2 Timothy 2

1Nyi werimwani, poyitu swama om poypoyet nye cone wule mite koyenotet nyepo Yesu Kristo. 2Näm ŋalek ce kilim nyi oneti ani om taytap piko ce caŋ cekikäs, oŋnkikoci ŋalecato kunäm oŋnkurip piko co kenekey nyi cekto, ce muce kunet mpo piko alak. 3Mpenyi, taŋany toŋoŋutek cekuk kuyu sikorintetap Kristo nye topon. 4Sikorintet nye mite poryet kunye puryo kot kucöme kowutekey yisyonutek cepo piko cepo ka omnye tyikyini kule oyiyisye topon saŋerec nyewo nyenyi. 5Puryo ci nye orerene ŋweyek nye muce kot kupëlis kunyor kokotutyet nye cipëlisye ye puryo kot kurip ntarastinek cepo ŋweyek. 6Kopotintet nye yiyisyi om swamet kunye roke kunyosyo kunyor omik ce kacekis cepo tayta. 7Möce sot ŋalecu omwowuŋ ani, omnye mosukukalyiŋ Mokoryontet okoy nket ŋalek tokol. 8Sot Yesu Kristo nye kimocokeretap Tauti kunye kiciŋet kotutune met, kuce lokoywek ce toponec coto ce amwoytoy ani. 9Otoŋonyi omnye amwoytoy lokoywek coto toponec, kunyo oyiku mpo ratat pinkonok kuyu corin. Ntene puryo kot kuratat pinkonok ŋolyontetap Yiyintet. 10Omuytocini ani kiy ake tokol kupo toponiyetap piko kweyanik cepo Yiyintet, sukuŋet kunyor mpecek soponto nye mitowune wule mite Yesu Kristo wanak oko woyinto nye mopoku. 11Manta koromun ŋalecu mwowu kule: “Ye kicepoku acek oko neto, mosicesopce mpo oko neto. 12Ye kocetosyikey cemuytoci, kuye mosicepoytoyisye oko neto, Ye kacetay acek neto, mosukutayec acek mpo neto. 13Ye puryo kot ciyeni acek, ntene kukwilat neto okokoy. Omnye memuce kot kutaykey neto nkit.’’ 14Sotyi pikuk ŋalecu, oŋnkisowu cekto koromun om taytap Yiyintet, mente kuwokut kutintentyin om ŋal ce muponto latik ce puryo kot kusutu toponiyet ntene wurtoy pate piko ce lime. 15Syem koromun porukey om taytap Yiyintet yiku ci nye ce cömntoy kuyu cito nye puryo kot kolilone om yisyenyi. Ntene nye nete kutok topon ŋolyontetap Yiyintet nyepo manta. 16Sanekey koromun ŋalalet nyepo perperyo nye puryo kot kupo Yiyintet, nye kwetyini piko wule low om wule mite Yiyintet. 17Konetisyet nyoto kunye kerkey mwayet nye kiyenyakay nye mite kwome panyek. Om picoto oyeny ce netisyi ku Umenayo oko Pileto. 18Kimosokis kutay aret nyepo manta, kunyo wurtoy cek koyenet nyepo piko alak ce kikoyen kumwowu kule kipunto keny kotutunetap met nyinyacek. 19Ntene mocetwoye cetyem tolocta nye kipolyi Yiyintet ŋony. Nto ŋalek ce kicesil tolocta kucu kule: “Nkete Mokoryontet piko ceci, kunyo ci ake tokol nye mwowu kule opoye Yiyintet, kunye misyini kwasta miyotyet.’’ 20Mite koto nyewo terokok saninek oko pokulinek cepo wok tokol, kicitanye alak karik cepo pesanik, citanye alak sapunek, citanye alak ketik, citanye alak menonik. Ponto alake latik koromun, kupuryo kot kuponto alake. 21Ye kasatkey citake kutililit om wule mite tukucutecu miyotec kuye mosukwek nyoto terek nyepo latik om wule mite mokoryontenyi, nye kicitapan kutililit kupoyit Yiyintet oŋnkyiyta kwiy yisyo tokol nye topon. 22Yaste corokyinotet nyeŋuŋ nye kipo lekwantit, tyikyi rip ŋalek cepo manta oko koyenet oko cömisyet oko kalyet pontekey wanak oko piko ce kure kaynetap Mokoryontet om mukuleywekwa ce tililec wulin po orit. 23Sanekey tintenotet nyepo perperyo nye puryo ŋomnon, nketi nyi kule sutu coto wokutyet. 24Puryo kot kumisyini kwek pororin cito nye mutworintetap Mokoryontet, möce kwek ci nye tala om wule mite piko tokol, oŋnku konetintet nye topon nye muytoy, 25nye paypay ye mite kukete piko co tintentyintos oko neto om poypoyet, omnye muce kukoci Yiyintet poroyinto kurenynkey picoto oŋnkunket ŋalek cepo manta. 26Yoto kuye mosukusow cekto om kasoteywekwa oŋnkucilile musatit nyepo Setani nyewo nyepo oyik nye kinäm oŋnkukoci kurup kuyu wule moktoy neto.

will be added

X\