Acts 11

1Yoto kulim kiyokik oko piko co kikoyen ce kimite Yuteya tokol kule kucäm lamek ŋolyontetap Yiyintet. 2Ntowo kulaŋnta Petero kowo okoy Yerusalem, kuwokutye luketap piko co wonotin neto. 3Kumwoci cek neto kule, “Omne siwo nyi oŋnkiweyomekey oko piko ce puryo kot ce won oŋnkiyomisye wanak oko cekto?’’ 4Yoto kumwoci Petero kirorci cek ŋalek tokol ce kukwiyokis kuceke wule kicekta okoy kupok. Kumwoy kule, 5“Kyomite ani osome om moŋetap Yopa, yoto akäs ŋoŋutyet akäs kitake nye kireku kuconi ŋony nye kerkey sira nyewo nye kicereku kucone torot om kototokyi. Kurek kiyoto okoy kupun ye kyomite. 6Arotote ani topon orit oŋnkasot, okoy akäs tyoŋik cepo kerenkok amwan, oko tyoŋikap samiyita oko tyoŋik co cutekey ŋony, oko toritek. 7Yoto alim ani Yiyintet kukuro kumwowo kule, ‘Petero, ŋet näm pakäc tyoŋicu oŋnkiyeny yam!’ 8Ntene omwowu ani kule, ‘Mokoryontet, puryo kot kuyunyo! Omnye tompo kot kowut kutimwani mpo kisic kiy nye puryo kot kutilil nto nye miyat.’ 9Yoto kuŋololwo Yiyintet aret nyepo oyeny kumwoy kule, ‘Mente kot akur kiy nye kikotilil Yiyintet kule puryo kot kutilil.’ 10Kwiyokis ŋalecato kuyunyoto aret somok. Nto om letut cesut kiyoto kuketitakey kuwo torot. 11Yoto pakenke kupun piko alake somoku ce kiciyoku kukwane Kaysariya okoy koto nye kyomite ani. 12Kumwowo Muyet Nyetilil kule wetekey picoto mente kot atay. Owetekey ani tokol oko mpo yeya cutecu lö okoy cepunte kotap Korneliyo om Kaysariya. 13Yoto kumwowec acek Korneliyo kule kiporcikey malayket neto nye kico oŋnkuyoŋe konyi oŋnkumwoci kule, ‘Yokte piko kupa Yopa wokukur citake nye cekure kaynenyi Simon Petero. 14Nye mosukucokumwowuŋ nyi ŋalek ce mosukusoruŋ kusopiŋ oko pikap kaŋuŋ!’ 15Ntowo acec ani omwoci cekto ŋalek, yoto kukoci Yiyintet cek Muyet Nyetilil kuyu wulo kikonec acek om kunyo. 16Yoto asot ŋalek co kimwowu Mokoryontet kule, ‘Kipatisane Yowana peko, ntene mosicepatisanenak akwek Muyet Nyetilil.’ 17Porukey kupoyit manta kule kikoci Yiyintet cek lamek coto kokotutyet nye kerkey nyo kikonec acek yo kiciyeni Mokoryontet Yesu Kristo. Kunyo ani ku ŋo nye kyomuci kot akerkte Yiyintet!’’ 18Ntowo kulim cekto ŋalecato kusisio nye komokuwokutye Petero, oŋnkukasta Yiyintet kumwoy kule, “Kunyo kukukoci nyun Yiyintet mpecek Lamek poroyinto kurenynkey oŋnkusopco!’’ 19Kuseret piko co kikoyen om toŋoŋutek ce kikwiyokis yo kicepoköce Stefano kume. Yoto kupa alake om cekto okoy kupunto Foyinisiya oko Kupro oko Antiyok kumwocinoti Yutayek nkit pate lokoywek cepo Mokoryontet Yesu. 20Nto om picoto ku piko alake co kikoyen ce kipo koretap Kupro oko Kurene. Kunomen picoto okoy kupunto Antiyok, oŋnkumwoci lamek lokoywek ce toponec cepo Mokoryontet Yesu. 21Kiponto picoto swametap Mokoryontet, yoto kuyen piko ce caŋ kuwekyikey wule mite Mokoryontet. 22Kupunto lokoywek cutecu wule mite pikap Yiyintet ce kimite Yerusalem, yoto kuyokto cek Parnapa kuwo Antiyok. 23Ntowo kupunto, kukäs neto wule kikocinto Yiyintet kupeyok piko. Kuŋerec koromun oŋnkutosyi kumwoci cek ŋalek tokol kule kuyen oŋnkurup ŋalek kupoyit manta om mukuleywekwa tokol om wule mite Mokoryontet. 24Ki cito nye topon koromun Parnapa nye kiponto swametap Muyet Nyetilil oko koyenet. Yoto cewec piko ce caŋ kuyen Mokoryontet. 25Yoto kunomen Parnapa kuwo Taruso kuceŋat Saulo. 26Ntowo kunyor kukwer okoy kupun Antiyok, Kuwany kenyit akenke kupontokey cek tukway wanak oko pikap Yiyintet. Kunet cekto luketap piko ce caŋ. Om Antiyok ku wule kikenyosye kunyo cecec cekure konomik kule, “Kristayek.’’ 27Kurekto om pesyosyecoto workoyik alake om Yerusalem kupa Antiyok. 28Kuŋet akenke om cekto nye cekure Akapo, oŋnkuŋalal kuŋorsyo om swametap Muyet Nyetilil kumwoy kule mosukuco rupet nyewo nye mosukunäm koret tokol. Kuyuyit nyoto kuco rupet nyoto ye Kinko Nyewo Klautiyo. 29Yoto kucäm konomik kule mokukoyto ci tokol om cekto kuyu wule muktoy kukalya mpo yeyamwa ce minye Yuteya. 30Kwiy cekto kuyunyoto, yoto kukoyito pesanik cesutyi poyik cepo pikap Yiyintet ce kimite Yerusalem. Cikoci Parnapa oko Saulo kusut pesanik.

will be added

X\