2 Corinthians 12

1Mososilkey ani nka kot puryo kot kwiye kiy nye topon. Ntene mosaŋalale kirwotik oko ŋoŋutek ce kikono Mokoryontet. 2Oŋnket ani cito akenke Kristoyintet nye kicenäm oŋnkyekwer kuwo koret nyepo somok wulin po torot om kenyisyek taman ok amwan co kitil. Moŋnket kule kukwiyakay kuyunyoto manta nto kuponto porto nto om muyet nto kyakäs ani ŋoŋutyet, Yiyintet nye nkete. 3Oŋnket kule kicesut cicoto kuwo wule topon (ntene moŋnket yec kule kikwiyakay kuyunyoto nto kyakäs ani ŋoŋutyet, Yiyintet nye nkete.) 4Kilim neto om wuloto ŋalek ce wuŋotin ce memuce kot kuŋalale cito. 5Kunyo mosilkey ani kupo cicoto, ntene puryo kot osilkey om ŋalek ce nömo ani, tos pate om tukuk ceporu purenotet nyimwani. 6Nto kwomöce ani kule osilkey, nto kupuryo kot oyiku solwo, omnye nto kwomwowu ŋalek cepo manta. Ntene puryo kot osilekey, omnye momöce kule kusotyo citake kule opoye ani parak kusir ce kikäs oyiye nto ŋalek ce kilim oŋololi ani. 7Ntene sukuŋet kuripo mente kot osutkey ani om silotet kupo tukuk cepo kakitat ce kyakäs aret ce caŋ. Kicekono ani mwoninto nyepo porto nye yu kötet nye mite porto, nye yiyisyi kuyu kiyokintetap Setanit sukuŋet kupiro oŋnkukerekta mosilkey kusirto. 8Kyosom ani Mokoryontet aret somok kule kunumuneno kiyitenyi. 9Kuwec kumwoy kule, “Poypoyet nyimwani kunye yemiŋ nyi, omnye swamet nyimwani kunye tökune purenotet nyeŋuŋ.’’ Kunyo oyiku ŋerekat koromun osilkey omnye moponte swamet, sukuŋet kuripo swamet nyepo Kristo. 10Kunyo oŋerekyini purenotet; oko cupisyet, oko nyikisinto, oko toŋoŋutek, oko wuyinwek kupo kaynetap Kristo. Omnye ye oyiku puren kuye yoto ye oponte swamet. 11Oyiyisyi ani kuyu solwo. Ntene akwek kuce kwosokyo ayiy kuyunyoto. Akwek kuce kweroke acämnta ani. Omnye nka kot moponte latik, ntene puryo kot oyiku miniŋ om aret ake tokol om wule mite, “Kiyokikwok coto.’’ 12Kyoporwok kule oyiku ani kiyokintet om tukuk ce kyayiy om wule omite akwek om muytocinotet nyewo, coto ku pelutok oko tukuk cepo kakitat, oko yisyonutek cepo swamet. 13Ntene kyoyiku akwek miyotec kulene kupël pikap Yiyintet alak, tos ani nkit pate nye mnosomok kokolyoyisyet. Osomok akalya omnye mnoyiyisye cepo manta! 14Aret nyepo somok nyitenyi nye oyiku ani yiytat aco wule omite akwek, momöce kule cataŋanyak. Omocok akwek, ntene momöce pesan. Omnye puryo kot kukiy nyepo kwak kukonorci lekok poyik tukuk, ntene poyik ce konorcini lekok tukuk. 15Mosaŋerec ani ye koyiyisye tukuk tokol ce oponte oŋnkokoytekey mpo ani nkit sukuŋet akalyak akwek. Omuci ocäm ani kuminiŋ aŋnkacämak ani akwek koromun? 16Kunyo mosocam akwek kule kipuryo kot onyikisyok ani. Ntene mosukumwoy citake kule, kyatecak oyiyisye mwiynanet. 17Kyomwowok ani so kuyunyoto ayiyisye ci ake tokol om nyo kyoyoku kuco wulo omite? 18Kyosom ani Tito kuco kucontoykey yeya Kristoyintet ake, omwowu so kule kiŋomwok akwek Tito? Puryo kot kyiyisye acek oko neto kasoteywek ce kerkey oko kopurto nye kerkey? 19Pesyet ake osoti akwek kule om ŋalecu tokol kuce cemite acek ceyetekey om wule omite akwek. Puryo kot kuyunyo! Ceŋololi kuyu wule moktoy Kristo kule ceŋalal om taytap Yiyintet. Mpo yeya cämanik, nto kiy ake tokol nye kyiye kunye kyiye kule sukuŋet cikalyak akwek. 20Oponte muyotet kule ye kopunu wulo omite akwek, mosiconyorwok kupuryo kot oyiye kuyu wule omoktoy ani, oŋnkokäs akwek kule puryo kot ayiye ani kuyu wule omoktoy akwek. Oponte Muyotet kule mosonyoru wokutyet oko corokyinotet, nyerunotet, soynonet, cupisyet, ŋomset, silotet, oko cukurotet. 21Oponte muyotet kule ye kaco yec mosukusorneno Yiyintet nyimwani om tayta nyimwakwek, kunyo mosarir ani om wule mite piko ce caŋ ce kikwiy miyotyet ce tompo kot kurenynkey om ŋalek ce somis ce kikwiy cepo sakwayanatet oko corokyinotet nye miyat.

will be added

X\