2 Timothy 4

1Kasowuŋ ani om taytap Yiyintet oko taytap Yesu Kristo nye mosukumutyi musankut piko tokol ce kipok oko ce ceptos, oko omnye mosukuco poytoyisyenyi, omwowuŋ kule. 2Mwayte ŋolyontet, syem mwayte ye toponec pesyosyek nto mpo ye miyotec, ketu, reny, titir, netisye om muytocinotet. 3Omnye mosukupunto pesyosyek ce memuce kot kulimnta piko konetisyet nyepo manta, ntene mosukurup corokyinotet nye nyimwa nkit, oŋnkoruruc konetik cikwa nkit ce mosukumwoci ŋalek ce lime yitik cikwa nkit. 4Mosukutoyis nye komo kulime ŋalek cepo manta, oŋnkulim ceptyonkocok cepo mwiynanet pate. 5Ntene misyini ripkey nyi nkit om aret ake tokol, yiy yitite yisyeŋuŋ kuyu mutworintetap Mokoryontet. 6Omnye karik cikoyito ani oyiku korosyontet, kopunto pesyet nyimwani nye opokokte soponto nyi. 7Kwoporye poryet nye topon, kunyo kwawany kamwenet, Kworip koyenet. 8Kunyo konyo ani yawut kutwet nye kwopëlisye, nyoto kunye kutwet nyepo tililinto nye mosukukono Mokoryontet, nye ketintet nyepo manta om pesyonoto. Puryo kot kukono ani nkit, ntene kocini mpo piko tokol co koŋisyi om koyenet ye mokucone neto. 9Syem sorukey co lakwar okoy wuli amite ani. 10Omnye kukusuci Tema ŋerekwek cepo koret, kunye kutaya kunomen kuwo Sesolonika. Kuwo Kresene Kalatiya, kuwe Tito Talmatia. 11Opontekey ani pate oko Luka. Kweru okwantekey Marko omnye ponto latik mokukalya ani yisyet. 12Kwoyokte Tekikos kuwo Efeso. 13Ye keco, sutwo kotit nye kyopokokyi Krapo om Troa. Sutu mpo kitapunek, ntene kupëlis kitapunek cepo syerok. 14Kokwiwo ani kumiyat koromun Alekisanta kitoŋintetap karik, mosukuyokyi Yiyintet nkit om ŋalek ce kikwiwo. 15Möce ripkey wule mite neto, omnye kitintentyi om swamet ŋalek ce kicemwowu acek. 16Puryo ci mpo akenke nye kikalya ani ye kyoŋololi oyetekey nyepo tayta, kitaya ci tokol. Puryo kot kurok kuyityi Yiyintet cekto lelisto nyoto. 17Ntene kiripo ani Mokoryontet kukono swamet okoy amuc kot aŋalale ŋolyontet nye yeme kulim Lamek tokol, cesoruneno metap tilisyet. 18Mosukusorwo ani Yiyintet om wule mite miyotyet ake tokol oŋnkukwero topon okoy wule mite poytoyisyenyi nye mite torot. Kunyo kopurune woyinto wule mite neto okokoy oko okokoy. Yunyoto. 19Osupoywo ani Prisika oko Akwila oko pikap kotap Onesiporo. 20Kipur Erasto Korinso, kunyo kyopokokyi Trofimo Melito omnye kimnyone. 21Syem sorukey co lakwar kutompo kot kukatitit koret. Kesupayak Epulo oko Pute oko Lina oko Klautiya oko mpo yeya alak tokol. 22Kopurune Mokoryontet mukuleyŋuŋ. Opurte akwek tokol poypoyetap Yiyintet.

will be added

X\