosatec kotap Tauti nyo kilul; mosatec yec wule kiturpup, oŋnkoyoŋnte yec kuyo. 17Sukuŋet piko alake tokol kuceny Mokoryontet, mpo Lamek tokol ce kyokur ani nkit kwek pikwani, 18Yunyoto wule mwoytoy Mokoryontet, nye kipor ŋalecutecu ikye po keny.’ ’’ 19Kutosyikey Yakopo kumwoy kule, “Om kasoteywekwani, asoti kule puryo kot kurokenec acek citaŋany Lamek co wekyinikey wule mite Yiyintet. 20Ye koto yunyo, roke cesilyi acek parwet, cemwoci kule puryo kot kuroke tokwam cekto omit alak tokol ce puryo kot kutililec ce kocesoci kupoyit kerkeyik, oŋnkuripkey kusanekey sakwayanat, oŋnkutay mokwam tyoŋik co cikete nto korotik. 21Omnye kicesumane ntarastinekap Moses korikapkok okokoy ye pesyosyekap Sapat, oŋnkyemwayte ŋalekyi moŋosyek tokol.’’ 22Yoto kucäm kiyokik oko poyik wanak oko pikap Yiyintet tokol, kukwey piko alak om kwenumwa oŋnkuyokto kupa Antiyok kupetakey Paulo oko Parnapa. Kukwey cekto Yuta nye cekure kaynet ake Parnapa oko Sila, picoto oyeny kuce kiyweye mpo yeya cekto. 23Oŋnkukoci wokukoyto parwani sumone kule. “Acek mpo yeyamwoŋ kiyokik oko poyik. Kacisupayak akwek mpo yeya cepo lamek ce minye Antiyok, oko Siriya, oko Silisiya. 24Kucelim acek kule kikwa piko alake wule omite akwek cekwone wuli cemite acek, oŋnkwokuntankwarak kowurta kasoteywekwok om ŋalek ce kikwokumwowok. Kipuryo kot cikoci acek picoto kamukeywek mpo kisic ce kimuce kwiy ŋalek co kikwiy. 25Kunyo kucetuye acek wanak om kirwoket oŋnkyirwoc okoy ce comncine kule ciyoku piko kukwa wulo omite akwek, kwontokey picoto oko mpo yeya cämanik Parnapa oko Paulo, 26ce kikokoyito soponnwekwa om yisyetap Mokoryontet Yesu Kristo. 27Kunyo kociyoku Yuta oko Sila, ce mosukwokumwowok cek nkit om kutuwakwa ŋalek cekerkey oko cu kocesil acek parwani. 28Omnye kweporkey topon om swametap Muyet Nyetilil oko om wule cemite acek kule, puryo kot kurok cekonok acek akwek nyikisin ake tokol, ntene tos pate ntarastinecu ce roke orip akwek. 29Monte tokyam omit ce kocesoci kerkeyik, monte tokyam korotik, monte tökyam tyony nye kaciket, oripkey asanekey sakwayanat. Mosopur akwek topon ye koripkey om wule mite ŋalecutecu tokol. Cämetapkey.’’ 30Yoto kuyomis cekto piko co kiciyoktoy kunomen kupa Antiyok. Ntowo kupunto Antiyok, koruruc piko tokol co kikoyen oŋnkukoci parwet. 31Nteyu kowo kusuman piko parwet okoy kuwany, kunyor ŋerekwek ce caŋ om lokoywek ce kimite parwet. 32Kuŋololyi Yuta oko Sila ce ki workoy, kumwoci ŋalek ce caŋ mpo yeya piko co kikoyen kule rokekey kopurto cek swamet oŋnkukwilokis. 33Nteyu kowo kupeni cekto wuloto kuwany pesyos ce ŋeri, kuyomis mpo yeyamwa cek kusomnci kupeyok. Yoto kuketitakey cek kupa wule mite piko co kiyoku. 34[Ntene kucäm Sila kule opur wuloto.] 35Kopur Paulo oko Parnapa Antiyok kupontokey oko piko alak ce caŋ. Kunetis oŋnkumwayta ŋolyontetap Mokoryontet. 36Nto om letutap orok ce ŋeri, kumwoci Paulo Parnapa kule, “Kany cipe yec cerutoci mpo yeya cemite moŋosyek tokol co kikicemwaytate ŋolyontetap Mokoryontet sukuŋet cekäs kule mite cekto kutosyinikey kulene om koyenet.’’ 37Kimöce yoto Parnapa kule cepetekey tokol oko Marko. 38Ntene kusot Paulo kule puryo kurok kupatakey. Omnye kitoyis Marko mapetakey cekto okoy kuwany yisyet. Ntene kiweckey kuketitakey kupokokyi cek Pampiliya. 39Yoto kutintentyin tukway okoy kupcikey. Kuwetokey Parnapa Marko kulany rapet nye kiweti Kupro. 40Kukwey Paulo Sila oŋnkunomen kupa, kuyomis mpo yeya cek oŋnkusomnci kupeta poypoyetap Yiyintet. 41Kuwo Paulo kupunte Siriya oko Silisiya kuŋololyinoti kukwil pikap Yiyintet ce kimite wuloto.

will be added

X\