2 Corinthians 6

1Kunyo kuyu wulo kyiyisyi acek oko Yiyintet cesomok monte ce cäm kupot püc pate poypoyet nyo kyonyoru kucone wule mite Yiyintet. 2Kuyu wulo mwowu Yiyintet kule, “Kyolimuŋ ani om pesyet nye kicecäm, Kyakalyiŋ om pesyet nyepo kosopet.’’ Limnte! Kunyo pesyet nyitenyi nye cenyorune cömisyetap Yiyintet, pesyoni kunye pesyet nyepo kosopotet. 3Puryo kot cemöce acek kule kunyor citake tokol konokut, sukuŋet kuwur wurat yisyet nyinyacek. Kunyo cesyeme kule mente cekerekte aret nyepo citake. 4Ntene ciporu kule ciku mutworikap Yiyintet om kiy ake tokol nye kyiye, omnye cemuytocini koromun wuyinwek tokol oko toŋoŋutek tokol. 5Kicepirec, kicekerktec mopusi, kicewunuktec, kiciyisye kot cecosye nye puryo rwonto oŋnkwamec rupet. 6Kunyo kiciporu acek kule ciku mutworikap Yiyintet om tililinto, oko ŋomnonet, oko muytocinotet oko tolosyet om swametap Muyet Nyetilil oko cömisyet nyinyacek nyepo manta, 7oko lokoywek cicacek cepo manta om swametap Yiyintet. Ŋalek ce tililec cepo manta kuce karik ce kyiyisye ce porye oŋnkyeyetekey. 8Ciyweyec acek, oŋnkyenyilec, cecupec, oŋnkyikastec, cesutec kuyu mwiynot, oŋnkurok ceŋololi ŋalek cepo manta. 9Cesutec kuyu pic ce mocinket, oŋnkurok konketec piko tokol. Cesutec kuyu pic ce kipok, oŋnkurok ciku sopcotin kuyu wulo oköse akwek. Nka kot kicitaŋanyec, ntene puryo kot cepakäcec. 10Nka kot kicinerecec, ntene ceŋereci okokoy. Cekerkeyekey nye ciku ponon, ntene cewece kwek piko ce caŋ mokoren. Cekerkeyekey nye ciku ponon, oŋnkurok ceponte tukuk tokol. 11Mpo yeya, Korinsoyek! Koceŋololwok acek akwek ciporwok kutok, kuceŋany mukuleywek cicacek. 12Puryo kot ceker cewuny mukuleywek cico om wule omite. Ntene akwek kuce kwaker awuny mukuleywek cikwok om wule cemite acek. 13Oŋololi yawut kuyunye oyiku akwek lekokwani, möce oŋany mukuleywek cikwok oporwec kopurto nye kerkey nye ceponte acek om wule omite akwek. 14Monte ceyiyisye oyoyeckey oko piko co puryo kot kuyen, omnye puryo kot komukoktos kuyunyo. Muce kucomnyo ŋalek cepo manta oko miyotyet? Muce kopurcini kulene lakweyet oko menonet? 15Muce kucömncin kulene Kristo oko setanit? Kiy ne nye muce kwicin cito nyo kikoyen oko nye tompo koyen? 16Kumuce kulene kwicin kotap Yiyintet oko ototoywek cepo piko co menket Yiyintet? Omnye ciku acek kotap Yiyintet nye sopot! Kuyu wulo kimwoy Yiyintet nkit kule, “Mosatec ani konyu wuli mite pikwani, Oŋnkominy wule mite cekto, Mosoyeku Yiyintet nyimwa, kwek cekto pikwani.’’ 17Mwowu mpo Mokoryontet kule, “Misyini apakakte cek, oŋnkakwane wule mite cekto. A sanekey kiy nye puryo kot kutilil. saŋet atorocak ani. 18Mosoyeku ani Papamwoŋ, oŋnkoyiku akwek werikwani oko tipikwani. Mwowu Mokoryontet nyepo kamukeywek tokol kuyunyoto.’’

will be added

X\