2 Peter 3

1Coronutekwani! Parwemwani nyitenyi nyepo oyeny nye kwosilwok akwek. Kwasyem om poronok tukway kule osowu kasoteywek cikwok cepo manta omnye kwasotwok ŋalecu. 2Omöce ani asot akwek ŋalek co kiŋalale workoyik cetililec ikye keny oko ntarastit nyepo Mokoryontet oŋnku Kosopintet nyo kimwowok akwek kiyokik. 3Nyepo tayta, möce oŋnket kule om pesyosyek cepo letut mosukutok piko alake ce poytoy soponwek cikwa corokyinotet nyepo porwonikwa. Mosukucasenekey akwek kucupok. 4Mosukumwoy kule, “Kikurtoci neto cek kule mosaco. Ano yawut? Kipok mpo kukonyacek, kunyo mite kiy ake tokol kuyu wulo kiyunto kuceke kicitany koret!’’ 5Toye cek macäm ŋalek cepo manta kule kiŋalal Yiyintet ikye keny, yoto citany wulin po torot oko ŋony. Kitanyakay koret kucone wule mite peko om kwenutap peko. 6Kunyo peko mpo yec kuce kiyin kwaranta koret nye kipo tay. 7Ntene ŋolyontetap Yiyintet nyoto akenke kunye mite kuripe koret nyi mite yawut, sukuŋet kyarante koret mata nye loye. Cemite ceripe okoy pesyet nye mosicemutyine musankut piko co miyotec oŋnkyaranta. 8Coronutekwani! Ntene monte ceyutye ŋolyontoni akenke kule, kerkey pesyet akenke oko kenyisyek elifut akenke om wule mite Mokoryontet, oŋnkukerkey kenyisyek alifut akenke oko pesyet akenke. 9Puryo kot kwiye Yiyintet möt ŋolyo nye kikurto kuyu wulo sotitoy piko alake, ntene muytocini om wule omite akwek, omnye puryo kot kumöce kule kupot ci ake tokol, ntene möce kule kurenyenkey ci tokol kwasta miyotyonik. 10Ntene mosukuco pesyetap Mokoryontet kuyu corin. Om pesyonoto kuye mosukupot wulin po torot om karumnta nyewo koromun. Mosukulayo kupotyo kokelik om torot om mata nye loye, oŋnkupot koret oko kiy ake tokol nye mite orit. 11Kunyo ye kacaranta tukuk tokol ce mite koret kuyunyitenyi, mosoyeku akwek piko ceyune? Misyini kutililitu soponwekwok oŋnkoywey Yiyintet, 12omite okonye pesyetap Yiyintet. Asyem koromun sukuŋet kuco lakwar. Pesyet nyoto kuye mosicepël wulin po torot oŋnkyaranta kuloy kupotyo kokelik om torot om mata nye loye. 13Ntene cekonye acek ce kikurto Yiyintet, coto ku koret nyelel nyepo torot oko koret nyelel nyepo ŋony, wule mosukopurune toponiyet nyepo tililinto. 14Kunyo coronutekwani, ye omite okonye pesyonoto, kumöce asyem opur otililitu nye moponte lelis om taytap Yiyintet oŋnkopurte kalyet oko neto. 15Akäse muytocinotet nyepo Mokoryontet kuyu poroyinto nye kikonok akwek sukuŋet cisopok kuyu wulo kisilwok akwek yeyanyo Paulo kwiyisye ŋomnonet nye kiŋoŋnkyi Yiyintet. 16Ŋalecutecu kuce mwowu neto om poronokyi tokol ye sile ŋalek ce nöme ŋolyontoni. Mite ŋalek cewuyec ce mite poronokyi. Ŋolole piko co perper ce puryo kot kukwilotin kwiyisye mwiynanet kuyu wulo mostoy cek mpo ŋalek alak cepo silutekap Yiyintet. Kunyo mokwarantakey cek nkit. 17Ntene akwek coronutekwani, kicisowok akwek keny ŋalecutecu, kunyo oripkey sukuŋet mente kot kumasak piko co yirye ntarastinek okoy otay aret nyimwoŋ nye kwilat nyepo manta. 18Ntene otosyikey onerye om poypoyet oko ŋomnonet nye oŋnket Mokoryontenyo oŋnku Kosopintet Yesu Kristo. Kopurune woyinto wule mite neto kuceke yawut oko okokoy okoy okokoy. Yunyoto.

will be added

X\