2 Peter 2

1Kuyu wulo kimite mpo keny workoyik ce mwiynec ce kipontokey piko, kuyunyoto mosukutok konetik cepo mwiynanet om wule omite akwek. Mosukusut cek konetisyet nye sutu arantayet nyewo. Mosukutuckey kutay Mokoryontet nye kisope cekto, kunyo mosukusutyikey kwarantakey cek nkit lakwar. 2Kunyo mosukurup piko ce caŋ kapurto nyepo picoto miyotec, mosukuŋalale piko kwapi aret nyepo manta kukesac ŋalek ce oyiye akwek. 3Om corokyinotet nyimwa kuye mosukunyor latik om wule omite akwek koneticutecu po mwiynan omnye komwowok ŋalek cepo koperperisyo pate. Kicemutyi cek musankut keny, kunyo mite ceyiytoy aranet nyimwa. 4Kipuryo kot kusop Yiyintet malaykanik co kikwiye miyotyet, ntene kiwirta kupa tokol wule mite mata nye momise, wule kicerotyi wule mite menonet kukonye pesyet nyepo musankut. 5Kipuryo kot kusop Yiyintet koret nyepo keny, ntene kikon peko ce kilum koret nyo kipo piko ce menket Yiyintet. Kisop yoto cito akenke, nyoto ku Nuwa nye kimwoytoy ŋalek cepo manta, wanak oko piko alak tisap. 6Kimutyi Yiyintet musankut moŋosyek cepo Sotom oko Komora oŋnkwaranta kupele mata kwek aryantet pate. Kikwiy kuyunyoto sukuŋet kwek kaporunot om wule mite piko co menket Yiyintet kuyu wule mosiciyita cekto om letut. 7Kisor Yiyintet Lot omnye ki cito nye topon nye kisenkere miyotyet nyepo sakwayanat nyepo piko ce kiwuryo. 8Kiminye Lot wule mite picoto, kunyo kilime oŋnkukäs ŋalek tokol okoy kunerec mukuleynyi nye kitopon om ŋalek ce miyotec ce kikwiye picoto. 9Kunyo nkete Yiyintet wule soruntoy piko cepo Yiyintet om wule mite syemutok, oŋnkunket wule mokuripto piko ce miyotec om wule mite toŋoŋutek okoy pesyet nyepo musankut. 10Nto piko ce nyoru musankut nyewo kuco rupe corokyinotet nye samis nyepo porwonikwa oŋnkunyil kamukeywekap Yiyintet. Nyikon koromun koneticutecu mwiynot, oŋnkunyilysi nye puryo kot kuyweye cepo torot; cupe pate, 11Nka mpo malaykanik co ponto swamet nye pële nyepo picutecu mwiynot kuce puryo kot kucupisyi ye cewosontyini om taytap Mokoryontet. 12Kunyo kerkey picutecu oko tyoŋin cepo samiyita ce kicitany kule sicetece oŋnkyepakäce kupok. Cupe tukuk ce puryo kot konket cekto. Mosikyaranta cek kuyu tyoŋin cepo samiyta. 13Mosukuyokune ŋalecato toŋoŋutek kupo toŋoŋutek cek kikon cekto. Ŋerekwek ce ponto cekto pate kuye kayiy ye pet kwen ŋolyo nye ŋerece corokyinotet nyepo porwonikwa. Konok kalilan oko sornon ye koyomisye akwek oko cekto, omnye ŋerekyini cek orosyek cepo mwiynanet ye yiye kuyunyoto. 14Puryo kot kumöce kule nto cekäs kiy ake tokol, ntene möce kule cekäs pate koruk cemoronisyek. Puryo kot kupoku mucesta ye mokwiy miyotyet. Ntocini cek piko co moponto swamet kupa wule mite musatit! Kicinet mukuleywekwa kucäm corokyinotet. Kicup Yiyintet cekto! 15Kikwasta aret nye rotat, kunyo kipotyi aret. Kirup pate aret nye kiwete Palam weritap Peori nyo kicöme pesanik ce kinyor om aret nyepo miyotyet. 16Kunyo kicepolyi celel neto om miyotyonikyi. Kiŋalal sikiryet nyenyi nyo moŋolole, kuyu cito okoy kukerekta punmetyontit nyepo workoyontet. 17Kerkey picu oko koŋik co kosune peko ce kiteny, kerkey oko polik ce wuse yomet. Kikonorci Yiyintet cekto otepto nyimwa om mwenet orit wule mite menonet. 18Ŋolole cek ŋalek cesilekey oŋnkuperperisyi oŋnkwiye corokyinotet nyepo sakwayanatet nyepo porwonik sukuŋet kutec kunäm co kucec kule cemweye wule mite piko co purtoy kopurto nye masat. 19Kurtocini cekto piko cut kule monyoru kalyet oŋnkurok yec ku mutworik cekto nkit cepo miyotyet, omnye mutworin cito nyepo tukuk co kipayta cito nyoto. 20Kicilile piko miyotyonik ce mite koret kupunte ŋomnonet nyepo Mokoryontenyo oŋnku kosopintet Yesu Kristo; oŋnkuketyikey kupayta yec tukucoto picoto, kuporkey kule mosukuwur soponto nyepo picoto nyepo letut kupël soponto nye kipo tay. 21Kitopon nto kipuryo kot konket cek kenyis aret nyepo manta kusir ye kinkoket cek oŋnkuweckey kutay ntarastit nyetilil nye kicikoci. 22Tukuk ce kikwiyokis om wule mite cekto kuce poru kule po manta tyonkoconi mwowu kule, “Ketyinikey ŋokit kwam kuŋuŋntak ce keŋuŋu nkit.’’ Mwowu yec kule, “Ketitoykey nkururwet nye kociwun wokomilmile yec sakatyet.’’

will be added

X\