1 Peter 3

1Kunyo mpo akwek koruk möce aywey sanikwok. Nteye mite sanikwok alak ce puryo kot kucöme ŋolyontetap Yiyintet, kuye kucömis omnye kakäs cek kopurto nye topon nye oponte akwek. Puryo kot omuci akwek kot omwowu ŋolyo, 2omnye mosukukäs cekto wule yunto tililinto oko koyweyisyet nye oponte akwek. 3Puryo kot kuroke otase toponiyet nyimwoŋ tukuk ce ciloce, kuyu putek ce kacilet oko sonoyek oko raranik oko sirok. 4Möce kuporkey toponiyet kwine nkit om mukuleyto nye paypay nye cone soponto nyepo cito orit. Puryo kot kumite kito nye muce kot kowurta soponto nyoto, oŋnkuponto latik ce caŋ om taytap Yiyintet. 5Omnye kikwiy kuyunyoto koruk cepo keny ce kikoyen ce kikenekey Yiyintet. Kitililitu cek kuyunyoto kuywey sanikwa. 6Kiyunyoto Sara, omnye kiywey neto Apram omnye kikure, mokoryontenyu. Oyiku akwek yawut tipikyi ye kayiy ŋalek ce toponec nye puryo kot omuye kiy ake. 7Mpo akwek Moronik, mocë opurte poypoyet oko korukwok om soponto nyepo kamütisyet. Misyini oŋnket kule puryo kot kuponto cek swamet nye kerkey moronik. Kunyo misyini aywey omnye mosukunyor mpecek tokol kuyu akwek kokotutyet nyepo soponto nye konu Yiyintet. Ayiy kuyunyoto sukuŋet mente kot kukerekta kito ake somset nyimwoŋ. 8Ŋolyontet nyepo letut, möce kule oponte akwek tokol kasoteywek ce kerkey, acämnkey akwek nkit kuyu mpo yeya. Möce opoypoyitu akwek kwakwek nkit. 9Monte ceyokune miyotyet ake miyotyet ake, nto koyokune cupisyet ake. Ntene möce ayakte osomnci kupeyok, omnye kikurkyok Yiyintet kupeyok ye kikurok. 10Kuyu wulo mwowu silutekap Yiyintet kule, “Ye möce cito kule aŋerekyi soponto; oŋnkunyor soponto nye topon, kumöce kurip ŋelyepnyi maŋalal ŋolyo nye miyat, oŋnkuripkey maŋalal kutinyi mwiynan. 11Misyini kwasta kuwecekey wule mite miyotyet oŋnkwiy ce toponec, puryo kot kuroke kucas ye cenye kalyet. 12Omnye ripe Mokoryontet kuköse piko co toponec, Oŋnkulime somset nye some picoto, Ntene tukyini patay piko co yiye ce miyotec.’’ 13Ŋo nye muce kowurtak ye omöce akwek kule kyiy ŋalek ce toponec? 14Ntene nka mpo ye kotaŋany ye omite oyiye ŋalek cepo manta, kumöce aŋerec monte cemuye piko, monte cisot! 15Aywey Kristo om mukuleywekwok, oŋnkokoci kwek Mokoryontemwoŋ. Ayiytekey pesyosyek tokol sukuŋet owekyi ci tokol nye katepenak kule ororwo kokenotet nye oponte akwek. 16Ntene möce ayiy kuyunyoto om tolosyet oko koyweyisyet. Möce oponte ŋomnonet nye topon sukuŋet soponto nyimwoŋ nye oponte om Kristo kusutyi kolilonis piko co ŋololenok kwapi. 17Topon ye kacetaŋany ye kyiye ce toponec ye möce Yiyintet kule kwiyokis kuyunyoto, kusir ye kakyiy miyotyet. 18Omnye kime Kristo nkit kumeci miyotyonik cikwakwek aret akenke oŋnkuwany kupok. Kime cito nye topon kumeci piko ce miyotec, sukuŋet kuntowok akwek ape wule mite Yiyintet. Kicepakäc neto kume met nyepo porto, ntene kotutune met om Muyet. 19Kiwo muyenyi nye sopot wokuŋololyi oyik ce kimite mopusitap met. 20Oyik cutecu kupo piko co kipuryo kot kuywey Yiyintet ye kimuytocini neto om pesyosyek co kitece Nuwa rapet. Kisopce peko yoto piko ce ŋeri pate ce kipuntoy sisit ce kimite rapet. 21Poru pecu patisanet, nto patisanani kunye sopok akwek yawut. Kunyo puryo kot kunumu simnyontet nyepo porto, ntene sopok kurtoyet nye kacemwoy om wule mite Yiyintet kucone mukuleyto nye topon orit. Sopok patisanet kupunte kotutunetap met nyepo Yesu Kristo, 22nye kiwo torot, nye mite yawut kukepure yewutap tay nyepo Yiyintet kupoytoy malaykanik tokol oko kamukeywek oko swamet nyepo torot.

will be added

X\