2 Corinthians 4

1Kikonec acek Yiyintet kyiy yisyoni om poypoyenyi, kunyo cetosyinikey ceponte titirotet. 2Kicetay tukuk tokol ce wuŋotin cepo menonet cepo sornon, puryo kot kyiyisye yec koperperisyo, nto mpo cemas ŋolyontetap Yiyintet, cineti kutok nye mocewunye ŋalek cepo manta. Cemöce kule cekonu konetisyet kucäm ci tokol topon om taytap Yiyintet. 3Omnye ye wuŋotin lokoywek ce toponec cu cemwowu acek, kuwuŋotin pate om wule mite piko co peti wokupotos. 4Puryo kot kucömisyi cekto omnye kiker oyinoto nyepo koroni kuyene menonet kasoteywekwa cikwa. Sukuŋet mente kukäs cekto topon lakweyet nye mite lokoywek ce toponec cepo tililinto nyepo Yesu Kristo; nye tonto nyepo manta nyepo Yiyintet. 5Omnye puryo kot cemwoytoy acek ŋalek ce cicacek nkit. Cemwoytoy Yesu Kristo nye Mokoryontet, oŋnku ciku acek mutworik cikwok om kaynetap Yesu. 6Yiyintet nyo kimwoy kule “Mosukoluci lakweyet menonet.’’ Kunye Yiyintet nyoto nye kikoci koluci lakweyet nyenyi mukuleywek cicacek, sukuŋet kusutwec lakweyet nyepo ŋomnonetap woyinto nyepo Yiyintet nye luwu om tokoytap Kristo. 7Oŋnkurok yec acek cu ceponte soponto nyitenyi konorat kuce cekerkey oko terenik cepo menon, sukupor kule Yiyintet kunye ponto swamet tokol, ntene puryo kot ku nyinyacek. 8Cetoŋonyi om aret tokol, ntene puryo kot kupotwec titiret, cecoŋoŋeni, ntene puryo kot kupokunenec kokenotet. 9Cinyolilec, ntene puryo kot kupotwec kiy, ceŋwolec, ntene puryo kot kuwoŋntec. 10Cesutoti acek pesyosyek tokol metap Yesu om porwonikyacek, sukuŋet kuporkey cekäs soponto nyenyi Kristo om porwonik cicacek. 11Cemite acek okokoy om soponwek cicacek ŋoyeniyontit nyepo met om kaynetap Yesu, sukuŋet kutok cekäs soponto nyenyi Kristo om porwonik cicacek cu poku. 12Poru ŋolyontono kule yiyisyi met om wule cemite acek, ntene kwiyisyi soponto om wule omite akwek. 13Mwowu silutekap Yiyintet kule, “Kyaŋalal ani, omnye kyoyen.’’ Ceŋololi mpo acek om koyenet nyepo Muyet Nyetilil nye kerkey nyoto. 14Cinketi kule Yiyintet nyo kiŋete kotutune met Yesu, kunye musukuŋetec acek citutune met oko Yesu oŋnkusutwec wanak oko akwek cekwa taynyi. 15Omnye cikwakwek cutecu tokol, kunyo mite kupuntoy poypoyetap Yiyintet wule mite piko ce caŋ, mosukokasta cekto om sayet kupo woyintap Yiyintet. 16Puryo cecose acek mocetitir om ŋolyontoni, nka kot mite kucostos porwonik cicacek wule po panyek, ntene kumite kutosyinikey pesyosyek tokol soponwek cicacek cepo orit. 17Ntene toŋoŋutecutecu tukusic oŋnkuminkec kuce mosukukonec acek woyinto nyewo nye mopoku nye pële toŋoŋutek. 18Omnye puryo kot ceköse acek tukuk ce toku, ntene ceköse pate tukuk ce motoku. Pure pesyos ce ŋeri tukuk ce toku, ntene pure okokoy tukuk ce motoku.

will be added

X\