1 Timothy 3

1Ŋolyontet nyepo manta kunyi kule, ye kamac cito kule oyiku kantoyintet kosintet nyepo pikap Yiyintet, kukamac yisyet nyetilil nye topon. 2Misyini Kantoyintet kosintet nyepo pikap Yiyintet kwek cito nye moponto lelis, Misyini kuponto korket akenke, oŋnku cito nye paypay nye ripekey, oŋnkuponto tolosyet. Misyini kutoroce kuŋerekyini toyek ce mocinket kukwa kanyi, oŋnkuponto ŋomnonet nye muce kunetis. 3Puryo kot kuroke kwek pokityo, nto pororin, ntene ci nye siken oŋnkuponto tolosyet nye puryo kot kucorokyini pesan. 4Misyini kwek cito nye muce kurip topon piko cepo kanyi oŋnkunet lekokyi kuyweyis om aret ake tokol. 5Omnye ye puryo kot konket cito kurip piko cepo kanyi nkit, komuce kulene kot kurip piko cepo Yiyintet? 6Puryo kot kumisyini kwek ci nye kotokowute koyenet. Omnye muce kusilekey kusutkey torot okoy kosuci cemutyi musankut kuyu wulo kicemutyini setani nyewo nyepo oyik. 7Misyini kwek ci nye yweye piko tokol cepo saŋ. Sukuŋet mente kot cenyil oŋnkosuci musatit nyepo setani nyewo nyepo oyik. 8Piko ce yiyisyi kukolyoy pikap Yiyintet kuce misyini kwek piko ce ponto kopurto nyepo soponto nye topon nyepo manta ce cikenekey. Puryo kot kumisyini kuye komek ce caŋ, nto moroŋis cepo pesan. 9Misyini kukwil cekto topon koyenet nyepo manta nye kicipor oŋnkuponto ŋomnonet nye toku. 10Misyini cenyosye cesyem cekto kunyo, nteye kacekäs kule yeme, yoto kuye cikoci kwiyis. 11Misyini kuponto mpo korukwa kopurto nyepo soponto nye topon om koyenet om kiy ake tokol. 12Misyini kuponto kokolyoyintet korket akenke, oŋnkomuce kurip lekokyi oko piko cepo kanyi. 13Omnye piko co yiye topon yisyet nyepo kokolyoyisyet kuce muce cekto nkit kunyor cinket topon, oŋnkomuc kuŋalale om nyikanat ŋalek ce nöme koyenet nyimwa nye ponto om wule mite Yesu Kristo. 14Ye amite osiluŋ ani parwani, asoti kule mosaco lakwar okoy cakäsiŋ. 15Ntene ye kotepe kot olilennkey, mosukumwowuŋ parwani wule misyini cipurte acek nkit piko cepo kaytap Yiyintet, coto kuce pikap Yiyintet nye sopot oŋnku tolocta nye tiye ŋalek cepo manta. 16Puryo ci nye muce kutay kule woyec koromun ŋalek ce wuŋotin cepo tininyo ce mwowu kule: “Kicipor neto kuponto porto nyepo cito, Kipor Muyet Nyetilil kule po manta neto. Kikäs malaykanik neto, Kicemwayte ŋalekyi wule mite piko cepo yemosyek tokol, Kiciyen neto om koret tokol, kunyo, kicesut kuwo torot om woyinto.’’

will be added

X\