1 Thessalonians 4

1Mpo yenya, ŋolyontet nyepo letut kunyi kule, oŋnket kucone wule cemite acek wule yunto kopurto nye misyini cipurte sukuŋet kuŋerec Yiyintet. Ntene kapurto nyoto kunyo oponte akwek. Cesomok acek yawut koromun om kaynetap Mokoryontenyo Yesu kule otosyikey ayiy kupëlis. 2Omnye oŋnket konetisyet nyepo ŋalek co kicinetak acek akwek om kamukeywekap Mokoryontet Yesu. 3Kito nye möce Yiyintet kunyi kule, otililitu nye puryo kot oponte sakwayanat mpo kisic. 4Möce ci ake tokol om akwek konket kule misyini komüt korket nyenyi om aret nye topon nyetilil, 5Nye puryo kot ku om aret nyepo corokyinotet nye miyat kuyu wulo yiytoy piko co puryo kot konket Yiyintet. 6Kunyo om ŋolyontoni, puryo kot kuroke kot kowurta nto mpo kot kumas citake yeyanyi. Kicemwowok acek ŋelyontoni ikye, kicisowok koromun kule mosukotaŋany Yiyintet piko ce yiye ŋalecutecu miyotec. 7Kipuryo kot kukurec acek Yiyintet kule sukuŋet cipurte yec soponto nyepo sakwayanatet, ntene möce kule cipurte soponto nyetilil. 8Kunyo ci ake tokol nye katay konetisyoni kunye kupryo kot kutay konetisyet nyepo cito, ntene kukatay cicoto Yiyintet nyo kikonok akwek Muyet Nyetilil. 9Puryo kot kuroke cesilwok ŋalek ce nöme cömisyet wule roke acämnte piko alak co kicömis. Kikonetak akwek Yiyintet wule roke acämntekey akwek kwakwek nkit. 10Kunyo kopurto nyeyunyoto omite akwek oporcini mpo yeya tokol cemite Meketoniya, kunye kopurto nyoto nye cesomok kule otosyikey kupëlis. 11Otosyikey opurte pate soponto nye topon oŋnkasot oyiyisye yewuniyek cikwok sukuŋet onyoru pesanik cepo omik ce oyome kuyu wulo kikicemwowok acek kunyo. 12Om aret nyeyunyitenyi kuye kuyweyak piko ce puryo kot kucömis. Puryo kot kuroke okenekey citake tokol om tukuk ce omöce. 13Mpo yeya, cemöce acek kule oŋnket akwek ŋalek cepo manta ce nöme piko co kipok, sukuŋet monte cemuye kuyu wulo yunto piko co puryo kot kuponto kokenotet. 14Cecöme kule kime Yesu oŋnkotutune met; kunyo ciyeni kule mosukoŋet Yiyintet kotutune met piko co kipok kuyene Yesu. 15Konetisyetap Mokoryontet nyitenyi cemwowok kule, acek co cesoptosi om posyonoto coni Mokoryontet kuce cepeti tay cintoci piko co kipok. 16Mosukuco polotet nye ŋetŋete piko. Nyoto kunye kutit nyepo malayket nyewo nyo kontitap Yiyintet. Mosukurek Mokoryontet nkit kucone torot kuco ŋony. Mosukunyosyo kuŋetyo kotutune met piko co kipok kukicäm Kristo. 17Yoto cirurucec acek piko co cesoptosi om pesyonoto oŋnkyepetekey cekto cetorokte Mokoryontet cetuye om polyet om wulin po parak, oŋnkyipur oko Mokoryontet okokoy. 18Kunyo aŋereckey otitirkey akwek kwakwek nkit oyiyisye ŋelacutecu.

will be added

X\