1 Peter 4

1Kitaŋany Kristo toŋoŋutek cepo porto, kunyo misyini otitir mpo akwek kuyunyoto oŋnkarup kosoteywekyi, omnye ye kataŋany cito om porto nyenyi, kuye yoto ye komokwiye miyotyet. 2Kunyo kuceke yawut kuwo tay, ye tomite koret misyini soponto nyimwoŋ kwek soponto nye poytoy Yiyintet nye puryo kot kupoytok corokyinotet nyepo porto nyepo cito. 3Kyawany akwek pesyos ce caŋ co kitil oyiye ŋalek co yiye piko co menket Yiyintet, kyopurtoy soponto nye kyoyiye sakwayanatet oko corokyinotet oko pokitet oko arosyek ce miyotec oko sokwonutek cepo pokitet oko sayet nye miyat nye osoye kerkeyik. 4Kunyo kukukite picoto yawut ye puryo kot kukosök akwek opontekey oko cekto om soponto nye miyat nyo yiye cek kucupok akwek. 5Ntene mosukuror kumwoy musankut nyepo ŋalek cikwa om taytap Yiyintet nye mosukumutyi musankut piko co kipok oko ce soptos. 6Kicemwoci lokoywek ce toponec piko co kipok sukuŋet kopur soponto nyimwa nyepo muyet kuyu wule moktoy Yiyintet, nka kot kicemutyi porwonikwa musankut kuyu piko tokol. 7Karik pesyet nye pekune tukuk tokol. Misyini oripkey akwek nkit oŋnkopoypoyitu sukuŋet omuc osome. 8Ntene kupëlis möce acämnkey owoŋnkyi akwek kwakwek nkit, omnye yene cömisyet miyotyonik ce caŋ. 9Atorockey akwek om korikwok nye puryo kot oŋunyŋunyi. 10Kikokoci Yiyintet ci ake tokol om akwek kokotutyet nyenyi nkit, kunyo möce oyiyisye okokoy kuyu ripikap tukuk ce toponec ce kikonok Yiyintet. 11Ye ponto ci tokol ŋolyo nye möce kule omwowu, kumisyini kuŋalal ŋolyontet nyepo Yiyintet. Nteye mite cito kukolyoyisyi, kumöce kwiyisye swamet nye kocini Yiyintet neto, sukuŋet cikasta Yiyintet om tukuk tokol kupunte wule mite Yesu Kristo nyo ponto woyinto oko swamet okokoy oko okokoy. Yunyonto. 12Coronutekwani, monte cikite mata nyepo mwoninto nyo otoŋonyi, kuyu nye mite kwiyoktos ŋolyo nye monket akwek. Yiyoktos ŋaleca kusyemak akwek. 13Ntene möce aŋerec omnye otoŋonyi toŋoŋutek ce kipo Kristo sukuŋet kuyemak ŋerekwek om pesyet nye ciporu woyinto nyenyi. 14Möce osutkey kule ceponte kupeyoy ye kacecupok omnye oyiku konomik cepo kristo. Omnye poru ŋalecato kule Muyet Nyetilil nyewo nyoto, kunye Muyet nyepo Yiyintet nye mitowune wule omite akwek. 15Puryo kot kuroke kutaŋany ci ake tokol om akwek omnye koporis nto omnye corin nto omnye sokoran, nto omnye wutekey ŋalek cepo piko alak. 16Ntene ye yiku Kristoyin oŋnkitaŋany mente alilan, kaste Yiyintet omnye ponte kaynetap Kristo. 17Kapunto pesyet kucec musankunek. Mosicenyosye cewosontyi piko cepo Yiyintet. Kunyo ye kacecenec acek, mosiciwaŋnta ra kulene om wule mite piko co puryo kot kucöme lokoywek ce toponec cepo Yiyintet. 18Kuyu wulo mwowu silutekap Yiyintet kule, “Korom koromun ye mosisop piko ce toponec, kunyo mosukwiyakay kulene om wule mite piko co menket Yiyintet, oko piko co ponto miyotyet?’’ 19Kunyo piko co toŋonye kuyu wule moktoy Yiyintet, kuce misyini kutosyikey kwiy ŋalek ce toponec oŋnkukenekey Kotoŋintemwa nyo yititoy kurtoyenyi.

will be added

X\