Acts 1

1Mokoryontet nye cekonyite Teyopilo, Om kitapumwani nyo kipo tay, kyosil oŋnkatet yisyonutek tokol ce kikwiy oŋnkunet Yesu kuceke ye kicece yisyenyi, 2okoy pesyet nyo kicesute neto kuwo torot. Ye kitompo kot cesut kuwo torot, kimwoci kunkolontyi om swametap Muyet Nyetilil piko co kikweny neto kwek kiyokikyi. 3Kopur Yesu kuwany pesyosyek artam kiceke ye kitutune met, oŋnkuporcikey neto nkit cekto aret ce caŋ om aret nye poru manta nye puryo tintenot kule kikotutune met kusop. Kikäs cekto nkit neto om konyekwa. Yoto kumwoci Yesu cekto ŋalek ce nöme poytoyisyetap Yiyintet. 4Nteye kipontokey Yesu oko cekto kunkolontyi kumwoci kule, “Monte kot aŋete Yerusalem, ntene oken okoy kuco neto nyo kikurto Papamwani, nyo kyolim omwowok ani. 5Omnye kipatisane Yowana piko peko, ntene om pesyos ce ŋeri mosicepatisanenak akwek Muyet Nyetilil.’’ 6Ntowo kuyomokey kiyokik oko Yesu, kutepe cek neto kule, “Mokoryontet, pesyosyecu so ye meseketyi nyi Israel poytoyisyet?’’ 7Kuwekyi Yesu kumwoci cek kule, “Puryo kot kunömok akwek oŋnket pesyosyek nto kenyisyek co kikwiyta Papa om kamukeywekyi nkit. 8Ntene mosonyoru akwek swametap Muyet Nyetilil ye kucontyok, yoto ye mosoyiku muncururwanik ce kamwayte ŋalekwani om Yerusalem, oko om Yuteya, oko om Samariya tokol okoy wule kiŋete koret.’’ 9Nteyu kowo kuwany kumwoy ŋalecutecu, cesut neto kuwo torot kumite cek kuköse, yoto kulum polyet kupote konyekwa. 10Nteye kimite cekto kunyole torot kuköse ye weti, kuyoŋe lakwar komosmwacek piko alak oyeny ce kilac sirok ce lelac. 11Kumwoy picoto kule, “Pikap Kalilaya, omne soyoŋe akwek yu oŋnkonyoli wulin po torot? Yesu nyitenyi kocesutenok akwek kuwo torot, kunye mosukuweckey kuyu nyitenyi oköse akwek cesute kuweti torot.’’ 12Yoto kuwecekey konomik tulwet nye cekure tulwetap Seituninek nye kimite ye puntoy kilomitet akenke keceke Yerusalem. 13Nteyu kowo kupun cek Yerusalem, kupa koto orit oŋnkulaŋnta kupa koto nye kimite koto parak nye kipurune cekto. Coto ku Petero oko Yowana, oko Yakopo oko Antereya, oko Filipo oko Tomas, oko Paturumayo, oko Matayo, oko Yakopo weritap Alufayo, oko Simon nyikanet nye poryecini korenyi, oko Yuta, weritap Yakopo. 14Kipure picutecu tokol wanak om moyet akenke sukusome om pesyosyek tokol. Kipontokey cekto wanak oko koruk, kumite mpo Mariyam kametitap Yesu oko mpo yeyanyitap Yesu. 15Om letutap pesyos ce ŋeri, kopur kokwet nyepo piko tokol co kikoyen, kipuntoy piko tokol pokol ok timtem. Yoto kuŋet Petero kuyo oŋnkuŋalal kumwoy kule, 16“Mpo yeya, roke ciyitita kupoyit manta ŋalekap silutekap Yiyintet ce nöme Yuta nyo kintocini piko ce kinöme Yesu. 17Yuta kunye ki cito akenke nyepo lukenyacek nye kikicekwey kwiyis yisyoni nyacek.’’ 18(Om pesanik co kinyor om yisyet nyepo miyotyet kuco kikwale neto mparet wule kinyorta menyi, wule kiputyi kuŋas kuyatakay moyet kukwa okutanik saŋ. 19Kulim oŋnkunket topon piko ce minye Yerusalem, kunyo kikur cekto mparanato kutoci kaynemwa kule, Akeltama, nye poru kule, “Mparetap koroti.’’) 20“Omnye kicesil om kitaputap tumwonikap kakastayet kule, ‘Roke kopur konyi kwek kiratya, Puryo kot kumisyini kuminy ci orit.’ Kicesil yec kule, ‘Roke kusut citake oteptap yisyenyi.’ 21“Kunyo misyini kuco citake oŋnkuyomokey oko acek sukuŋet kwek neto nyoto muncururwet nye nket kotutunetap metap Mokoryontet Yesu. 22Roke ku cito nye kicepesetoti tokol om lukenyacek yo kicepesetoti wanak oko Mokoryontet Yesu, kuceke pesyosyek co kimwoytoti Yowana ŋalekap potisonisyenyi okoy pesyet nyo kicesutenec acek Yesu kuwo torot.’’ 23Yoto kukwey cekto kaynokap piko oyeny, Yosep nye kicekure Parsapa (nye kicekure yec Yusto) oko Matiya. 24Kusom cekto kumwoy kule, “Ayi Mokoryontet, nyi nye nketi mukuleywekap piko tokol, kunyo Mokoryontet, porwec acek ŋo om picu oyeny nye kekwey nyi, 25sukuŋet kusut kuker yisyet kwek kiyokintet otepto nyo kipokoktoy Yuta nyo kiwecikey otepnyi wule kicone.’’ 26Nto om letut kukweyis cekto kuporci kirotyet picoto oyeny. Nto kaynet nye kicekwey kunye kipo Matiya, cituyo neto kuyomokey wanak oko luketap kiyokik co ki taman ok akenke.

will be added

X\