1 John 5

1Lekwetap Yiyintet ci ake tokol nye yene kule Yesu kunye ŋapanet. Nto ci ake tokol nye cöme Papa kucöme mpo lekwenyi. 2Aret nye sicinket kule cecöme acek lekokap Yiyintet kuye kacecäm Yiyintet oŋnkyerup ntarastinekyi. 3Cömisyet nye cëcöme acek Yiyintet kunye poru kule cerupe ntarastinekyi, Puryo kot ku wuyec ntarastinekyi om wule cemite acek. 4Omnye ci ake tokol nye lekwetap Yiyintet kunye kukupël koret. Cimuce acek kot cipël koret om koyenenyo nye ceponte. 5Ŋo nye muce kupël koret? Cito nyoto kunye yene kule Yesu kunye Weritap Yiyintet. 6Yesu kunye cito nye kico, kiconto peko cepo patisanenyi oko korotik cepo met nyenyi. Kipuryo kot kuconto peko nkit pate, ntene kiconto peko oko korotik. Kunyo Poru Muyet Nyetilil kule po manta ŋalecu. 7Mite muncururwanik somoku. 8Coto ku Muyet Nyetilil oko peko oko korotik, kunyo yicintos cutecu ku somok. 9Ye cecäme acek kule manta ŋalek ce mwowu piko, ntene woyec kupëlis ŋalek ce mwowu Yiyintet. Kimwoy Yiyintet ŋalek ce nöme Werinyi. 10Kunyo ponto ci tokol nye cöme Yiyintet ŋalecu om moyenyi. Ntene ci ake tokol nye puryo kot kuyene Yiyintet kunye mwiyn, omnye puryo kot kucäm ŋalek ce kimwoy Yiyintet ce nöme Werinyi. 11Ŋalek cepo Yiyintet cepo manta kucu kule, kikonec acek neto soponto nye mopoku, kunyo mitowune soponto nyoto wule mite Werinyi. 12Ponto soponoto ci ake tokol nye kupoyit Werit oŋnkupuryo kot kuponto soponoto ci ake tokol nye puryo kot kupontokey Werit. 13Osilwok ani ŋalecu akwek piko co cöme kaynetap Werit nyepo Yiyintet sukuŋet oŋnket kule ceponte soponto nye mopoku. 14Cikenekey acek neto, omnye cinket kupoyit manta kule limwec ye kocesom kiy ake tokol kuyu wulo moktoy neto. 15Nteye cinket acek kule limwec okokoy ye kacesom ku yoto ye cinketi mpo yec kule cenyoru kiy ake tokol nye kacesom acek neto. 16Ye kakäs citake tokol kwiye yeyanyi miyotyet nye puryo kot kupo ŋokis, kuroke kusomnci Yiyintet sukuŋet kunyor cicoto soponto. Nöme ŋalecu piko co puryo kot kwiye miyotyet nyepo ŋokis. Mite miyotyet ye sutu met, kunyo puryo kot omwowok ani kule osom Yiyintet om miyotyet nyeyunyo. 17Miyotyo ye kakyiy ŋolyo ake tokol nye miyat, ntene kumite miyotyet nye puryo kot kupo ŋokis. 18Cinket acek kule puryo kot kumite lekwetap Yiyintet nye tosyinikey kwiye miyotyet, omnye ripe Yiyintet neto topon, oŋnkupuryo kot komuce kowurta oyinoto neto nyoto. 19Cinket kule cepoye acek Yiyintet nka kot kupoytoy oyinoto cekwol yitik koret tokol. 20Cinket kule kico Weritap Yiyintet, kunyo kikonec ŋomnonet sukuŋet cinket Yiyintet nyepo manta. Mitowune soponnwek cicacek wule mite Yiyintet nyepo manta oko wule mite Werinyi Yesu Kristo. Nyitenyi kunye Yiyintet nyepo manta, nyitenyi kunye soponto nye mopoku. 21Lekokwani, oripkey akwek topon om wule mite yiyinwek cepo mwiynan!

will be added

X\