2 Corinthians 13

1Aret nyepo somok nyitenyi orutocok ani akwek kuyu wulo cemwoytoy kule, “Cemute musankut ye kaŋalal piko muncururwanik oyeny nto somok.’’ 2Yo kyopontekey oko akwek om panta nyepo oyeny, kyosowu yoto piko ce kikwiy miyotyet ikye, oŋnkosowu mpo piko alak tokol. Kunyo asowok mpo yawut ye amite wule low, nteye kaco yec aret nyepo somok kupuryo ci nye muce kucilile toŋoŋutek. 3Mosokäs akwek nkit kule ŋolole Kristo kupunte wule amite ani. Puryo kot kupuren Kristo om wule omite akwek, ntene yiyisyi swamet nyenyi om wule omite. 4Omnye nka kot kimoponto neto swamet yo kicewuyitocini murtowontet, ntene sopot yawut om swamet nyepo Yiyintet. Moceponte mpo acek swamet om koyomotet nye ceponte oko neto, ntene om tilyanatet nye ceponte acek oko akwek kunye mosicesopce oko neto om swametap Yiyintet. 5Akäskey akwek nkit oŋnkomutyikey musankut oŋnket kule ceponte koyenet. Oŋnket pa kule mitowune Kristo wule omite akwek? Tos pate ye kyosute koromun. 6Asoti ani kule mosonket akwek kule puryo kot cisute acek. 7Cesome acek Yiyintet sukuŋet mente kot ayiy akwek lelis, nye puryo kot ku kule sukuŋet kuporu kule kuciy acek topon, ntene sukuŋet ayiy akwek cepo manta; nka kot ku kuporukey kuyunye kicisute acek. 8Omnye puryo kot cimuci acek kot kyiy tukuk ce toyekey oko ŋalek cepo manta, kyiye pate ceporyecini. 9Omnye ciku acek ŋerekotin ye moceponte swamet oŋnkoponte akwek. Kunyo cesome kule onyolu akwek owoŋnkyi. 10Osilwok ani parwani kutokumite wule low om wule omite, sukuŋet ye kaco mente conyercok oyiyisye kamukeywek ce kikono Mokoryontet. Kamukeywek cutecu kuce otecenok puryo kot oturpupenok. 11Kunyo mpo yeya, cemutakwey! Asyem anyoru toponiyet, alimnte ŋomnonet nyimwani, acömncine akwek kwakwek nkit. Opurte kalyet, kuye sukuŋet opurte akwek Yiyintet nyepo cömisyet oko kalyet. 12Osupayikey om ŋatutet nyetilil nyepo tupcet, Kasupayak akwek pikap Yiyintet tokol. 13Poypoyetap Mokoryontenyo Yesu Kristo, oko cömisyetap Yiyintet, oko koyomotet nyepo Muyet Nyetilil kopur oko akwek tokol.

will be added

X\