2 Timothy 3

1Möce nketi nyi ŋalecu! Kule mite wuyinto om pesyosyek cepo letut. 2Mosukwek piko soyi, cemoroŋis cesilekey, oŋnkuperperis, mosukucup Yiyintet, ce meyweye poyik co kiye cekto, ce puryo kot kuŋerece, ce puryo kusote Yiyintet, 3Ce puryo kot kukolyoyisyi, ce kawot, ce ŋomnsi, ce pararot, ce nyekerec, ce senkere ce toponec. 4Ce ŋomntoyisyi, ce silekey koromun, mosukucäm ŋerekwek kupël Yiyintet. 5Mosukurip tinit wulo po saŋ, ntene oŋnkutay swamet nyenyi. Asanekey koromun picoto. 6Peti picoto alake wokowut korin oŋnkupayta koruk co moponto swamet, ce kinyikisyi miyotyonik cepo leliswekwa oŋnkupayta corokyinotet tokol. 7Korucoto kuce syeme okokoy kule cinetkey ntene puryo kot kunkete ŋalek cepo manta. 8Kuyu wule kitoyis Yane oko Yampure kutay Moses. Kunyo toye mpo picutecu ŋalek cepo manta kuyunyoto. Kiwuryo kasoteywek cepo picutecu oko koyenet nye moyeme. 9Ntene puryo kot kupuntoy cekto wule low, mosukonket piko tokol perperyemwa kuyu wule kiyunto pico ayenku Yane oko Yampure. 10Ntene kwerup nyi konetisyet nyimwani oko kopurto nyimwani, oko kito nye otyikyini ani, om soponto, oko muytocinotet nyimwani, oko cömisyet nyimwani, oko titirotet nyimwani, 11oko toŋoŋutek cikwani, oko nyalilya nyimwani. Nketi nyi tukuk tokol ce kikwiyokis om wule omite ani om Antiyok oko Ikoniyom oko Listira. Toŋoŋutek cewoyec ce cotitir omuytoci, ntene kukalya Mokoryontet acone wule mite coto tokol. 12Mosicitaŋany kupoyit manta piko tokol co möce kule cipurte kopurto nyepo Yiyintet om koyomotet oko Yesu Kristo. 13Ntene mosukutosyi kuwuryo koromun piko ce miyotec oko koperperik. Mosukuperperis, oŋnkuperperkey cekto nkit. 14Ntene tosyikey nyi yiy ŋalek cepo manta co kicinetiŋ oŋnkwikwil cömisyet. 15Nketi nyi kule silutekap Yiyintet ce muce kukoniŋ ŋomnonet nye sutuŋ kosopotot om koyenet nye ponte om Yesu Kristo. 16Silutek ce kicesil kuce kintoci Yiyintet cesil tokol, kunyo ponto latik koromun ye kocinetisye kwek ŋalek cepo manta, oko ye cerenye co kimosokis, oko ye kacesate leliswek oko ye kocinetisye kopurto nye topon. 17Sukuŋet kukwilakay kunetkey citap Yiyintet okoy kuyem kwiy topon yisyo ake tokol nye topon.

will be added

X\