2 Thessalonians 2

1Mpo yeya, ŋalek ce nöme pesyet nye cone Mokoryontet Yesu Kristo, oko ye mosicirurucec acek sukuŋet cetuye oko neto. 2Cesomok acek akwek kule monte kupotpotenis kasoteywek cikwok lakwar nto mpo onyeru om ŋalek ce cemwowu kule kupunto pesyet nyepo Mokoryontet. Pesyet ake kimwoy citake ŋaleca nye kiŋorsyi nto nye kimwoytoy lokoywek. Nto kicemwoy pesyet ake kule kicesil acek parwet nye mwowu ŋalecato. 3Monte kot kuperperak ci ake tokol om aret ake tokol. Omnye puryo kot kwititoy pesyonoto okoy kunyosyo kuco cukurotet nyepo letut; oŋnkutok neto nyo miyat. Nyoto kunye weti wule mite mata nye momise. 4Mosukutay neto kiy ake tokol nye soye piko oŋnkutay kiy ake tokol nye sute piko kule po Yiyintet. Mosukusutkey kwek nyewo nyepo kiy ake tokol, oŋnkowut kotap Yiyintet oŋnkopur ŋony kusutkey kwek Yiyintet. 5Puryo kot tosoti akwek kule kyomwowok ani ŋalecutecu tokol yo kicepontekey oko akwek? 6Oŋnket akwek kito nye kerektoy Neto okoy kwitita pesyet nye kicekwey sukuŋet kuporkey. 7Omnye mite yawut kwiyisyi miyotyet nye motoku, ntene ŋolyontet nye mokwiyakay kunye puryo kot kwiyoktos okoy cinate kuwo tapan neto nyo kerektoy. 8Yoto kuye mosukoporkey kutok Neto nye miyat. 9Mosukupakäc Mokoryontet Yesu nyoto miyat kwiyisye muyet nye cone kutinyi oŋnkwaranta om pesyenyi nyewo ye kaco neto. Mosukuco Neto nye miyat om swametap Setanit oŋnkwiy tukuk wok tokol cepo kakitat oko pelutok cepo mwiynan ce cikite, 10oŋnkwiyisye kaperperisyo ake tokol nye miyat om wule mite piko co mokwaran. Mosukwaran picoto omnye kipuryo kot kutoroc oŋnkucäm ŋalek cepo manta sukuŋet kusopco. 11Om ŋolyontoni kuye kukoci Yiyintet kwiyis mwiynanet om wule mite cek sukuŋet kucäm cekto ŋalek cepo mwiynanet. 12Kunyo ŋalek ce mokutok kucu kule, mosicewosontyi cemutyi musankut piko tokol co puryo kot kuyen ŋalek cepo manta, ntene kucäm pate ŋerekwek cepo miyotyet. 13Mpo yeya, misyini cikaste acek Yiyintet okokoy om wule omite akwek co kicämak Mokoryontet, Omnye kikweyak Yiyintet opoyitu tayta ce kicisop om swametap Muyet Nyetilil sukuŋet kwiyak oyiku pikyi cetililec 14Kikurok akwek Yiyintet kwonyoru ŋalecu kupunte lokoywek ce toponec co kicemwowok acek. Kikurok sukuŋet kwonyoru woyinto nyepo Mokoryontenyo Yesu Kristo. 15Kunyo mpo yeya, okwilokisye oyoŋnkye topon akwil ŋalek cepo manta ce kicinetak om kutit nto parwet. 16Cesomwok Mokoryontenyo Yesu Kristo nkit oko Yiyintet Papanyo nye kicämec om poypoyenyi nye mopoku oko kokenotet nye topon. 17Kante kutitir neto mukuleywek cikwok oŋnkukonok okwilokisye sukuŋet ayiy oŋnkomwowu ŋalek ce toponec.

will be added

X\