1 Kimite citake Kaysariya nye cekure Korneliyo nye kinyewo nyepo sikarekap luket nye cekure, “Luketap Romek.’’ 2 Ki cito neto nyepo tini koromun nye kisoye Yiyintet wanak oko pikap kanyi. Kikwiye neto tukuk ce caŋ ce toponec kukolyoy Yutayek ce pononik, oŋnkisome Yiyintet okokoy. 3 Nto mite pesyet ake ye kimite sawet sokol nyepo kosoleny, kukäs Korneliyo ŋoŋutyet nye kimuc kot kukäs topon malayketap Mokoryontet nye kico oŋnkumwoci neto kule, “Korneliyo!’’ 4 Yoto kurotot neto malayket topon om muyotet oŋnkumwoci kule, “Mokoryontet, kiy ne nyito?’’ Kuwekyi malayket kumwoci neto kule, “Kucäm Yiyintet somseŋuŋ oko yisyonutekuk co kolyoy pononik, kunyo kakusotiŋ nyi. 5 Yokte yawut piko alak kupa okoy Yopa wokukur citake nye cekure kaynenyi Simon Petero. 6 Mite neto tontonet om kotap cito nyo kute syerok nye cekure Simon nye minye ruretyet tapan.’’ 7 Nteyu kowo kuwecikey malayket nye kiŋololyini neto, yoto kukur Korneliyo mutworikyi oyeny oko sikorintet akenke nye yweye Yiyintet nye ki akenke nye yicini neto yisyet. 8 Kumwoci neto cekto ŋalek tokol ce keyokis, oŋnkuyokto kupa Yopa. 9 Nteye kipesyetap oyeny ye kimite cekto tokupeti poninekwa nye kikirikta Yopa. Kuwo Petero kolaŋnta koto nye kimite koto parak wokusom ye kimite sawet pen kwen. 10 Yoto kwam Petero rupet okoy kumac kule ntoyomisye; nteye kimite tokyiye omik, kukäs neto ŋoŋutyet. 11 Kukäs kuyatakay wulin po torot, kureku kitake nye coni koret nye kerkey oko sira nyewo koromun nye cenömonu kototok tokol amwan. 12 Kimite kiyoto orit tyoŋik wok tokol, co pete kerenkok oko co cutekey ŋony, oko toritek. 13 Kumwoci Yiyintet Petero kule, “Petero, ŋet näm pakäc tyoŋicu oŋnkiyeny yam!’’ 14 Ntene kumwoy Petero kule, “Mokoryontet, puryo kot kuyunyo! Omnye tompo kot ayam ani kenyis kiy nye puryo kot kutilil nto nye miyat.’’ 15 Kukursyo Yiyintet yec nyepo oyeny kumwoy kule, “Puryo kot kuroke kure nyi tukuk ce kikotilil Yiyintet kule puryo kot kutilec nto miyotec.’’ 16 Kwiyakay kuyunyoto aret somok, oŋnkyesut kiyoto lakwar kuwo torot. 17 Nteye kimite Petero kusote nkit om moyenyi kule poru ne ŋoŋutyoni kakäs neto. Kimite yoto piko co keyoku Korneliyo kukeyoŋ om kurketap kayta om letut yu kowo kutep kot kunket kaytap Simon. 18 Kukursyo cekto yoto kutep kule, “Mite tontet ake nye cekure Simon Petero kayi?’’ 19 Nteye kimite Petero tokusote kusyeme kule oŋnket poru ne ŋoŋutyet, kumwoci Muyet Nyetilil neto kule, “Lim pa! Mite piko alake somoku ce ceŋotiŋ nyi. 20 Kunyo ŋet yiytekey rekte ŋony, ntene mente kot atay mewetekey picoto omnye koyoku ani cekto.’’ 21 Kurekto neto kuwo ŋony oŋnkumwoci picoto kule, “Ani cito nyo acenye akwek, kunyo kwokwotyini ne akwek?’’ 22 Kuwec picoto kumwoci neto kule, “Keyokwec acek Korneliyo nyewo nyepo sikarek, nye ci nye topon nye soye Yiyintet oŋnkuyweye Yutayek tokol. Kumwoci malayketap Yiyintet neto kule kukuriŋ nyi iwo kanyi sukuŋet kulim ŋalek ce memwowu nyi.’’ 23 Kukur Petero picoto kupa ko orit kwek toyekyi oŋnkuruy tokol. Ntowo kuyekune, kuŋet Petero oŋnkunomen oko picoto oko mpo yeya alak cepo Yopa kupatakey tokol. 24 Nto om pesyet nye kirupe kupunto Kaysariya wule kimite Korneliyo kukonye neto. Kimite Korneliyo yoto kokoruruc tilyonutekyi oko latosyekyi ce kikikur kukwa. 25 Ntowo kurikta Petero kupunto kayta, kuco Korneliyo kutorok oŋnkoputyi kerenkokyi oŋnkukutuny. 26 Ntene kunäm Petero neto oŋnkuŋet kuyo kumwoci kule, “Ŋet yony; omnye oyiku mpo ani ci pate.’’ 27 Kuŋololyinot Petero Korneliyo ye kimite kuweti koto orit wule kimite kukorurukyikey piko ce caŋ. 28 Yoto Kumwoci Petero picoto kule, “Oŋnket, akwek nkit topon kule puryo kot kucömncini Yutoyintet ntarastinyi kurutoci nto mpo kuyomokey oko lomin. Ntene kukuporwo ani Yiyintet kule puryo kot kumisyo ani asut ci ake tokol kule puryo kot kutilil nto kule miyat. 29 Kunyi yu kweyoku nyi piko kule misyini aco ani, mpo ani aco nye puryo kot atay. Kunyo otepeniŋ kule, kiy ne nye kwekurco ani nyi?’’ 30 Yoto kumwoy Korneliyo kule, “Kimite sawet kutenyitenyi om pesyosyek somok co kutil, ye kyomite ani osome om konyu ye kimite sawet sokol nyepo kosoleny. Om yoto lakwar kuco citake nye kelac sirok ce lekecectos, oŋnkuyoŋe yepo taymwani, 31 oŋnkumwoy kule, ‘Korneliyo! Kolim Yiyintet somseŋuŋ, oŋnkukusot mpo kokotutekap yisyonutekuk cepo kokolyoyisyet. 32 Kunyo yokte citake kuwo Yopa wokukur citake nye cekure Simon Petero. Mite neto tontonet om kotap citake nye kute syerok nye minye ruretyet tapan.’ 33 Sukuŋet yoto oyoku ani kule ico nyi lakwar, kunyo keyiy topon keco. Kunyi ce mite acek tokol yu om taytap Yiyintet cekonye kule celim ŋolyo ake tokol nye komwowuŋ nyi Mokoryontet kule mwowu.’’ 34 Kucec Petero kuŋalal kumwoy kule, “Konket ani kupoyit manta kule, puryo kot kukweye Yiyintet piko, 35 ntene cöme ci tokol nye yweye neto oŋnkwiye ŋalek cepo manta ce cöme, nka kot kupo cito yemet oŋnkono. 36 Oŋnket akwek ŋolyontet nye kiyokoci Yiyintet pikap Israel kumwoy lokoywek ce toponec cepo kalyet om Yesu Kristo nye Mokoryontetap koret tokol. 37 Oŋnket akwek ŋolyontet nyewo nye kikwiyakay om koretap Yuteya tokol, kule kiceke koretap Kalilaya om letutap potisonisyet nyo kimwoytoy Yowana. 38 Oŋnket akwek ŋalek cepo Yesu nyepo Nasaret, nye kiŋape Yiyintet Muyet Nyetilil oko swamet kwek Kinko. Nye kiwesetote koret tokol kwicini piko tukuk ce toponec, oŋnkusop piko tokol ce kitaŋany kupayta setani nyewo nyepo oyik, omnye kipontokey neto Yiyintet. 39 Ceyiku acek muncururwanik ce cinket tukuk tokol ce kikwiye neto om koretap Yutayek oko Yerusalem. Ntene kupakäc Yutayek neto kukwertoci murtowontet. 40 Ntene kuŋet Yiyintet kotutune met om pesyetap somok oŋnkukoci kuporkey, 41 nye kipuryo kot kuporkey kukäs piko tokol, ntene acek pate muncururwanik ce kikwey Yiyintet ce kicekäs. Kikyomisye oŋnkyeyesye acek wanak oko neto om letut yu kowo koŋet Yiyintet kotutune met. 42 Kunyo kinkolonwec acek kule womwoci piko lokoywek ce toponec oŋnkoporci ŋalek cepo manta kule neto kunye kikwey Yiyintet kwek ketintet nye mutyini musankut piko ce soptos oko ce kipok. 43 Neto nyo kiŋalale workoyik tokol ŋalek ce nöme neto kumwoy kule, ci tokol nye keyen neto kunye mocikalya nyoto miyotyonikyi om swametap kaynenyi.’’ 44 Nteye kimite Petero tokuŋolole, kuco Muyet Nyetilil kurekyi piko tokol co kimite kulimntoy lokoywek. 45 Kukite Yutayek co kikoyen ce kukwontoykey Petero om Yopa kukäs kule kekoci Yiyintet kuco kurekyi kokotutyetap Muyet Nyetilil mpo lamek. 46 Omnye kilim cekto piko cut kuŋolole ŋelyepik cepciyotin, kukostoy woyintap Yiyintet. Yoto kuŋalal Petero kumwoy kule, 47 “Ŋo nye muce kuyet mocepatisane picu peko, omnye kanyor Muyet Nyetilil kuyu wulo kicenyoru acek?’’ 48 Kumwayta Petero cepatisan cekto om kaynetap Yesu Kristo. Kusom cekto Petero kopur wanak oko cekto kuwany pesyos ce ŋeri
