2 Thessalonians 1

1Cone parwani wule ce mite acek Paulo oko Sila oko Timosewo. Cesilwok akwek pikap Yiyintet cepo Sesolonika. Piko coto kuce kipoyit Yiyintet Papanyo oko Mokorykntet Yesu Kristo. 2Kante kukonok akwek Yiyintet Papa oko Mokoryontet Yesu poypoyet oko kalyet. 3Mpo yeya, misyini cikaste acek Yiyintet okokoy om wule omite akwek. Ŋolyo nyepo manta ye kaciy acek kuyonyoto, omnye mite kunere koyenet nyimwoŋ koromun, oŋnkutosyinikey cömisyet nye oponte akwek om wule mite piko alake. 4Kunyo cesilekey acek nkit om ŋalek ce nömok akwek om taytap pikap Yiyintet. Cesilekey acek omnye omite akwek otosyinikey omuytoy oŋnkocömisyi nka kot oponte toŋoŋutek tokol oko nyolilutek ce omite opunte yawut. 5Akwek kuce oporu wule mosukumutita Yiyintet musankut nyepo ŋalek cepo manta, kunyo mosukupor ŋalecutecu kule oyeme akwek onyoru poytoyisyenyi nye omite akwek yawut otoŋonye. 6Mosukwiy Yiyintet ŋolyontet nyepo manta, mosukutaŋany neto piko co mite kutoŋonyo akwek yawut, 7oŋnkutyacak akwek co omite otoŋonyi yawut oko mpo acek. Mosukwiy kuyunyoto om pesyet nyo porukey Yesu kucone torot oko malaykanikyi ce ponto swamet nyewo. 8Mosukulay mata nyewo nye rikitite, sukuŋet kutaŋany piko co menket Yiyintet: oko piko co puryo kot kuyweye lokoywek ce toponec cepo Mokoryontet Yesu Kristo. 9Mosukutaŋany cekto om aranet nye mopoku, oŋnkukweyokis om taytap Mokoryontet nye puryo kot kunyoru woyinto nyenyi nyewo. 10Mosukwiyokis ŋalecu om pesyet nye coni neto cokunyor woyinto om wule mite pikyi oŋnkunyor kuywey piko tokol co kikoyen. Mosoyiku akwek alak om picoto omnye kyocäm lokoywek co kicemwowok acek. 11Kunyo po wulo sukuŋet cesomwok acek okokoy. Cesome Yiyintenyo kule kukonok akwek soponto nyepo latik nyo kikurcok kwonyoru. Cesome kule roke kukonok Yiyintet om swamenyi tukuk ce omöce akwek cepo toponiyet oŋnkusat kunyol yisyet nyepo koyenet nyimwoŋ. 12Om aret nye yunyitenyi kuye sukuŋet kunyor woyinto kaynetap Mokoryontet Yesu om wule omite akwek, oŋnkonyoru akwek woyinto om wule mite neto om poypoyetap Yiyintenyo oko Mokoryontet Yesu Kristo.

will be added

X\