1 Timothy 2

1Kunyo ŋolyontet nyepo tayta; asome kule, somet oko kakastayet kuce möce osome okostoy Yiyintet kupo piko tokol. 2Osomnci kinkonik oko poytoyik ce ponto kamukeywek, sukuŋet cipurte soponto nye topon, nye paypay, nyepo kalyet, nye ciyweye Yiyintet, oŋnkyeripkey om kiy ake tokol. 3Topon koromun ye kaciy kuyunyoto omnye ŋerece Yiyintet Kosopintenyo, 4nye möce kule cisop piko tokol oŋnkunket ŋalek tokol cepo manta. 5Omnye mite Yiyintet akenke oŋnku mite cito akenke nye yomntos Yiyintet oko piko, nyoto ku Yesu Kristo, 6nyo kikokoytokey kwolis sukusop piko tokol. Ŋolyontet nyoto kipor kupoyit manta om pesyet nyepo manta kule möce Yiyintet kule cisop piko tokol. 7Kuyunyoto sukuŋet cekweya ani oyiku kiyokintet oŋnkoyiku konetintet nyepo Lamek nye mwoytoy lokoywek cepo koyenet nyepo manta. Omwowu ŋalek cepo manta nye moperperisyi. 8Amöce ani kule kusome moronik om wulyo tokol, coto kuce kikokenekey Yiyintet kupoyit manta, oŋnkusome kuyitoy yewuniyekwa ce tililec nye puryo kot kuponto nerekwek nto mpo tintenotet. 9Amöce mpo kule kuŋomekitu koruk oŋnkulackey om aret nye topon. Puryo kot kuroke kulet koruk putek nto kukoci yitik Sapunek nto karik ce piciyec, nto kulac sirok cepo pesan ce caŋ. 10Ntene möce kwiye yisyet nye topon kuyu wule cemoktoy om wule mite koruk co yweye Yiyintet. 11Misyini kunetkey koruk om sisyot oŋnkuyweyis om kiy ake tokol. 12Puryo kot acömncini ani kunetis koruk nto mpo kule kupayta moronik. Misyini kusistos. 13Omnye kicenyosyo citany Atam nto cikere Awa. 14Ntene korket kunye kiciperper sukuŋet kwiri ntarastitap Yiyintet. Puryo kot ku Atam nye kiciperper sukuŋet kwiy miyotyet, ntene korket nye kiciperper sukuŋet kwiy miyotyet. 15Ntene mocisop korko omnye koyi lekok. Ye komuytoci kurip topon koyenet oko cömisyet oko tililinto, oŋnkuripkey.

will be added

X\