1 Cone parwani wule omite ani Paulo nye kiyokintetap Yesu Kristo om cömisyetap Yiyintet oŋnkucone wule mite yeyanyo Timosewo. Cesilyini pikap Yiyintet cepo Korinso oko pikap Yiyintet tokol cepo Akaya. 2 Kante kukonok Yiyintet Papanyo oko Mokoryontet Yesu Kristo poypoyet oko kalyet. 3 Cikasta Yiyintet kwanitap Mokoryontenyo Yesu Kristo. Papa nyoto nyepo poypoyet oŋnku nye konu kokolyoyisyet tokol! 4 Kolyec acek neto wuyinwek tokol, sukuŋet cimuc cikalye piko co ponto wuyinwek wok tokol, ciyisye kokolyoyisyet nye kerkey nyo kicenyoru kucone wule mite Yiyintet. 5 Omnye kuyu wulo ceponte toŋoŋutek cecaŋ ce kerkey oko cepo Kristo, kuyunyoto cenyoru mpo kokolyoyisyet nyewo kupunte wule mite Kristo. 6 Ye kacetaŋany acek, kukacetaŋany kupo kokolyoyisyemwoŋ oko kosopet, nteye kacikalyak mpo akwek mosicikalyak oŋnkyekonok swamet omuytoci toŋoŋutek ce kerkey ce cemuytocini acek. 7 Kunyo mocewewecikey kenyis kokenotet nye ceponte acek om wule omite akwek. Cinket kule kuyu wulo onyoru mpo akwek toŋoŋutek ce kerkey cicacek, kunyo mosonyoru mpo akwek kakalyayet nye cenyoru acek. 8 Mpo yeya, ce möce kule oŋnket akwek wuyinto nye kicenyoru acek om Asia. Kicenyoru wuyinto nyewo nye nyikisit koromun okoy cemwowu kule komo cesoptosi. 9 Kicisot yoto kule kacemutwec musankut nyepo met. Ntene kikwiyakay kuyunyoto sukuŋet komo cikenekey swamet nyinyacek nkit, ntene cikenekey Yiyintet nyo ŋete piko kotutune met. 10 Kisorwec Yiyintet om met nye miyat nye yunyoto, kunyo kicikenekey kule mosukusorwec yec. 11 Kunyo ye kokalyec acek akwek osomwec, yoto kuye mosukupunto somset nyepo piko ce caŋ wule mite Yiyintet om poypoyenyi nkit. 12 Ŋolyontet nye cesilekey acek kunyi, porwec kasoteywekyacek kopurto wule kicipurte acek om koroni, nto kupëlis om wule omite akwek. Kicipurte kopurto nye toku nyepo manta nyetilil, nyoto kunye kopurto nye konu Yiyintet om poypoyenyi nye puryo kot ku ŋomnon nyepo cito. 13 Omnye cesilwok acek pate ŋalek ce omuci asuman oŋnkonket. Asoti ani kule mosonket akwek topon. 14 Ŋalek ce oŋnketi akwek yawut kererya kuce mosonket coto om pesyetap Mokoryontet Yesu, oŋnkyinket kule oponte akwek ŋolyontet nye osilekey om wule ce mite acek kuyu wule cesilekey mpo acek om wule omite akwek. 15 Kyonket ani topon ŋalecutecu saŋet ayiytekey orutocok akwek nyepo tayta sukuŋet onyoru kupeyok aret oyeny. 16 Omnye kyayiytekey yoto kule orutocok akwek om poninekyu cepo Meketoniya oko yec ye owecekey saŋet anyoru kakalyayet nyimwakwek om poninekwani ye oweti Yuteya. 17 Kyoteltelen ani so yoto ye kyoyiytoy coto? Ye oyiytoykey ani so oyiytoykey kuyu cito nyepo koret? Nye muce omwowu kule “Yunyoto, Nto moyunyoto, om yoto pakenke?’’ 18 Yiyintet kunye po manta! Kurtoyemwani om wule omite akwek kipuryo kot kule. “Yunyoto,’’ nto “Moyunyoto.’’ 19 Omnye Yesu Kristo Weritap Yiyintet, nyo kimwowok Silwano oko Timosewo oŋnkomwowok ani kunye kipuryo kot ku kule, “Yunyoto,’’ nto “Puryo’’ Ntene om wule mite neto ku kule, “Yunyoto.’’ 20 Omnye kupunte wule mite neto kuye koyitita Yiyintet kurtoyet nyenyi tokol. Kunyo sukuŋet cemwowu acek kule “Yunyoto’’ Kupunte wule mite neto cikaste Yiyintet. 21 Omnye Yiyintet kunye kwile soponto nyinyacek oko nyimwakwek om wule mite Kristo. Yiyintet nkit kunye kiŋapec kukweyec acek. 22 Neto kunye kiŋapenec pelutyet nyenyi oŋnkukoci Muyet Nyetilil mukuleywekyacek kwek kwilatet nyepo tukuk ceponto neto ce cicacek. 23 Yiyintet nye muncururwet nyimwani. Nkete mukuleyto nyimwani! Kipuryo kot aco ani Korinso omnye kyakalyak akwek. 24 Puryo kot cesyeme acek kule cekerak koŋ om ŋalek ce mocäm, omnye oponte koyenet nye kwilat, ntene ciku piko ce kiciyisyi tokol kupo ŋerekwek cikwakwek.
