1 Peter 5

1Osomwok akwek poyik cepo pikap Yiyintet ce mite wule omite akwek, oŋololi mpo ani kuyu Pontet. Kyakäs toŋoŋutek cepo Kristo, kunyo okeni kule mosonyoru woyinto nye mosiciŋoŋ. Osomwok kule, 2oyiku mesewek cepo kecirek cepo Yiyintet ce kicekonok orip. Orip topon kuyu wule moktowok Yiyintet, ntene nye puryo ku kule omnye omöce musyaret, ntene omnye omöce kule kyiy. 3Monte cepayte kwapi piko co kicekonok, ntene oporci kopurto nye topon nye kakäsenak. 4Nteye kopunto pesyet nye porukey kutok Mesewontet Nyewo, kuye sonyoru mpo akwek musyaret nyepo woyinto nye mopoku. 5Kunyo möce aywey mpo akwek, oyiperik poyik cikwok cewoyec. Möce alac akwek tokol siret nyepo tolosyet oŋnkokalyekey yisyonutek. Omnye mwowu silutekap Yiyintet kule, “Toye Yiyintet piko co silekey, ntene oŋnkukoci kupeyok piko co poypoyec.’’ 6Kunyo opoypoyitu oyem opurune yewutap Yiyintet nye ponto swamet, sukuŋet koŋetak oŋetye om pesyet nye kikwey neto. 7Ye osoti koromun, owirci kasoteywekwok coto oponte wule mite neto, omnye ripok. 8Okösu oŋnkoripkey! Mite puniyontet nyimwoŋ Setani nyewo nyepo oyik kuwesetoti kutule kuyu ŋetuny kuceŋoti cito nye möce kule atakum ayam. 9Okwilokisye om koyenet nyimwoŋ oŋnkotay oyinot cekwol yitik, omnye oŋnket kule mite mpo yeya mwoŋ alake om koret tokol ce mite kutoŋonye toŋoŋutek ce kerkey cikwok. 10Ntene om letut kuminiŋ ye kataŋany, mosikusatak Yiyintet nkit nyepo kupeyok tokol nyo kikurok akwek kwonyoru woyinto nye mopoku om koyomotet nye oponte oko Kristo, oŋnkukonok swamet oko kwilatet oŋnkotitirok. 11Kopurune swamet wule mite neto okokoy oko okokoy. Yunyoto. 12Kosilwok ani parwani nwac kusir wule mite Silifano yeya nye oŋnket oŋnkokenekey. Omöce ani kule akwilak akwek oŋnkomwowok ŋalek cikwani kule kokotutyetap Yiyintet nyitenyi nyepo manta. Okwilokisye koromun om ŋolyontoni. 13Kesupayak akwek pikap Yiyintet cepo Papulon ce kikwey Yiyintet mpecek kuyu akwek, oŋnkusupayak werimwani Marko. 14Asupaykey akwek nkit om ŋatutet nye poru cömisyet nyepo Kristayek. Kante kopurune kalyet tokol wule omite akwek co opoye Kristo.

will be added

X\