1 Timothy 1

1Cone parwani wule amite ani Paulo nye kiyokintetap Yesu Kristo om kamukeywekap Yiyintet Kosopintenyo, oko Yesu Kristo nye kokenotet nyinyacek. 2Osiluŋ Timosewo werimwani nyepo manta om koyenet. Kante kukoniŋ Yiyintet Papa oko Yesu Kristo Mokoryontenyo poypoyet oko cömisyet oko kalyet. 3Amöce ani kule ipur nyi Efeso kuyu wulo kikyosomiŋ yo kyonomeni aweti Meketoniya. Mite piko alake wuloto ce mite kunete konetisyet nyepo mwiynan, kunyo misyini mwoci kwasta lakwar. 4Mwoci picoto kwasta ŋalaletap tyonkocok oko koynok ce caŋ cepo mpo kuko ce moponto ye ŋete, omnye sutu ŋaleca tintenotet pate, ntene puryo kot kwiye yisyetap Yiyintet nye kiceyiyta, nyoto kukokenotet nye kicinket. 5Komwowu ani ŋalecu sukuŋet kuŋetŋet kutosyi cömisyet nye cone wule mite mukuleyto nyetilil oko konketotet nye toku oko koyenotet nyepo manta. 6Kupotyi piko alak aret om ŋalecu, kunyo kuwekyikey cekto aret nyepo ŋalalet nyepo perperyo. 7Möce kule ciku konetik cepo ntarastinekap Yiyintet, ntene oŋnkurok yec kupuryo kot konkete ŋalek cikwa nkit, oŋnkupuryo mpo kot kunkete tukuk ce ŋolole kuyunye nkete. 8Cinket acek kule toponec ntarastinek, ye kokyiyisye topon kuyu wule cemoktoy. 9Misyini cinket kule kipuryo kot cekon ntarastinek kupo piko ce toponec, ntene kicekon kupo piko ce yirye ntarastinek oko sokoranik oko co puryo kot konket Yiyintet, oko co ponto miyotyet, oko co puryo kot kuponto tini, oko co miyotec mukuleywekwa. Kicekon kupo piko co poköce mpo kwan nto mpo kamet, oko co porisyi, 10oko co ponto sakwayanatet, oko co ponto soponto nye miyat, oko co core piko, oko co mwiynec oŋnkuŋolole ŋalek cepo mwiynan nto mpo kwiy kiy ake nye monomekey oko konetisyet nyepo manta. 11Mitowune konetisyet wule mite lokoywek ce toponec ce kicekono, coto kuce lokoywek ce toponec ce kicekono ani, coto kuce lokoywek ce toponec cekwone wule mite nyewo oŋnku Yiyintet nyepo kupeyok. 12Okostoy ani Mokoryontet Yesu Kristo nye kikono swamet om yisyemwani. Okostoy omnye kisuto opoyitu latik okoy kukweya oyici yisyet, 13nka kot kyoŋolole kwapi oŋnkocup ani neto. Ntene kikalya Yiyintet omnye kipuryo kot oŋnketi ce kyoyiye yoto. 14Yoto kukono ani Yesu poypoyenyi nyewo oŋnkukono koyenet oko cömisyet nye ceponte acek om koyomotet oko Yesu Kristo. 15Ŋolyontet nyepo manta nye roke cetac oŋnkyiyen kupoyit manta kunyi kule! Kico Yesu Kristo koret cokusop piko ce ponto miyotyet. Ani akenke om cekto nye miyat kupëlis. 16Ŋolyontoni nye sukuŋet kukalya kurire ani Yiyintet, kumöce kule sukuŋet ayiku koporunotet nyepo tayta nyepo muytocinotet. Kimöce kule oyiku ani kantoyintet nye porcini piko co mokuyen om letut sukunyor cekto soponto nye mopoku. 17Om wule mite neto Kinko nye mopoku, nye puryo kot kume, nye puryo kot kutoku, nye Yiyintet akenke nkit, kunye roke kopurune koyweyisyet oko woyinto okokoy oko okokoy. Yunyoto. 18Lekwenyu Timosewo, kakoniŋ ntarastini, nömekey ŋalecu oko ŋorsyet nye kiceŋor keny nye nömiŋ nyi. Kunyo roke yiyisye ŋaleca kwek karik ce meporye poryet nye topon. 19Rip koyenet nyeŋuŋ oko kasoteywek ce toku topon. Kutay piko alake morip ŋalek cepo kasoteywek cikwa, kunyo kukwaranta koyenet nyimwa. 20Om picoto ku mpo Imenayo oko Alekisanta. Picoto kuce kwokoyte ani kupa wule mite Setanit sukuŋet wocinet kwasta komo kucupe cekto Yiyintet.

will be added

X\