1 Osomok ani Paulo nkit, om kokolyoyisyet oko tolosyetap Kristo. Ani nyo cemwowu kule oyiku tala ye cepontekey oko akwek, ntene oyiku nyeker om wule omite akwek ye mocepontekey. 2 Osomok akwek kule ye cepontekey oko akwek monte cesutwo anyekeritu om wule mite piko co sote kule kyiyisyi acek cerupe cepo koret. 3 Manta kule cemite acek koret, ntene puryo ceporye kyiyisye cepo koret. 4 Karik ce kyiyisye om poryet kuce puryo kot kupo koret, ntene kyiyisye karikap Yiyintet cepo swamet ce turpupe totet tokol nye wuyi. Kyorontoy tintenotet nyepo mwiynan. 5 Citurpupi ŋolyo ake tokol nyepo silot nye kacemwoy cekerekte ŋomnonet nyepo Yiyintet. Cenome ŋolyo kwek mopusyo oŋnkyewec kuywey Kristo. 6 Ye kopurukey akwek kule kocepoyitu manta, yoto kuye moceyiytekey acek cemutyi musankut piko co mocömisyi. 7 Oköse akwek tukuk kuyu wule yunto wulo po saŋ. Mite pa citake wule omite akwek nye nkete kule oyiku citap Kristo? Kunyo möce kukäskey wule yunto neto nkit, omnye cepoye mpo acek Kristo kuyu neto. 8 Omnye puryo kot oliloni ani nka kyosilikey wokusirto om kamukeywek ce kikonec acek Kristo. Kamukeywek coto kuce cetecenok, ntene puryo kot kuce citurpupenok. 9 Mömöce ani akerkeyitu nye osyeme kule omuyok akwek om poronokwani. 10 Omnye mosukumwoy citake kule, “Koromec koromun oŋnkuponto swamet poronokap Paulo, oŋnkurok yec ku moponto neto swama ye cepontekey oko neto, oŋnkupuryo kiy ŋalekyi!’’ 11 Möce konket nyoto kule puryo kot kupciyotin ŋalek ce cesile acek om poronokyo ye mocepontekey oko ŋalek ce kyiye ye cepontekey oko akwek. 12 Ntene puryo kot kuroke cesutkey acek nkit nto ciyoyeckey acek nkit oko piko co sutekey parak. Perper coto koromun. Kiwecekey oŋnkuyoyeckey picoto kwicek nkit oŋnkusutekey parak kuyoyeckey kopurto nye nyimwa nkit! 13 Ntene acek kuce puryo kot cemöce kusirte silotet nyenyo ye cemokyini, mosukuŋete pate wule tento yisyet nye kikonec Yiyintet. Yisyet nyinyacek nyoto kunye kiciy om wule omite akwek. 14 Acek kuce kicenyosye cesutwok akwek lokoywek ce toponec cepo Kristo kutompo kot kuco citake, kunyo ye kocesilkey acek om wule omite akwek; kupuryo kot kocesirte kukeyte ye cemokyini. 15 Kunyo puryo kot cesilekey yisyet nye kikwiy piko alake kusirte ye ŋete nye kikonec Yiyintet. Ntene ce möce kule kuner kutosyikey koyenet nyimwoŋ, sukuŋet cimuc kot kyiy yisyet nyewo om wule omite, nto yisyet nyoto kunye ŋete ye kimwoy Yiyintet. 16 Yoto kuye sukuŋet cimuc acek cemwayte lokoywek ce toponec om korosyek alak kukeyte wulo omite akwek nye puryo kot cesilekey yisyet nye kikwiy citake keny om komosta nyenyi. 17 Ntene kuyu wulo mwowu silutekap Yiyintet kule, “Ci tokol nye möce kule osilkey kuroke kusilkey om yisyet nye kikwiy Mokoryontet.’’ 18 Omnye poyitu cito manta ye kacämnta Yiyintet neto, ntene puryo kot kuye kosilkey neto kwine nkit.
