1 Timothy 4

1Mwowu Muyet Nyetilil kutok topon kule, om pesyosyek ce kwoni, mosukuwirta piko alake koyenet, mosukucäm oyik cepo mwiynanet ake konetisyet nyepo oyik ce miyotec. 2Konetisyet nyoto kunye cone wule mite piko ce mwiynot ce perperisyi. Piko coto kuce kipok kasoteywek cikwa kuyunye kicepele karin nye layat. 3Netisyi pico kumwoy kule puryo kot kuroke cimütis koruk, nto kule kyam omik alak, oŋnkurok yec kitany Yiyintet omicoto kule sukuŋet kyome om letut ye kacesomnci kukostoyis piko co kikoyen, oŋnkunket cepo manta. 4Omnye topon kiy ake tokol nye kitany Yiyintet, momite kiy nye roke cetay, ye kacesomnci kupeyok oŋnkyam om kakastayet. 5Omnye ŋolyontetap Yiyintet oko ŋalek ce kocesomncine kuce wece kutililit kiyoto. 6Ye kenet nyi ŋalecu mpo yeya, kuye meseyeku kiyokintetap Yesu Kristo nye topon, oŋnku yoto ye poyekey nyi nkit ŋalek cepo koyenet oko konetisyet nyepo manta nyo kwerip nyito. 7Möce tay sanekey wule mite piko co menket Yiyintet, oko tyonkocok cepo perperyo co puryo kot kurok ceŋalale. Tosyikey nkit netkey soponto nyepo Yiyintet. 8Omnye ponto latik alak ye kacerip porto, ntene kuponto latik ce caŋ ye kocerip tinit nyepo manta, omnye kurtoy coto soponto nyepo pesyosyecu oko soponto nye mosukuco letut. 9Po manta ŋolyontono, nye roke cecäm kupoyit manta. 10Kuyunyoto omne sukuŋet cetitir acek kyiyisye swamet, omnye kicikenekey Yiyintet nye sopot nye kosopintet nyepo piko tokol co kikoyen. 11Polyi oŋnkinet ŋalecu. 12Mente ayaste kot kunyiliŋ ci ake tokol omnye teyiku miniŋ, ntene porci piko co kikoyen kukäseniŋ om ŋalalet nyeŋuŋ oko kopurto nyeŋuŋ, oko cömisyet nyeŋuŋ, oko koyenet nyeŋuŋ oko om tililinto nyeŋuŋ. 13Möce syem koromun weti sumanet nyepo piko tokol nyo cesumone silutekap Yiyintet, oko mwaytayet nyepo lokoywek oko konetisyet okoy opunu ani. 14Mente kot ayaste kupeyok co ponte nyi co kicekoniŋ ye kiŋolole workoyik oŋnkukemeriŋ poyik yewuniyekwa. 15Möce yeyisye yisyonutek cutecu oŋnkikwilakisye nyi nkit sukuŋet kukäs ci tokol yisyet nyeŋuŋ nye tosyinikey. 16Ripkey nyi nkit oŋnkirip konetisyet nyeŋuŋ. Tosyikey iyiy ŋalecutecu, omnye ye keyiy, mesesopkey nyi nkit oko piko co lime ŋalekuk.

will be added

X\