1 Timothy 6

1Misyini mutworik tokol kukäs kule roke kuywey mokorenik cikwa, sukuŋet komo kuŋolole ci ake tokol kwapi kaynetap Yiyintet oko konetisyet nyinyacek. 2Mutworik co kikoyen mokorenik cikwa kuce puryo kot kuroke kunyilsyo meyweyis kumwoy kule omnye mpo yeya cut, ntene möce kwiyis kunyol topon, omnye mokorenik co mokunyor latik om yisyet nye yiye cekto kuce mpo yeya mpecek ce cöme cekto. Misyini net ŋalale yisyonutekyu. 3Ci ake tokol nye nete konetisyet ake tokol nye pciyat oŋnkupuryo kot kucöme ŋalek cepo Mokoryontenyo Yesu Kristo oko konetisyet nyepo tininyo. 4Kunye ponto cito nyoto silotet nyewo koromun, oŋnkupuryo kot konket kiy. Ponto corokyinotet nye miyat nyepo tintenotet oko wokutyet nye nöme ŋalek pate. Kunyo sutu ŋaleca corokyinotet oko wokutyet oko ŋomset oko kasoteywek ce miyotec; 5oko tintenotet nyepo okokoy nye moponto ye ŋete nyo cone wule mite piko co kowuryo kasoteywek cikwa, ce kimokuponto ŋalek cepo manta. Sote cekto kule tinit kunye aret nye cenyorune mokoryontit. 6Kupoyit manta, sutyini tinit cito kwek mokoryo koromun, ye kayem neto tukuk ce ponto. 7Omnye kipuryo kot cekwante acek kiy koret, kunyo puryo kot cepetoy kitake! 8Ye ceponte omik oko sirok kuroke kuyemec coto. 9Ntene piko co möce kule ce mekoren kuce sucini syemutok oŋnkunäm musatit nyepo cerokyinotet nye miyat nyepo perperyet ce cute cekto okoy kupa wule mite arantayet. 10Omnye corokyinotet nyepo pesan ku wule lukune miyotyonik cepo wok tokol. Kusyem piko alake kule cenyoru pesanik okoy kumosokis om aret nyepo koyenet, kunyo kokowurta cek mukuleywekwa om kasoteywekwa ce caŋ ce miyotec. 11Ntene nyi nyo yiku citap Yiyintet, kunye möce ripkey om wule mite ŋalecato tokol, syem tyikyi pate toponiyet, poyitu Yiyintet, nye ponte koyenet oko cömisyet oko muytocinotet oko sikenotet. 12Syem porye poryet nye topon nyepo koyenet, rip kwil koromun soponto nye mopoku nyo kicekurciŋ yo kiwolikey renynkey om tayatap piko ce caŋ. 13Komwowuŋ om tayatap Yiyintet nyo kocini tukuk tokol soponto, oko taytap Yesu Kristo nyo kiwalkey kupor topon koyenenyi om taytap Pontio Pilato kule, 14Ywey ntarastinek, oŋnkirip tililitu om koyenet nye meponte lelis, okoy Pesyet nye cone Mokoryontet Yesu Kristo. 15Mosukupor Yiyintet yec Yesu Kristo om pesyenyi nyepo manta. Yiyintet nyoto kunye cikostoy oŋnku poytoyintet nkit, nyepo kinkonik, oŋnku poytoyintet nyepo mokorenik. 16Neto nkit kunye sopot okokoy, mitowune wule mite lakweyet nye puryo kot kurice ci ake tokol. Puryo ci kenyis nye kikäs neto. Kopurune wule mite neto koyweyisyet ake poytoyisyet nyewo okokoy oko okokoy. Yunyoto. 17Mwoci sowu piko co mokoren ce ponto tukuk cepo koret mente kusilkey, mente kukenekey tukuk cepo mokoryontinek, ntene kukenekey Yiyintet nyo konec acek tukuk tokol sukuŋet kuŋerecec. 18Mwoci kwiy ŋalek ce toponec, oŋnkumokoren kwiy yisyet nye topon, oŋnkwicin topon oko piko alak tokol. 19Om aret nye yunyoto kuye sukuŋet kukonore torot mokoryontit nye kwilat nyepo pesyosyek cepo tay oŋnkomuc kunyor soponto nyepo manta nye cemöce. 20Arenyo Timosewo, rip kiy ake tokol nye kicekoniŋ. Ripkey ŋalalet nye puryo kot kupo Yiyintet oko tintenotet nyepo mwiynanet nye kure piko alake kule ŋomnon. 21Sutekey piko alake kule ceponte, kunyo kupotyi picoto aret nyepo koyenet. Opurte akwek tokol poypoyet.

will be added

X\