2 Thessalonians 3

1Mpo Yeya, osomwec acek sukuŋet kutosyikey kutisto lakwar lokoywekap Mokoryontet oŋnkupëlis kuwoyit kuyu wulo kiyunto om wule omite akwek. 2Osomwec mpo sukuŋet kusorwec Yiyintet om wule mite piko ce kiwuryo oŋnkwiye miyotyet, omnye puryo kot kuponto piko tokol koyenet. 3Ntene Mokoryontet kunye po manta, mosukukwilak onyoru swamet oŋnkuripok topon om wule mite Neto nye miyat. 4Kikonec acek Mokoryontet cikasenakey akwek, kunyo cinket kule oyiyisyi akwek kupoyit manta, kunyo motosyikey ayiye ŋalek ce cemwowok acek. 5Kante kuntoci Mokoryontet mukuleywek cikwok okoy onyoru cömisyet nyepo Yiyintet oko muytocinotet nye konu Kristo. 6Mpo yeya, cemwowok acek cinkolonwok om kaynetap Mokoryontet Yesu kule, oripkey wule mite mpo yeya alake tokol ce puren ce puryo kot kuripe ŋalek co kicinet acek. 7Omnye oŋnket akwek nkit topon kule misyini orupe kuyu wulo kiciytoy acek. Kipuryo kot ciku puren yo kicepontekey oko akwek. 8Kicole omik tokol ce kikyome, kiciyisyi om swamet pet oko komoy sukuŋet mente cekonok akwek wuyin ake tokol. 9Kiciy kuyunyoto nye kipuryo kot ku kule omnye kimocimuci kot cemwowok akwek kule apayec, ntene kiciy kuyunyoto kule sukuŋet akäsenec wule yunto soponto nyinyacek nye roke arup. 10Kicemwowok ye kitocepontekey oko akwek kule, “Puryo kot kuroke kwomis ci ake tokol nyo puryo kot kumöce kule oyiyisye.’’ 11Cemwowu acek ŋalecato omnye kicelim kule mite piko alake ce puren ce puryo kot kwiye yisyet ake, ntene cukure cekto yisyonutek cepo piko alak. 12Cemwocini acek oŋnkyisowu picoto om kaynetap Mokoryontet Yesu Kristo kule, misyini kopurto cekto soponto nye topon oŋnkwiy yisyonutek sukuŋet kunyor pesanik ce kolyekey. 13Ntene akwek mpo yeya, monte cecosye ye mayiy yisyet nye topon. 14Ye katay ci ake tokol nye mite wule omite akwek macäm ŋalecu mite parwani kocesilwok acek, okäs cico topon, oŋnkoyaste kwiyat nkit, sukuŋet kusornen neti nkit. 15Ntene monte cesut nyoto akwek puniyo, asowu kuyu yeya. 16Kunyo Mokoryontet nkit nyo konu kalyet kunye roke kukonok akwek kalyet om pesyosyek tokol, oŋnku om aret ake tokol. Opurtekey akwek Mokoryontet. 17Ani nyo Paulo nkit om yewumwani nye kosile kasupoyisyoni. Kasupayak koromun. Osile ani kwak yunyitenyi. Yewumwani nyitenyi nyepo manta. 18Opurte akwek tokol poypoyetap Mokoryontenyo Yesu Kristo.

will be added

X\