1 Peter 2

1Kunyo awirte onumunekey akwek nkit miyotyonik tokol, oko mwiynanet, oko koperperisyet oko corokyinotet oko cupisyet. 2Kuyu lekoy ce rwerun ce möce ceko pate, kuyunyoto mpo akwek roke omäc ceko ce tililec cekwone torot, sukuŋet onerye oŋnkosopce. 3Kuyu wulo mwowu silutekap Yiyintet kule, “Kwacemcem akwek nkit tolosyetap Mokoryontet.’’ 4Kunyo akwa wule mite Mokoryontet nye rwantet nye sopot nye kitay piko kule puryo kot ku topon cetekse, ntene kikwey Yiyintet kule topon. 5Akwa akerkeyitu oko rwontok ce ponto soponto oŋnkokany cetektak cetekenak kayta nye tilil nyepo kotap Yiyintet, wule mosoyiyisye akwek kuyu tisik ce tililec cecöme Yiyintet. Punte korosecoto wule mite Yesu Kristo. 6Omnye mwowu silutekap Yiyintet kule, “Akäs mosokoci Siyon rwantet nye kweyan, rwantet nyoto kunye ponto latik koromun, puryo kot kolilone ci tokol nye kacäm neto. 7Ponto rwantani latik ce caŋ koromun om wule omite akwek piko co cömisyi; ntene om wule mite piko co puryo kot kucömisyi kucu kule, Rwantet nyo kitoye tekik kule puryo kot kuponto latik kunye kiweckey kwek rwantet nye pële tokol nye tiye koto tapan.’’ 8Mwowu silutekap Yiyintet yec kule, “Rwantanitenyi kunye noce piko koputis, Kitawet nye mosikonoc piko koputis.’’ Mosicinoc cekto omnye kipuryo kot kuyen ŋolyontet. Kicäm Yiyintet kule kopur cek kuyunyoto. 9Ntene oyiku yemet nye kweyat, oyiku tisikap kinko, oyiku yemet nye tilil, oyiku piko cepo Yiyintet ce kicekweyak sukuŋet oporu yisyetap Yiyintet nyepo kakitat. Yiyintet kunye kikurok akwane wule mite menonet kwonyoru lakweyenyi nye cikite. 10Kipuryo kot oyiku akwek ikye om pesyosyek alak pikap Yiyintet ce kweyotin, ntene kunyo oyiku yawut pikyi. Kipuryo kot oŋnket akwek ikye wule yunto tolosyetap Yiyintet, ntene kunyo kwonyoru yawut tolosyenyi. 11Coronutekwani, osomok ani akwek kuyu pic ce toyek oŋnkuwuwen om koroni! Ntene monte cecäm tukuk ce cöme porto, ce mite kwak kuportos oko soponto. 12Möce opurte kopurto nye topon om kwenutap piko co menket Yiyintet. Sukuŋet nka mpo ye kowosontyok akwek kule oyiye miyotyet kuye kukäs cekto yoto yisyonutek ce toponec, oŋnkukasta cek Yiyintet om pesyet nye coni cokumut musankut. 13Aywey akwek kamukeywek cepo ci tokol nyewo om kaynetap Mokoryontet. Aywey mpo Kinko nyewo nye pëlisyi om kamukeywek. 14Aywey mpo poytoyik ce kikoyok neto cokutaŋany piko ce yiye miyotyet oŋnkokaste piko co yiye ce toponec. 15Omnye möce Yiyintet kule akerekte akwek ŋalalet nyepo piko co perper om ŋalek ce toponec ce oyiye. 16Möce kule opur kuyu pic ce tyokotin. Monte ciyisye katyakatet nyo oponte kwek siret nye yene miyotyet, ntene opur kuyu mutworik cepo Yiyintet. 17Aywey piko tokol, acäm piko cikwok co kikoyen. Aywey Yiyintet oŋnkaywey Kinko nyewo 18Möce akwek mutworik aywey mokorenikwok, oŋnkoporci kayweyisyet nyepo manta, nka mpo ye toponec oŋnkutoloyec nto mpo ye wusisyi. 19Omnye ye nkete cito kule opontekey Yiyintet oŋnkumuytoci wuyinwek nka mpo ye kopuryo kot kumisyini kunyoru cicitenyi kupeyokap Yiyintet. 20Omnye monyoru kakastayat ne, ye komuytoci pirisyet nye misyini, roke onyoru omnye kwalel? Ntene ye kwomuytoci toŋoŋutek omnye kwayiy ŋolyo nyepo manta, mosukukonok Yiyintet kupeyok om ŋolyontonoto. 21Kicekurcok akwek ŋolyontonoto. Omnye kitaŋany Yesu Kristo kupo akwek oŋnkupokokwok pelutyet sukuŋet arup akwek neto letut. 22Kipuryo kot kwiy neto miyotyo, oŋnkupuryo ŋolyo mpo akenke nyepo mwiynan nye kicone kutinyi. 23Kipuryo kot kuwec kucupis ye kicecupe. Kipuryo kot kunyer neto ye kitoŋonye, ntene kikokenekey Yiyintet nye ketintet nyepo manta. 24Kristo nkit kunye kikesen miyotyonik kyacek om murtowontet, sukuŋet cepoku acek nye komokyiye miyotyet oŋnkyesopce om ŋalek cepo manta. Kunyo mwayok ceci kuce kisopok akwek. 25Kyokerkeyekey akwek kecir ce kipotyi aret nye pete, kunyo kiceketwok kwarup mesewontet oko ripintet nyepo soponwekwok.

will be added

X\