1 Thessalonians 2

1Mpo yeya, oŋnket akwek nkit kule kipuryo kot kupoyit püc pate rutoyenyacek yo kicekwoni wule omite akwek. 2Oŋnket kule kikicitaŋanyec acek kunyo oŋnkyecupec om Filipi kutompo cepunu wule omite akwek om Sesolonika. Ntene kutitirec Yiyintenyo okoy cemwowok lokoywek ce toponec cekwone wule mite neto, nka kot kimite piko ce caŋ ce kitoyisyi. 3Puryo kot kumasat konetisyet nye kicinetak acek akwek, nto mpo ku kule ponto kosotey ce miyotec, nto mpo kule cesyeme ciperper ci ake tokol. 4Ntene ce möce kule ceŋalal okokoy kuyu wule moktoy Yiyintet, omnye kikweyec oŋnkukonec lokoywek ce toponec. Puryo kot cesyeme kule ciŋerec piko, ntene ce möce kule ciŋerec Yiyintet nyo syeme mukuleywek cicacek. 5Oŋnket akwek kupoyit manta kule, kipuryo kot cekwa wule omite akwek cesutu ŋalek cepo kutit saŋ pate, puryo mpo kot ciyiyisye ŋalek ce kicewunye kule cemöce pesanik, Yiyintet nye nkete coto. 6Kipuryo kot cesyem kule cenyoru kakastayet nye cone wule mite ci ake tokol, kuyu nye cone wule omite akwek, nto mpo nye cone wule mite piko alake, 7Nka kot kicimuci acek cemakenak akwek tukuk alak kuyu kiyokik cepo Kristo. Ntene kicetoloyitu yo kicepontekey akwek kuyu yeyo nye ripe lekokyi. 8Kunyo kicecämak acek koromun, yoto okoy cekonok, puryo kot ku lokoywekap Yiyintet pate, ntene kicekonok mpo soponwek cicacek. 9Mpo yeya, möce asot kupoyit manta kuyu wulo kiciyisye acek cetitir! Kiciyisye pet oko komoy sukuŋet mente kot cesutyi nyikisin ci ake tokol om akwek, oŋnkurok yec cemwowok lokoywek ce toponec ce kwone wule mite Yiyintet. 10Akwek kuce oŋnketi ŋalecato oŋnkonket mpo Yiyintet nkit, kule kicipurte acek kapurto nyetilil nyepo manta nye kipuryo kot kupunto lelis om wule omite akwek co kyocömisye. 11Oŋnket wule kiceriptok acek akwek kuyu wulo riptoy kwan lekokyi. 12Kicititirok, oŋnkyipaypayak oŋnkyesomwok kule opurte soponto nye ŋerece Yiyintet nyo kikurok kwonyoru poytoyisyenyi oko wonyinto. 13Mite ŋolyontet ake nye cikostoy acek Yiyintet okokoy, nyoto kunyi kule, yo kiciporwok acek akwek ŋolyontetap Yiyintet, olim yoto oŋnkoyen nye puryo kuyu ŋolyo nyepo cito, ntene kuyu ŋolyontetap Yiyintet. Kunyo yunyoto kupoyit manta, omnye mite Yiyintet kwiyisyi om wule omite akwek co kyoyen. 14Nto akwek mpo yeya, kyotaŋany toŋoŋutek ce kerkey oko cepo pikap Yiyintet cepo Yuteya. Kuyu wule kitaŋany pikap koremwoŋ, kunyo kitaŋany mpecek Yutayek, 15co kipoköce Mokoryontet Yesu oŋnkupakäc workoyik oŋnkukwetec acek saŋ. Puryo kot kuŋerece piko coto Yiyintet, kunyo punik cekto cepo piko tokol. 16Omnye kusyem kule cekerktec mente cemwoci Lamek wule mocisopto. Miyotyet nyitenyi nye kinyit miyotyonik cikwa ce caŋ ce kikwiy cekto. Kunyo konyor cekto yawut om letut nerekwek cepo Yiyintet. 17Mpo yeya, yu kowo cepakaktak acek akwek kumuniŋ, kunyo nka kot puryo kot cekosekey om konyek, ntene kicepontekey oko akwek om kasoteywek, kicesyem koromun kule cekasenak yec konyek. 18Kicemöce kule ceketukey wule omite akwek. Kyasyem ani Paulo aret ce caŋ kule aco wule omite akwek, ntene kukurekta Setanit. 19Ntene akwek nkit, nye puryo kot ku piko alak, oyiku kokenotet nyinyacek. Kunyo om akwek nkit kuce cesilekey acek om taytap Mokoryontet Yesu Kristo ye kaco. 20Akwek kuce cesilekey oŋnkoyiku ŋerekwek cicacek cepo manta.

will be added

X\