3 John 1

1Ani nyo Pontet, Osilyini parwani Kayo nye ocöme kupoyit manta 2Arenyo corwenyu. Osome ani kule roke pur topon om kiy ake tokol, oŋnkosom kule roke purte nyi soponto nyepo porto kuyu wulo ponte soponto nye topon om mukuleyto nyeŋuŋ. 3Kyaŋerec ani koromun omnye kukwa mpo yeya oŋnkukwomwoy kule ponte nyi koyenet nye kwilat nyepo ŋalek cepo manta. Omnye purtoy nyi ŋalek cepo manta. 4Puryo ŋolyo nye ŋereco ani kupël ye kalim kule purtoy lekokwani kapurto nyepo manta. 5Corwenyu, ponte nyi koyenet nyewo koromun om yisyet nye yicini mpo yeya, nko mpo toyek. 6Kiŋalaleniŋ nyi cekto topon om wuli om taytap pikap Yiyintet. Kunyo kalye nyi cekto kutosyikey kupa tay om aret nye ŋerece Yiyintet. 7Omnye kucäm cek kule cipe tay om yisyet nyepo Kristo nye puryo kot kumöce kule cenyoru kokolyoyisyet nye cone wule mite piko co puryo kot kuyen. 8Kunyo cikalye acek piko ceyucutecu sukuŋet ciyomekey tokol oŋnkyiy yisyet nyepo manta. 9Kyosilyi parwet pikap Yiyintet, ntene Tiotrepe nye möce kule oyiku kantoyintet nyimwa kunye puryo kot kulime ŋalek cicacek. 10Kunyo ye kaco ani kuye mosoporwok ŋalek ce miyotec ce cikite cepo mwiynan ce ŋolonenec acek. Ntene puryo kot kwiy pate ŋalek coto, puryo mpo kot kutoroce mpo yeya ye kakwa, oŋnkukerektoy mpo yeya alak ce möce kule ceŋerekyi picoto oŋnkusyem kule cekwet picoto kupete wule mite pikap Yiyintet. 11Corwenyu, mente arup kiy ake tokol nye miyat, ntene rup muste kiy nye topon. Ci ake tokol nye yiye ce toponec kunye po nyoto Yiyintet. 12Ŋolole ci tokol topon Temetrio, poru mpo ŋalek cepo manta wule yunto neto. Cetosyini mpo acek kule topon neto, kunyo nketi kule cemwowu acek ŋalek cepo manta. 13Oponte ŋalek ce caŋ ce omöce kule omwowok akwek, ntene puryo kot omöce kule oyiyisye kalamut oko winet. 14Asoti ani kule mosakasiŋ lakwar, kunyo yoto kuye mosiceŋalal tukway. 15Opurte kalyet, Kesupayiŋ coronutekuk ce mite wuli. Osupoywec coronutek cicacek tokol.

will be added

X\