1 Timothy 5

1Mente kot polyi poyo nyewo, ntene ŋolyolyi kuyu Papaŋuŋ. Sute oyiperik oyoyecine kuyu mpo yeyeŋuŋ. 2Sute cepyosok cewoyec kuyu mpo komet, sut tipik kuyu mpo cekwomet om mukuleyto nye tilil. 3Ywey koruk co musukik, coto kuce musukik cepo manta. 4Ye ponto korko nye musuk lekok nto mucokoronikyi, kumoce kunetkey kunyo kunket yisyonutek cepo tinimwa om wule mite mpo kwan oko mpo kamet. Om aret nye yunyitenyi kuye kwici cekto yisyet mpo kwan oko mpo kamet oko mpo kukomwa oko mpo kokomwa. Omnye ŋalek ceyucoto kuce ŋerece Yiyintet. 5Korko nye musuk nyepo manta kunye moponto ci nye kolyoy, nye kikokenekey oŋnkutosyinikey kusome Yiyintet kokolyoyisyet pet oko komoy. 6Ntene korko nye musuk nye weti wule mite ŋerekwek kunye kime nyo kusope. 7Möce koci cekto ntarastini, sukuŋet komo kuponto lelis. 8Ntene ye puryo kot kuripe cito piko tilyonutekyi, nto nye puryo kot kuripe piko cepo kanyi, kuporukey kule katay cito nyoto koyenet oŋnkowurta cito nyoto kusir cito nye puryo kot kuyen. 9Mente osil kaynetap musuk korko nye tokuminiŋ okoy ye kiyosit nye ponto kenyisyek tomonwokik lö, oŋnku nye kikomüt santet akenke pate. 10Misyini ku musuk nye kiciyweye om yisyonutekyi ce toponec, nye kinet lekokyi topon, nye kitoroce toyek, nye kiwune kerenkokap pikap Yiyintet, nye kikolyoy ce ponto wuyinwek, oŋnkunye kikokoytokey kwiye yisyonutek tokol ce toponec. 11Mente osil koynokap koruk musukik ce tokuminkec, omnye ye kotepe kot kucorok porwonik cikwa kumac kule cimütec yec, yoto kuye kwasta nye komo kurupe Kristo, 12kuye kalel kwiri kawalemwa nye kipo tay om wule mite Kristo. 13Ŋalek alak kucu kule, netekey cekto kupuren kowurta poroyinwek cikwa, kupesetoti kupunte korin kuŋololote ŋomso pate, oko ŋalek cepo porwonik cikwa, oŋnkuŋalale ŋalek ce meroke kuŋalale. 14Amöce ani kule cimüt koruk musukik ce tokuminkec, sukuyi lekok oŋnkurip korikwa, sukuŋet mente kukoci punikyacek poroyinto kot kuŋalalenec kwapi. 15Omnye kuweckey keny musukik alake oŋnkurup Setanit. 16Ntene ye ponto korket nye kikoyen koruk ce musukik ce tilyonutekyi ce mite konyi, kuroke kurip neto cekto, puryo kot kuroke kwosyi nyikisinto pikap Yiyintet, sukuŋet co kurip musukik ce mite kwicek nkit ce moponto ci nye mokurip. 17Misyini poyik co yiye yisyet nye topon kuyu poyik kunyor musyaret aret oyeny, nto kupëlis poyik ce titire kumwoytoti lokoywek oŋnkunetis. 18Omnye mwowu silutekap Yiyintet “Mente arat yeyito kutit ye mite kuwore nkanuk’’. Oŋnkumwoy yec kule, “Misyini cito nye yiyisyi kunyor musyaret.’’ 19Mente kot acäm lelis nye nöme pontet ake tokol okoy ye komwoy piko ayenku nto somok kule lelat. 20Polyi reny piko tokol ce yiye miyotyet om taytap piko tokol sukuŋet kunyokoritu piko cut alake. 21Komwowuŋ oyomiseniŋ om taytap Yiyintet oko Yesu Kristo oko Malaykanik ce tililec kule, misyini rip ntarastinecu nye puryo kot yele kereryantet ake, ntene yiye yoyeci pate. 22Mente kot osorci lakwar kot kemer ci ake tokol yewuniyekuk kupo yisyetap Yiyintet. Mente kot wutekey miyotyonik cepo piko alak, ripkey tililitu. 23Mente taye peko nkit, ntene iye nfinyonik tukusic sukuŋet kukalyiŋ moyet oko porto nye mnyoni kwak okokoy. 24Toku nye cimuce cekäs topon miyotyonik cepo piko alak, kunyo sute miyotyonicoto cekto wule mite musankut, ntene mosukutok cekäs miyotyonik cepo piko alak om letut. 25Om aret nye yunyoto kuye ceköse kutok topon yisyonutek ce toponec, nka kot mpo ce puryo kot kutoku topon, kupuryo kot kuwuŋotos.

will be added

X\