2 Corinthians 9

1Puryo kot kuroke osilwok ani akwek ŋalek ce nöme kokolyoyisyet nyo mite cesutyini pikap Yiyintet. 2Oŋnket kule omöce kule cikolyoyisye, kunyo kwosilkey ani om wule mite pikap Meketoniya omwoci kule, “Mpo yeya cepo Akaya kuce kiyiytakey kukolyoyis kuceke kenyit nyankwe.’’ Kunyo kokowurur cömisyet nyimwoŋ cekto. 3Koyoku yawut mpo yeya cutecu sukuŋet mente kwek silotet nyinyacek ŋal cepo kutit pate, ntene kupoyit manta kuyu wulo kwomwowu kule oyiku akwek yiytotin okolyoyisye. 4Nto pesyet ake ye kacekwantekey acek pikap Meketoniya oŋnkwocenyoru kule puryo kot oyiku akwek yiytotin, kupuryo kot cecurokyisyi acek nkit, yoto mosocurokisye mpo akwek omnye kicesilkey wokutil. 5Kunyo kwasot kule misyini omwoci mpo yeya cutecu kunyosyeno kukwa wule omite akwek oŋnkwokuyiyta kokotutek co kyokurte akwek kutompo kot kupunte pesyet, sukuŋet ye kopunu ani conyoru kukuciyta topon, yoto kupor kule okonu akwek kokotutek nye ocöme nye puryo kot omnye kocisimncok 6Möce oŋnket kule, “Nye kakol kupuswek ce ŋeri, kunye nyoru omik ce ŋeri, nto nye kakol kupuswek ce caŋ, kunye nyoru omik ce caŋ.’’ 7Kunyo misyini kukon ci ake tokol kuyu wule kacämnta nkit om moyenyi nye puryo kot kumwowu kule kokoyte püc pate nto kocisimnci. Omnye cöme Yiyintet nyo konu om ŋerekwek. 8Kunyo muce kukonok ce caŋ kusir ce omöce sukuŋet onyoru ce caŋ om kiy ake tokol nye omöce akwek, sukuŋet akalya yisyet tokol nye topon. 9Kuyu wulo mwoytoy silutekap Yiyintet kule, “Pciytoy Yiyintet püc pate, kupcici pononik, Pure cömisyet nyenyi okokoy okoy okokoy.’’ 10Kunyo Yiyintet nyo kocini kolintet kupuswek oŋnkukoci omik ce ome, kunye mosukukonok kukoci kuteris kupityo kupuswek cikwok, sukuŋet kupityo kupuswek ce caŋ cepo poypoyemwoŋ. 11Mosukukonok Yiyintet akwek oyiku mokoren kuyemak sokolyoyisye okokoy, sukuŋet kukasta piko ce caŋ Yiyintet om kokotutek ce cikwakwek ce kyokoci kupunte wule mite cekto. 12Omnye puryo kot kukolyoy pikap Yiyintet nkit pate tukuk cu okonu akwek, ntene sutu mpo kakastayet nyewo om wule mite Yiyintet 13Kunyo om yisyet nyimwakwek nyitenyi, kunye sutu kukasta piko ce caŋ Yiyintet omnye oyeni akwek lokoywek ce toponec cepo Kristo, oko kokolyoyisyet nye okolyoy piko alak. 14Yoto ye mosukusomwok cekto akwek koromun omnye oponte poypoyet nye pciyat nye kikoporwok Yiyintet. 15Cikaste Yiyintet om kokotutekyi ce caŋ ce mociyite.

will be added

X\