2 Peter 1

1Cone parwani wule amite ani Simon Petero, mutworintet oŋnku kiyokintetap Yesu Kristo. Osilwok ani akwek piko ce ponto koyenet nyepo latik nye kerkey nyinyacek. Omnye Yiyintet nyinyacek oko kosopintenyo Yesu Kristo om yisyenyi nyepo manta kunye kikonec acek tokol koyenoni. 2Kutosyikey poypoyet oko kalyet kupunte ŋomnonet nye oŋnket Yiyintet oko Kristo Mokoryontenyo. 3Kikonec acek swametap Yiyintet tukuk tokol ce cemöce, sukuŋet cipur kopurto nyepo Yiyintet oŋnkyinket Kristo nyo kikurec acek kwocenyoru woyinto nyenyi oko toponiyet. 4Om aret nyeyu nyitenyi kuye kikonec kokotutek ce woyec ce toponec ce kikurto, sukuŋet kukalyak akwek kokotutecutecu ocilile arantayet nyepo corokyinotet nye mite koret, oŋnkwonyoru soponto nye kerkey nyepo Yiyintet. 5Om ŋolyontoni, kumöce asyem koromun otosyi toponiyet om wule mite koyenet nyimwoŋ, otosyi ŋomnonet om wule mite toponiyet nyimwoŋ. 6Otosyi ŋomnonet nyimwoŋ om ripotetapkey, oŋnkotosyi muytocinotet, oŋnket Yiyintet oŋnkotosyi cömisyet nyepo tupcet nye oponte kuyu mpo yeya. 7Nto om tupcet kuyu mpo yeya, otosyikey ocäm piko tokol. 8Ye oponte akwek kopurto nyeyu nyitenyi nye mite kutosyinikey okokoy, kuye mosukukunok oyiyisye om swamet opoyitu latik oŋnkukonok onyoru ŋomnonet nye yeme om wule mite Mokoryontenyo Yesu Kristo. 9Ntene korat nye memuce kukästa ci ake tokol nye moponto kopurto nyoto oŋnkiyutye kule kiciwun miyotyonikyi co kipo tay. 10Kunyo mpo yeya, asyem oyiyisye swama koromun akwil kursyet nyo kicekurok oko kweyatet nyo kikweyak Yiyintet, puryo kot osutoy akwek mpo kisic ye kayiy kuyunyoto. 11Om aret nye yunyoto kuye mosicekonok akwek kamukeywek ce owute poytoyisyet nye mopoku nyepo Mokoryontenyo oŋnku Kosopintenyo Yesu Kristo. 12Kunyo mososilwok ani ŋalecutecu okokoy nka kot conket akwek, oŋnkokwilokisye om ŋalek cepo manta ce kyonyoru. 13Asoti ani kule ŋolyo nye topon ye kasotwok kulelakitu ŋalecu om kasoteywekwok ye tosope. 14Oŋnket kule om pesyos ce ŋeri mosawirte porto nyitenyi nune kuyu wulo kikurtowo kumwowo Mokoryontenyo Yesu Kristo. 15Kunyo mosasyem koromun okonok akwek ye omuci kot osot ŋalecu om pesyosyek tokol ye kamey ani. 16Puryo kot kyiyisye acek tyonkocok ye cemwowok kamukeywek cepo ye coni Mokoryontenyo Yesu Kristo. Kicekäs woyinto nyenyi om konyekyo. 17Kicemite acek yeto ye kikocini Yiyintet Papa neto Woyinto oko kakitatet, ye kicone kutit wule mite Yiyintet nyepo woyinto nye kimwoy kule, “Nyi kunye Werimwani Camanet, nye oŋerekyini Koromun!’’ 18Kicelim acek nkit kutit nyitenyi kucone torot ye kicepontekey acek oko neto om tulwet nyetilil. 19Kunyo cikenekey koromun ŋolyontet nye kimwoy workoyik. Mosayiy akwek topon ye kotepe kot alimnte ŋalecato, omnye kerkey ŋaleca oko tarit nye kwenye menonet okoy korir koret, oŋnkukweny mukuleywekwok kokelyet nyepo ye kayec koret. 20Ntene nye pëlisyi kunyi, möce oŋnket kule puryo ci nye muce kuror wule yunto ŋorsyet nyepo silutekap Yiyintet. 21Omnye puryo kot kumite workoyonti nye kicemwoy kenyis om cömisyet nyepo cito. Ntene kintoci Muyet Nyetilil piko ye kiŋolole lokoywek ce kwone wule mite Yiyintet.

will be added

X\