2 Timothy 1

1Cone parwani wule amite ani Paulo nye kicäm Yiyintet kwek kiyokintetap Yesu Kristo, nye kiciyok cokumwoy ŋalek ce nöme soponto nyo kicekurto, nyoto kunye ceponte acek om koyomotet oko Yesu Kristo. 2Osiluŋ werimwani camanet Timosewo. Kante kukoniŋ Yiyintet Papa oko Yesu Kristo Mokoryontenyo poypoyet oko cömisyet oko kalyet. 3Okostoy ani Yiyintet nye ayicini yisyet kupoyit manta kuyu wule kikwiytoy mpo kukomwani. Okostoy ye amite asotiŋ nyi okokoy ye osome pet oko komoy. 4Tasoti ani lokik, kunyo amöce koromun kule akäsiŋ sukuŋet aŋerec kuyema. 5Tasoti koyeneŋuŋ nyepo mukuleyto orit. Koyenet nyoto kunye ponto mpo kokoŋuŋ Loyis oŋnkuponto mpo komet Ewunike. 6Kunyo kosotuŋ ani nyi kule rip topon kokotutek co kikoniŋ Yiyintet yo kyokemeriŋ yewuniyekwani. 7Omnye kipuryo kot kukonec Yiyintet mukuleyto nyepo nyekernan, ntene kikonec swamet, oko cömisyet oko ripetapkey. 8Kunyo mente alilan ye memwayte ŋalekap Mokoryontet, mente mpo alilan om wule amite ani nyi oyiku mopusyontenyi. Taŋany toŋoŋutek om swametap Yiyintet kupo toponiyetap lokoywek ce toponec. 9Kisopec Yiyintet oŋnkukurec ciku pikyi, nye puryo kot kupo tukuk ce kikyiy acek, ntene om cömisenyi nkit oko poypoyet. Kikonec poypoyet nyoto ikye towunot kupunte koyomotet oko Yesu Kristo. 10Kunyo kuciporwec yawut omnye kico kosopintenyo Yesu Kristo. Kiker neto swamet nyepo met. Kunyo kikopor soponto nye mopoku kupunte lokoywek ce toponec. 11Kikweya ani Yiyintet oyiku kiyokintet oŋnku konetintet nye amwocini piko lokoywek ce toponec. 12Kuyunyoto omne sukuŋet kunyi amite yawut otoŋonyi kuyunyitenyi. Ntene moliloni, omnye oŋnketi kupoyit manta cito nye kyoyen, oŋnkonket kule muce kurip neto topon kito nye kikonorwo okoy pesyonoto. 13Rip topon ŋalek cepo manta co kyanetiŋ ani nyi sukuŋet rip oŋnkipurte koyenet oko cömisyet nye ceponte acek om koyomotet oko Yesu Kristo. 14Rip topon cepo latik co kicekoniŋ om swametap Muyet Nyetilil nye mitowune wule cemite acek. 15Nketi nyi kule kimweyeno ani ci tokol om koretap Asia, om coto ku mpo Pukelo oko Eromokene. 16Roke kukalya Yiyintet piko cepo kotap Onesiporo, omnye kiŋerec kutitiro ani aret ce caŋ. Kipuryo kot kunömnci kalilan kule oyiku ani mopusyo. 17Pakenke yu kowo kupun neto Rom, yoto kuceny wule amite okoy kunyorwo. 18Nketi topon yisyonutek ce caŋ ce kikwiy neto om Efeso. Roke kukoci Mokoryontet neto poypoyenyi nkit om pesyonoto po letut.

will be added

X\