Acts 13

1Om pikap Yiyintet ce kimite Antiyok, kuce kimite workoyik oko konetik coto ku mpo Parnapa oko Simiyon (nye cekure matuy) Lukio nyepo Kurene, oko Manaen nye kicepoye oko kinko Erote oko Saulo. 2Nteye kimite cekto kwicini Mokoryontet yisyet oŋnkukire omik, kumwoci Muyet Nyetili cekto kule, “Okwewo Parnapa oko Saulo sukuŋet kwiy yisyet nye kyokweci ani.’’ 3Kukir cekto omik oŋnkusomnci kukemer yewuniyekwa metewokap Parnapa oko Saulo oŋnkuyokto kupa. 4Nteyu kowo kuyokto muyet Nyetilil Saulo oko Parnapa, kunomen cekto okoy kapunto Seleukiya, kulany om yoto rapet oŋnkupa okoy kapunto Kupro. 5Ntowo kupunto cek Salami, kumwayta ŋolyontetap Yiyintet om korikapkok cepo Yutayek. Kipontotikey yoto Yowana Marko nye kikolyoy cekto yisyet. 6Kupa kupunte koret nyoto kikwen peko okoy kupunto Papo wule kipa kunyorta cepsokeyontet nye weritap Yoswa, yutoyintet nye kisutekey kule iyiku workoyo. 7Kipontokey cicoto oko Serkio Paulo nye ki cito nye ŋom nye ki poytoyintetap koronoto kikwen peko. Kukur poytoyintonoto Parnapa oko Saulo kukwa wule mite neto, omnye kimöce kule alim ŋolyontetap Yiyintet. 8Yoto kuŋet Elima cepsokeyontet, (nye kaynenyi nyitenyi wule cekurtoy om ŋelyeptap Kirikik.) Kusyeme kule amas poytoyintet mente kot kuyen. 9Yoto kunyor Saulo nye cekure Paulo swametap Muyet Nyetilil, kurotot koromun cepsokeyontonoto, 10oŋnkumwoci kule, “Nyi, weritap Setani nyewo nyepo oyik! Yiku nyi puniyontetap ŋalek tokol ce toponec, ponto nyi koperperisyet oko ŋolset tokol, kunyo syeme pesyosyek tokol kule amas kwek mwiynan ŋalek cepo Mokoryontet! 11Kunyo mosukupiriŋ yewutap Mokoryontet, mesokor nye meköse asis kuwany pesyos.’’ Yoto pakenke kukerokis kunäm cemereresyet nye tuy konyekap Elima, kutaptapat yoto wulo tokol kule nto sonyoru ci nye kanäm yewut oŋnkuretoto. 12Kuyen kucömis poytoyintet yu kowo kukäs ŋalek ce kokwiyokis. Kukite neto koromun konetisyet nyepo ŋalekap Mokoryontet. 13Kunomen Paulo oko piko ce kipontokey kulany rapet om Papo oŋnkupa okoy kupunto Peruka om koretap Pampiliya. Yoto kupokokyi Yowana Marko cekto wuloto oŋnkuweckey kuwo Yerusalem. 14Kunomene cekto Peruka kupa okoy kupunto Antiyok nyepo Pisitiya. Nteye kipesyetap Sapat kupa cekto wokowut kotapkok oŋnkopur ŋony. 15Nto om letut yu kowo ciwany cesuman ntarastinekap Moses oko silutekap workoyik, kumwoci kantoyik cepo kotapkok cek kule, “Mpo yeya, ye oponte akwek lokoywek ce muce kukalya kotitir piko, cesomok acek akwek kule aŋalal.’’ 16Kuŋet Paulo kuyo oŋnkuwuse cekto yewuniyekyi, oŋnkucec kuŋalal kumwoy kule: “Merekyo pikap Israel, oko akwek lamek co soye Yiyintet olimwo ani pa. 17Yiyintetap picutecu po Israel kunye kikwey mpo kukonyacek oŋnkukoci kwek pic cewoyec om kenyisyek ce ye kimite kuminye koretap Misiri ku toyek. Kukwerune Yiyintet cekto swamenyi nyewo kukwane Misiri. 18Kumuytoci Yiyintet kopurto nye kiponto cekto kuwany kenyisyek artam ye kiminye koretap kitela. 19Yoto kukoci Yiyintet cek kwaranta lamek cepo yemosyek tisap ce kiminye koretap Kanan, oŋnkukoci pikyi kumiŋis kwek pikap koronoto. 20Kumiŋis kuwany kenyisyek ce rice pokolwokik amwan ok konom. Nto om letut kukoci Yiyintet cek ketik okoy kenyisyek ce kipo workoyontet Samuel. 21Ntowo kusom kule ce möce Kinko, kukoci Yiyintet cekto Saulo weritap Kisyi nye kipo aretap Penyamin kwek Kinko nyimwa. Kupoytoyis nyo kuwany kenyisyek artam. 22Nto om letut yu kowo kunate Yiyintet Saulo, kukoci Tauti kwek Kinko nyimwa. Ŋalek ce kimwoy Yiyintet kutor ce nöme ŋalecutecu kucu kule, ‘Kwakäs ani kule, Tauti weritap Yese kunye cito nye ocöme, nye mosukwiy ŋalek tokol ce ocöme ani kule kwiy.’ 23Yesu nye akenke om mucokoronikap Tauti kunye kikoci Yiyintet kwek kosopintetap pikap Israel kuyu wulo kikikurtoci keny. 24Kutompo kot kuco Yesu, kimwoci Yowana pikap Israel tokol kule misyini kwasta cekto miyotyonikwa oŋnkyepatisan. 25Nteyu kowo kurik kuwany Yowana yisyenyi; kumwoci piko kule, ‘Asoti akwek kule oyiku ani ŋo? Puryo kot oyiku cito nyo okeni akwek. Ntene akäs! Mite cicoto kuconi om letumwani, nye puryo koto yiku ani topon nye ayeme kot atyac porokap kweyonikyi.’ 26“Mpo yeya, kesenisyekap Apram oko akwek lamek cu mite yu ce soye Yiyintet, acek pikap Israel ce kiciyokoci lokoywek cutecu po kosopotet! 27Omnye kipuryo kot kunket piko ce kiminye Yerusalem oko poytoyikwa kule Yesu kunye kosopintet; nto kipuryo kot kusot cek kusow oŋnkunket ŋalekap workoyik co cesumone pesyosyek tokol ye pesyetap Sapat. Ntene kuyitita kupoyit manta ŋalekap workoyik omnye kiwosontyi cek Yesu. 28Nka kot kipuryo kot kunyor lelis nye kiwosontyine neto kume, ntene kusom cek Pilato kule kupakäc Yesu. 29Nteyu kowo kuwany kwici Yesu ŋalek tokol ce mwowu silutekap Yiyintet ce nöme neto, kunumune murtowontet oŋnkutupci mwenet. 30Ntene kuŋet Yiyintet kotutune met. 31Yoto kuwany pesyosyek ce caŋ kuköse piko co kipontotikey neto kuceke Kalilaya okoy Yerusalem. 32Cekto picoto yawut ce muncururwanikyi om wule mite pikap Israel, 33Kunyo cemite acek yu cemwowok akwek lokoywek ce toponec kule, kokoyitita Yiyintet om wule mite lekokyi kirotyet nyo kikikurtoci mpo kukonyo, omnye kiŋet Yesu kotutune met kuyu wulo kicesilyo om kitaputap tumwonikap kakastayet nyepo oyeny kule. ‘Yiku nyi werimwani koyiku ani pesyoni Papaŋuŋ.’ 34Nto ŋalek cepo manta kule kiŋet Yiyintet neto kotutune met nye puryo kot komuce yec kot kunun, kucu kumwoy kule: ‘Mosokoniŋ ani nyi tililinto oko kupeyok cepo manta ce kerkey oko co kyokocini Tauti.’ 35Kunyo mwowu yec kupoyit manta om silutek alak kule, ‘Puryo kot muci nyi kot cömnci mutworinteŋuŋ nye tilil kunum.’ 36Omnye kikwiy Tauti ye kisope yisyonutek ce kimöce Yiyintet okoy kume cetupci tapanta yo kicetupci mpo kukonyo, kunyo kinun neto. 37Ntene puryo kot kunun neto nyo kiŋet Yiyintet kotutune met. 38Kunyo möce oŋnket akwek mpo yeya tokol ŋalek cepo manta kule, kupunune wule mite Yesu, kunyi cemwowok akwek yawut lokoywek ce cerenyekey miyotyonik. 39Möce oŋnket kule ci tokol nye yentyini neto kunyoto nye cinumune miyotyonik tokol co puryo kot komuce kunum ntarastinekap Moses. 40Kunyo oripkey, mente kot kukwontyok akwek co kimwowu workoyik kule: 41‘Akäs akwek nyilotik! Mosokite oŋnkopoku: Omnye yisyet nye oyiye ani om pesyemwoŋ nkit kunye kiy nye puryo kot omuci akwek kot oyen, nka kot kororwok kumwowok akwek cito ake.’ ’’ 42Nteye kimite Paulo oko Parnapa kumiŋntoy om kotapkok, kumwoci piko acek kule, oŋnkokwa om Sapatit nyo coni kwororwec yec topon ŋalecutecu. 43Nto om letut yu kowo kupete piko tuyet nyepo kotapkok, yoto kurup Yutayek ce caŋ oko lamek ce caŋ co kicäm tinitap Yutayek Paulo oko Parnapa. Koŋololyi kiyokik picoto kotitir kumwoci kule kutosyikey kopurto swamet nyepo poypoyetap Yiyintet. 44Nto om pesyetap Sapatit nye kirupe, kukwa koruruckey piko ce kirikta coŋinto cepo moŋet tokol kwokulimnta ŋolyontetap Yiyintet. 45Nteye kotoköse Yutayek luketap piko, kucorok oŋnkuŋalale ŋalek ce miyotec om ŋalek ce kimwowu Paulo oŋnkucup cek neto. 46Ntene kutosyikey Paulo oko Parnapa om nyikanatet kumwoy kule, “Akwek kuce piko ce kumisyini cenyosye cemwoci ŋolyontetap Yiyintet. Ntene omnye katay akwek oŋnkasot kule puryo kot kuponto latik cenyoru soponto nyemo poku, kunyo mocepakaktak acek oŋnkyipe wule mite lamek. 47Omnye kikonec acek Mokoryontet ntarastini kunkolonwec kule: ‘Kwakweyiŋ ani nyi yiku lakweyetap lamek, sukuŋet sut kosopet kupunto wule kiŋete koret kumukul.’ ’’ 48Nteye kotolime lamek ŋalecato, kuŋerec cek koromun oŋnkukasta lokoywekap Mokoryontet. Kuyen mpecek piko co kikwey Yiyintet kule mosukunyor soponto nyemo poku. 49Kutosyikey ŋolyontetap Mokoryontet om wulyo tokol om koronoto. 50Ntene kowurur Yutayek kowurta piko ce kantoyik cepo moŋet oko korukap lamek ce tokunotin ce soye Yiyintet, oŋnkucec kutaŋany Paulo oko Parnapa oŋnkukwet kupete koremwa. 51Yoto kulelekyi kiyokik tertitap kerenkokwa picoto oŋnkunomen kupa okoy Ikoniyom. 52Kunyor konomik om Antiyok ŋerekwek ce caŋ oŋnkunyor Muyet Nyetilil.

will be added

X\