1 Peter 1

1Cone parwani wule amite ani Petero kiyokintetap Yesu Kristo. Osilwok akwek kweyanikap Yiyintet ce miŋisyi kuyu wuwen ce kiseretyi korosyek cepo Ponto, oko Kalatiya oko Kapontokiya oko Asia oko Pisiniya. 2Kicekweyak akwek kuyu wule moktoy Yiyintet Papa. Kicesatak oyiku piko cetililec kupunte Muyet Nyetilil nyepo Yiyintet, sukuŋet aywey Yesu Kristo oŋnkowunok om korotikyi. Kunyo kutosyikey poypoyet oko kalyet om wule omite akwek. 3Möce cikaste acek Yiyintet Papa kwanitap Mokoryontenyo Yesu Kristo! Omnye kikonec acek soponto nyelel om kokolyoyisyenyi nyewo omnye kiŋet kotutune met Yesu. Konec acek ŋaleca kokenotet nye sopot. 4Kunyo cemite cekonye kule cenyoru kupeyok ce caŋ ce kikonorci Yiyintet pikyi. Kikonorwok akwek kupeyocu om torot wule puryo kununtos nto kuwuryo nto mpo kupotyo. 5Ripok topon swamet nyepo Yiyintet omnye kyocäm Yiyintet, kunyo mosicisopok om pesyet nyepo letut ye poru ŋalek cepo kosopenyi. 6Möce aŋerec om ŋalecoto, nka kot kuroke orirye yawut kuminiŋ om toŋoŋutekwok ce caŋ ce otoŋonyi. 7Poru toŋoŋutecoto kule po manta koyenet nyimwoŋ. Muce saput kuwur kupot, ntene cesyeme cepele mata sukuŋet cekäs kule topon. Kunyo yunyoto mpo koyenet nyimwoŋ nyepo latik kupël Saput, misyini cesyem sukuŋet kutitir, sonyoru akwek kakastayet oko woyinto oko koyweyisyet om pesyet nye ciŋoŋu kutok Yesu Kristo. 8Ocöme akwek neto nka kot kupuryo kot okäs, Oyeni neto nka kot kupuryo kot oköse yawut; oŋerekyini om ŋerekwek ce caŋ koromun. 9Omnye omite onyoru musyaret nyepo koyenemwoŋ, nyoto kukosopotet nyepo mukuleywekwok. 10Kosopet nye yunyitenyi kunyo kicenye workoyik koromun oŋnkuŋor kokotutecutecu mosukukonok akwek Yiyintet. 11Kiŋor Muyet Nyetilil nyepo Kristo nye kimite wule mite workoyik. Toŋoŋutek ce mosukunyor Kristo oko woyinto nye mosukuco om letut. Ntene kisyem cek kule cinket pesyo ne pesyonoto oŋnku mosukuco kulene. 12Kiŋany kuporci Yiyintet workoyik yisyet nye kikwiye cek, kunyo kipuryo kot kupo toponiyet nyimwacek nkit. Yoto kuye kiŋolole cek ŋalek cenöme ŋalecu kwalim akwek yawut kukwane wule mite kiyokik cepo lokoywek ce toponec. Kimwoy cekto ŋalecato om swametap Muyet Nyetilil nye kiciyok om torot. Ŋalecutecu kuce möce mpo malaykanik kule nto cinket. 13Kunyo oripkey oŋomekitu om kasoteywekwok, oŋnkokasekey kupeyok ce mosicekonok akwek pesyet nye ciporu Yesu Kristo. 14Aywey Yiyintet. Monte kupaytak yec kopurto nyimwoŋ nyepo corokyinotet nyo kyoponte ye kitompo kot osowu. 15Möce otililitu om tukuk tokol ce oyiye kuyu wulo tilil Yiyintenyo. 16Mwowu silutekap Yiyintet kule “Misyini otililitu akwek omnye oyiku ani tilil.’’ 17Okure akwek neto kule Papa ye osome Yiyintet, Yiyintet kunye mutyini piko tokol musankut koyoyec wule yunto yisyet nye kikwiy cito. Kunyo misyini opur koret om aret nye oyweyi neto. 18Omnye oŋnket akwek kito nye kikyale sukuŋet cityakenak wule mite soponto nye moponto latik nyo kikonok mpo kukomwoŋ. Kipuryo kot kukiy nye wure kuyu pesya nto Saput. 19Kicityacak kyalenak korotikap Kristo ceponto latik. Kicikoyto neto kuyu lekwap kecir nye moponto tisyet nto mpo simnyontet. 20Kicekwey Yesu kupoyit ŋalecu kutompo kot citany koret, kunyo kucipor om pesyosyecu po letut kupo toponiyet nyimwakwek. 21Kyoyen akwek Yiyintet kupunte wule mite neto. Yiyintet kunye kiŋet neto kotutune met oŋnkukoci woyinto, sonyoru akwek koyenet oko kokenotet om wule mite Yiyintet. 22Kunyo yawut omnye kwopukte akwek simnyontet nyepo mukuleywekwok, oŋnkoywey ŋalek cepo manta, oŋnkocämnkey akwek nkit kupoyit manta, kuroke kwek cömisyet nyimwoŋ kiy nye yiyisyi oŋnkucone mukuleywekwok orit. 23Kuceyiyok aret nyepo oyeny kupunte ŋolyontet nye sopot nye mopoku nyepo Yiyintet. Kunyo oyiku lekokap Papa nye sope okokoy nye puryo kot kume. 24Kuyu wule mwowu silutekap Yiyintet kule: “Kerkey piko tokol suswek, kerkey woyinto nyepo cito taptok cepo samiyita! Yamntos suswek, kulelece taptok. 25Ntene pure ŋolyontetap Mokoryontet kenyis ce mopoku.’’ Ŋolyontonoto ku lokoywek ce toponec co kicemwowok akwek.

will be added

X\