2 Corinthians 7

1Corunutekwani cämanik! Kicekurtowec ŋalecutecu tokol. Kunyo möce kule cesitkey acek om wule mite kiy ake tokol, nye wurtoy kumiyatit porto nto mukuleyto. Möce cetililitu ciwoŋnkyi topon, oŋnkyipurte koyweyisyet om wule mite Yiyintet. 2Oŋoŋwec mukuleywek cikwok, tompo kot celel acek om wule mite citake tokol, nto tompo mpo kot kyarante nto ciperper acek ci ake tokol. 3Puryo kot omwowu ani ŋalecu nye orenyok akwek, kuyu wulo kyomwowok kunyo kule oyiku akwek cämanik ce cepontekey okokoy ye cesoptosi nto ye cepoku. 4Okenenokey ani akwek koromun ye oŋololwok, kunyo osilenokey akwek koromun. Oponte titirotet nyewo om wuyinwekyo tokol. Oponte ani ŋerekwek ce caŋ kusirto. 5Kipuryo kot cimuny acek mpo yu kowo cepunu Meketoniya. Kimite wuyinwek wulyo tokol, kumite wokutyet wule mite alake oko muyotet nye kimite mukuleywek cicacek. 6Ntene Yiyintet nyo titire piko ce kokwilyo mukuleywek kunye kititirec omnye kico Tito. 7Kipuryo kot ku kule omnye kico neto, ntene om ŋalekyi ce kimwoy, kuyu wule kyotitirte akwek neto. Kimwowec kule ömoce akwek koromun kule cekasa, oyiku nerekotin omnye oyiku yiytotin oyetyeco ani, kunyo oyiku yawut ŋerekat. 8Omnye nka kot kinerecak akwek parwemwani, momwowu kule akalya omnye kyosil parwanato. Kyasowu oŋnket kule kinerecak om pesyos ce ŋeri pate, ntene nka kot kikyamwowu kule akalya, 9oyiku yawut ŋerekat, nye puryo ku kule omnye kyanerecak, ntene omnye kiwecak nerekwek okoy arenynkey awec kopurto nyimwoŋ. Kikwiyisye Yiyintet nerekwek coto, kunyo puryo kot ciwurtak. 10Omnye nerekwek ce yiyisye Yiyintet kuce wece mukuleyto kunyor soponto. Kunyo mocetoye ŋolyo nyeyunyo! Ntene sutu met nerekwek cepo koret. 11Akäs pa wule kikwiyta Yiyintet om nerekwek kwakwek coto; kikonok asot koromun, nye kipor kule moyiku akwek lelotin! Om nerekwek oko ŋoyenotet, oko kasoteywek, oko cömisyet oko yiytayatet, yoto omutyi musankut piko ce lelotin! Kwoporu kule moponte akwek lelis om ŋolyontono tokol. 12Kunyo nka kot kyosilwok ani parwanato, kipuryo kot asile kupo cito akenke nye kilel, nto kupo mpo cito akenke nye kicelel om wule mite neto. Ntene kyosilwok oporu kutok om taytap Yiyintet cömisyet nyewo nye oponte akwek om wule cemite acek. 13Kuyunyoto sukuŋet cetitir acek. Kipuryo kot kotitirec acek pate, ntene kiŋerecec koromun Tito kuporwec aret nye kyakalye akwek neto. 14Kyosilenokey ani akwek om wule mite neto, kunyo puryo kot awurte akwek om wule ämite ani. Kiceŋololwok okokoy ŋalek cepo manta, kunyo kukuporkey kule po manta silotet nyo kucemwocini acek Tito. 15Tosyinikey kunere cömisyet nyenyi om wule omite akwek, ye kesotak kule kyoyiku yiytotin olimnci, oko kuyu wule comuye opotontye atoroc oŋerekyi neto. 16Ayiku ani ŋerekat koromun omnye omuci okenenokey akwek koromun om kiy ake tokol.

will be added

X\