Acts 12

1Kucec om pesyosyecoto Kinko Erote kutaŋany pikap Yiyintet alak. 2Yoto kunäm Yakopo mutakwametitap Yowana oŋnkumwayta cepare rotwetap cok kume. 3Ntowo kukäs kule koŋerekyi Yutayek ŋalecato, kitosyikey kunäm mpo Petero. Kikwiyokis ŋalecato om pesyosyekap sakwetap mukatyantet nye mokutunat. 4Ntowo cenäm Petero cerotyi mopusi, oŋnkyikoci kurip sikarek co ripsi ce kipetote amwan. Kimöce yoto Erote kule sokweru Petero kuco kokwetap Yutayek ye kapok sakwetap keytayet. 5Yoto ceripune Petero mopusi. Ntene kusomncini pikap Yiyintet neto koromun. 6Nto om kwomowut nye kimöce Erote kule sokweru Petero ye koyekune kuco wule mite piko. Kimite yoto Petero kukoru kwenutap sikarek oyeny ce ripsi mopusi, Kicerate neto nyororonik oyeny, oŋnkumite sikarek ce ripsi kurketap mopusit. 7Yoto kuco lakwar malayketap Mokoryontet, kukweny lakweyet mopusit orit. Kulucluc malayket Petero leyet kuŋet kukos, oŋnkumwoci kule, “Ŋet lakwar.’’ Yoto pakenke kutyokokis nyororonik kusuyito om yewuniyekyi. 8Kumwoci malayket neto kule, “Ratkey, oŋnkilac kweyonikuk.’’ Kwiy neto kuyunyoto, oŋnkumwoci kule, “Yisinekey sireŋuŋ oŋnkirupani.’’ 9Kurup Petero neto okoy kupunto saŋ nye kipuryo kot kunkete om yoto kule po manta ŋalek ce kikwiye malayket, kisote kule toskoy oköse ŋoŋutyet. 10Kupunte cekto kurkotik ce ripe sikarek, nyepo tay, oko nyepo oyeny, sicepa moŋet orit, yoto kuyatakay kurket nkit, kupa cek saŋ, kupa tukway kurup aret, nto om yoto pakenke kupakakta malayket Petero. 11Yoto kusow Petero kunket kito nye kakwiyakay om wule mite neto, kumwoy kule, “Konket ani yawut kupoyit manta! Kule kokuyok Mokoryontet malaykenyi, kunyo kosoruneno ani kamukeywekap Erote oko tukuk tokol ce kumöce Yutayek kule ce yiy.’’ 12Nteyu kowo kusow Petero topon, kunomen kuwo okoy kotap Mariyam kametitap Yowana Marko wule kimite piko ce caŋ ce kokorurukyikey wuloto ce kimite kusome Yiyintet kusomncini Petero. 13Kukonynkony Petero kurket nyepo saŋ yoto kuco cepto nye mutworin nye cekure Rota co kukäs. 14Kunket cepoto kutitap Petero, kuŋerec koromun kulapat kuketitakey kuwo nye puryo kot kuyat kurket, wokumwayta kule, mite Petero kuyoŋe kurkat saŋ. Kumwoci piko neto kule, 15“Kopunuŋ met!’’ Ntene kutinten koromun kumwoy kule, “Mite manta!’’ Kuwec cut kumwoy kule, “Malaykenyi nyo.’’ 16Kutosyikey Petero kukonykony kurket. Nto om letut kuyat cekto kurket. Nteye kotoköse cekto Petero kukite koromun. 17Kuŋololyi Petero cek kuwuse yewuniyekyi kusisio, oŋnkumwoci kurorci wule ketyakta Mokoryontet neto kukwerune mopusi. Oŋnkumwoci Petero cek kule, “Womwoci ŋatecutecu Yakopo oko mpo yeya alak.’’ Oŋnkunomen kuwecikey wulyo ake. 18Ntowo kuyec koret, yoto kupotpotenis koromun sikarek ce kiripsi kumwoy kule kukwam ne Petero? 19Yoto kumwayta Erote kule ceceny Petero, ntene kipuryo kot komuc cekto kot kunyor. Yoto kukir Erote sikarek ce kiripsi koromun, oŋnkumwayta cepar kupok. Nto om letutap ŋalecato, kunomen Erote kuwete Yuteya kuwo Kaysariya wokopurune wuloto. 20Kikiwokut koromun Erote oko pikap Tiro oko cepo Siton. Yoto koruruckey picoto kwek luket akenke oŋnkupa wule mite neto. Kunyosyo cekto kiny kunyo kunäm kwek corwemwa Plasto cito nyewo nye kiripe kaytap Kinko, oŋnkupa wule mite Erote wokusom kalyet, omnye kipoyekey koremwa omik ce kikwone koretap Kinko. 21Nteye kipesyet nye kweyat, kulac Erote sirokyi cepo poytoyisyet oŋnkopure ŋeceretap kokwet oŋnkuŋololyi piko. 22Yoto kupol piko kumwoy kule, “Kutitap Yiyintet nyito, ntene puryo kot kupo ci!’’ 23Om yoto pakenke kupir malayketap Mokoryontet Erote kumnyan, omnye mneywey Yiyintet. Kwam neto mokik okoy kume. 24Kutosyikey ŋolyontetap Yiyintet kuseret kupunte koret tokol. 25Ntowo kuwany Parnapa oko Saulo yisyonutekwa cepo ŋalek ce kikwontyi om Yerusalem, kuweckey cekto oŋnkupetakey Yowana Marko.

will be added

X\