2 Corinthians 8

1Mpo yeya, cemöce acek kule oŋnket akwek ŋalek ce kikwiy poypoyetap Yiyintet om pikap Yiyintet cepo Meketoniya. 2Kicesyem syemutok ce wuyec cepo toŋoŋutek ce kipunte cekto, ntene kuŋerec cek koromun kutil, omnye kiŋerec oŋnkupciw tukuk ce kiponto nka kot ki ponon. 3Komwowok cepo manta kule kipciw cekto kuyu wule ki muktoy, oŋnkutil coto kikonec acek kwicek nkit. 4Oŋnkusaysayec acek kule roke cecomnci cekto kukalya pikap Yiyintet om Yuteya. 5Kikon cek ce caŋ kusir ce kicisotyini! Nyepo tayta kunye kikoytokey cekto om wule mite Mokoryontet oŋnkukonnkey mpo yec om wule ce mite acek om cömisyetap Yiyintet. 6Kuyuyit nyoto sukuŋet cesom acek Tito nyo kicece yisyoni kuwaŋnta kukalyak awany yisyoni pciyat nyepo cömisyet. 7Oyiku akwek mokoren koromun om tukuk tokol ce oponte om koyenet, oko ŋalalet, oko ŋomnonet, oko swamet nye amöce kule kyiye ce toponec, oko cömisyet nye acömec acek. Kunyo cemöce kule okolyoyisye mpo akwek om yisyoni po cömisyet. 8Puryo kot amöce ani kule okonu ntarastinek, ntene oporwok wule moktoy piko alake kule cikolyoyisye. Sukuŋet oŋnket kule po cömisyet nyimwoŋ manta. 9Omnye oŋnket akwek poypoyetap Mokoryontenyo Yesu Kristo, nka kot ki mokoryo neto kuyu wule kiyunto, ntene kiweckey kwek panan kupo akwek, kule sukuŋet omokoren akwek kupunte pananiyantit nyenyi. 10Kunyo okonok ŋomnonet nyimwani om ŋolyontoni kule, roke awany akwek yawut yisyet nyo kyocec kenyit nyankwe. Oyiku akwek cepo tayta; puryo kot ku kule oyiyisye pate, ntene kyocöme kule kyiyisye. 11Otosyikey kuyunyoto okoy awany yisyet. Otitir awany yisyonoto kuyu wule kikyokoytekey oyiyisye tukuk ce oponte. 12Ye möce cito kule okolyoyisye okonu, kucöme Yiyintet kokotutyet nye muce kukon; neto ntene puryo kot kuce moponto. 13Puryo kot kuroke kule cetorwok akwek nyikisinto sukuŋet cikuskus nyikisinto nyepo alak. 14Omnye oponte akwek yawut tukuk ce caŋ kuporkey kule misyini akalye piko co möce kokolyoyisyet, nto punto pesyosyek ce omöce akwek kokolyoyisyet oŋnkuponto cekto tukuk ce caŋ, mosukukalyak akwek cekto yoto. Om aret nyeyunyitenyi kuye mosiciyoyec piko tokol. 15Kuyu wulo mwoytoy silutekap Yiyintet kule, “Cito nye kiruruc ce caŋ, kunye moponto ce caŋ, nto nye kiruruc ce ŋeri kunye puryo kot kurorci.’’ 16Cikostoy Yiyintet koromun nye kikoci Tito mukuleytap kokolyoyisyet nye kerkey oko nyinyacek, kumac kule kukalyak akwek. 17Kicesom acek neto kuco wulo omite akwek, ntene kimite kuyiytat kwine nkit kule aco. 18Kociyoku neto oko yeya akenke nye ciyweye koromun om wule mite pikap Yiyintet om yisyenyi nye mwoytoti Lokoywek ce toponec. 19Kunyo kikwey pikap Yiyintet neto kule cepesetate oko acek ye cemwoytoti yisyet nyepo cömisyet nyepo woyinto nyepo Mokoryontet oŋnkuporu kule cemöce kakalyayet. 20Ceripekey acek koromun kule mente kot cesutu kaŋunyŋunyet om wule ceriptoy kokotutecutecu konu piko. 21Yisyet nye cetyikini acek kunye ce möce kule kyiy kito nyepo manta om taytap Yiyintet oko taytap piko. 22Kunyo kociyoku acek cekto oko yeyanyo ake nye kucekir acek neto aret ce caŋ okoy cinket kule titirot koromun kule okolyoyisye. Kunyo omnye kenenokey neto akwek, möce koromun kule akalyak akwek. 23Nto Tito kunye cito nye kyiyisyi acek tukway cikalyak akwek. Nto mpo yeya cut alak cekwontoykey neto kuce sutu woyintap Kristo om kaynetap pikap Yiyintet. 24Oporci akwek cekto cömisyet nyimwoŋ sukuŋet kukäs pikap Yiyintet tokol oŋnkunket kule cepoye acek manta ye cesilenokey akwek.

will be added

X\