2 Corinthians 11

1Osome ani kule omuytoco kuminiŋ, nka kot kaperperitu kutya. 2Acorokyok ani akwek, kuyu wulo corokyok Yiyintet. Akerkeyekey akwek cepto nye mukul nye menket moron nye kyomokyi cito ake, cito nyoto ku Kristo. 3Ntene oponte muyotet kule muce kuwuryo kasoteywek okoy otay nyimwoŋ nyepo manta nyepo Kristo kuyu wulo kiperpertoy Erenet Kawa kwiyisye mwiynanet nyewo nyepo ŋomnon. 4Omnye omuci akwek omuytoci kot olimnci ci ake tokol nye kocomwowok Yesu ake yec, nye puryo kot ku Yesu nyo kicemwowok acek oŋnkocäm yec lokoywek oko ototoywek alak nye puryo kot ku Muyet Nyetilil oko lokoywek ce toponec co kyonyorte wule cemite acek. 5Osoti kule puryo kot oyiku nye miniŋ koromun om wule mite co cekure “Kiyokik cewoyec.’’ 6Pesyet ake moyiku muswokin om ŋalalet, ntene oponte ŋomnonet nye oŋnketi kiy ake tokol. Kicemwowok acek akwek ŋalecoto tokol, oko om aret ake tokol nye mukoktos. 7Kyomwowok lokoywek ce toponec cepo Yiyintet, nye kipuryo kot osomok kule ayal okonu kiy ake tokol. Kyosutok opoyitu akwek tayta opoyitu ani letut. Kyayiy yoto so miyat? 8Kyanyapan so pesanik cepo pikap Yiyintet cepo wulyo ake omnye kyacäm kokolyoyisyet nyimwa, yo kyoyiyisyi om wule omite akwek? 9Nteye kyomite wule omite akwek, kipuryo kot ayimak ani kule akalya ye kyomöce pesanik, omnye kisutwo ani mpo yeya cepo Meketoniya kiy ake tokol nye kyomöce. Kuyu wulo kiyunto yoto om kunyo, kuyunyoto wule mosukwiytakey om pesyosyek cokwoni, puryo omuci ani kot okonok akwek nyikisin. 10Owolikey cepo manta om Kristo nye mitowune wule omite kule, puryo kot kusise silotet nye oponte ani om koretap Akaya tokol kumukul. 11Omne somwowu ani kuyinyi? Omnye mocömok ra? Nkete Yiyintet kule ocömok ani! 12Mosotosyikey ani ayiye ŋalek cu amite ayiye yawut, sukuŋet mente kunyor kiyokik cut alake kito nye mokusilekey kumwoy kule yiyisyi cekto kuyu wulo kyiyisyi acek. 13Puryo kot ku kiyokik co cepo manta, po mwiynan, perperisyi om yisyet nyimwa oŋnkuweckey kule ciku kiyokikap Kristo. 14Kunyo puryo kot cimuce cikite! Nka mpo Setanit komuce kuweckey nkit kukerkeyit oko malayket nyepo lakweyet! 15Kunyo puryo kot ku ŋolyo nye cikite ye keporkey mutworikyi kwiye cepo manta cepo lakweyet. Mosukunyor om letut ce yeme om tukuk ce kikwiy. 16Kotosyi omwowok kule, mente kot kusot citake kule oyiku ani solwo. Ntene ye osote kuyunyoto, kuroke osuto kule oyuye nyoto, sukuŋet osilkey silotet nyenyu nye miniŋ. 17Manta kule ŋalek cu omwowu yawut kuce munomwowo Mokoryontet kule omwowu. Oŋololi kuyu solwo om ŋolyontoni po silotet. 18Ntene omnye mite piko ce caŋ ce silekey cepo koret, kunyo mosilekey mpo ani kuyunyoto. 19Oyiku akwek ŋerekotin kot omuytoci piko ce perper! Oyiku ŋomec koromun! 20Omnye omuytocini ye kakwiyak citake oyiku mutwor, mpo ye koŋomok, mpo ye katëcak, mpo ye kanyilak, mpo ye kasyecak. 21Osornene ye macämnte kule, kiciku nyokorec ye mokyiy tukucoto. Ntene ye möce citake kule osilkey om kiy ake tokol - Oŋololi kuyu solwo - Osilekey mpo ani. 22Puraniyek so cekto? Oyiku mpo ani. Lekokap Israel so cekto? Oyiku mpo ani. Mucokoronikap Apram so cekto? Oyiku mpo ani. 23Mutworikap Kristo so cekto? Oyiku mpo ani. Oŋololi ŋalecu kuyu punmetyo. Oyiku mutworin nyepo Kristo kupël cekto. Kyataŋany om yisyet nye wuyi, kicerotyo mopusi kuwany pesyosyek ce caŋ, kicepasa aret ce caŋ, kyacilile met aret ce caŋ. 24Kipasa Yutayek aret mut korokonik sosom ok sokol. 25Kipasa Romek aret somok. Kicewirena rwontok aret akenke. Kipuryet rapet nye kyowete aret somok. Kyopur peko orit awany sawanik tiptem ok amwan pet oko komoy. 26Ye kyowesetoti ani poninek ce caŋ kyonyoru yoto toŋoŋutek cepo oyinosyek ce keyin, oko corik, oko toŋoŋutek ce kitaŋanya mpo yeya Yutayek oko lamek. Kyonyoru toŋoŋutek om moŋosyek, oko toŋoŋutek cepo tyoŋik cepo samiyita, oko toŋoŋutek cepo ruretok, oko toŋoŋutek cepo coronutek cepo mwiynan. 27Kyoyiyisye ataŋany, opuri pesyosyek alak nye puryo kot orwe rwonto. Kikwama rupet oko melelya. Kyopur pesyosyek alak nye moponte omik ce oyome, oko koto nye ominye, oko sirok ce malac. 28Kunyo puryo kot omwowu ani ŋalek tokol. Oponte pesyosyek tokol nyikisinto nyimwani nyepo yisyet nye nöme pikap Yiyintet. 29Ye puryo kot kuponto citake swamet, opur ani nye moponte swamet, ye kesuci citake miyotyet, opur mpo ani kwapi. 30Ye kosilkey ani, mosilkey om ŋalek ce poru kule moponte ani swamet koromun. 31Kopurto kupeyok okokoy kaynetap Yiyintet nye kwanitap Mokoryontet Yesu! Nye nkete kule puryo kot operperisyi ani. 32Ye kyomite Tamasko, yoto kumwoci kinko Areta poytoyintet kukoci sikarek kurip kurkotik cepo moŋet sukunäma ani. 33Ntene ciwuteno cikaput nyewo oŋnkyipunteno pastit om totetap moŋet okoy omweye wule mite neto.

will be added

X\