2 Corinthians 2

1Kunyo kyowoŋnkyi ŋolyontoni om mukuleymwani kule puryo amoce aco wule omite akwek osutwok nerekwek. 2Omnye ye kanerecak ani akwek, ku ŋo yec cito nye ŋetu nye muce kuŋereca ani? Nyoto kunye cito nyo kyanerec ani! 3Kuyunyoto sukuŋet osilwok ani parwani, kupuryo kot amoce yec kule aco cokunerekis piko ce keteŋereco ani, omnye oŋnketi topon kule ye ayiku ani ŋerekat, kuye mosoŋerec mpo akwek. 4Kyosilwok yoto oponte wuyinto oko nerekwek ce mite mukuleyto oko lokik, nye kimomöce kule onerekisye, ntene kyomöce kule sonket kule ocömok ani akwek koromun. 5Ye mite citake nye kinerec cito ake, kipuryo kot kunereca ani, ntene kinerecak akwek tokol, nka kot momoce ani kule omwontyok akwek. 6Yeme cico lelisto ye komutyi akwek piko ce caŋ musankut. 7Kunyo misyini akalye akwek oŋnkotitir neto, sukuŋet mente kot kunyikisyi nerekwek okoy kutoyis kuwoŋnkyi. 8Osomok ani möce oporci kule ocöme akwek neto. 9Kyosilwok ani parwana. Kule asyemak akäs oŋnkomuci otitir; oŋnkomuci kot arup konetisyet nyepo tukuk tokol. 10Ci ake tokol nye kokalye akwek lelis nye kakwiy mosakalye mpo ani neto ŋolyo ake tokol, nteye kakalye; kukakalye om Kristo om kaynemwakwek. 11Cinket ŋomnonet nyepo Setanit kunyo puryo kot kuroke cikoci acek poroyinto kot kuperperec. 12Nteyu kowo apunte ani Troa amwayte lokoywek ce toponec cepo Kristo, onyoru yoto kule kiyat Mokoryontet aret nyepo yisyet om wuloto. 13Ntene kyasot koromun omnye kipuryo kot onyoru yeyanyo Tito. Yoto oyomis pikap woloto oŋnkonomen awo Meketoniya. 14Ntene cikaste Yiyintet! Omnye om koyomotet nye ceponte oko Kristo kunye ntowec Yiyintet okokoy cipëlisye. Yiyisyenec acek neto sukuŋet cemwayte lokoywek ce toponec kupunte wulyo tokol kuyu kiy nye poŋu topon. 15Omnye cekerkeyekey acek oko korosek ce poŋu topon ce pele Kristo sukunet kupunto wule mite Yiyintet. Peti korosecoto wulyo tokol wule mite piko co mite cisope oko co peti wokusoptos. 16Korosyontoni poŋu topon kunye poru soponto om wule mite piko co cisope, oŋnkupor met om wule mite piko co peti wokupotos. Kunyo ŋo nye muce yisyoni? 17Puryo kot cerkeyekey acek oko piko alak ce caŋ ce yiyisye lokoywekap Yiyintet kupoyit kamonkesyantit. Ntene omnye kikoyoktec acek neto, kunyo ceŋololi om tay nyi cepo manta om poypoyet, kuyu mutworikap Kristo.

will be added

X\