1 John 2

1Lekokwani, kosilwok ani ŋalecu sukuŋet mente kot ayiy miyotyo. Ntene ye kotepe kot kwiy citake miyotyo, ceponte Yesu Kristo nye mite kuyetyewec acek om wule mite Papa. 2Yesu Kristo nkit kunye aret nye cikolyenec acek miyotyonikyo, nye puryo kot ku miyotyonik cicacek nkit pate, ntene oko mpo miyotyonik cepo koret tokol. 3Ye kacerup ntarastinekap Yiyintet kuye sukuporkey kule cinket acek neto kupoyit manta. 4Ye kotepe kot kumwoy citake kule, oŋnket Yiyintet, oŋnkurok yec kupuryo kurupe cicoto ntarastinek cepo Yiyintet, kuporkey kule mwiyny cico oŋnkupuryo kot koponto ŋalek cepo manta. 5Ntene ci ake tokol nye rupe ŋolyontet nyepo Yiyintet kunye cito nyo nye kicäm Yiyintet kuwoŋnkyi. 6Ye komwoy citake kule opoye Yiyintet kumisyini kurup cicoto kopurto nye kipo Kristo. 7Coronutekwani, puryo kot osilwok ani ntarastit nyelel, ntene ntarastini kunye po keny nye kyolim akwek kuceke keny. Ntarastit nyepo keny ku lokoywek co kyolim ikye. 8Ntene yec ntarastit nyi osilwok ani kunye lel, nto ŋalek cepo manta ce mite ntarastini kunye ceköse kule mitowune wule mite Kristo oko wule omite akwek. Omnye mite kutile menonet kunyo mite koluwu yawut lakweyet. 9Ye komwoy citake tokol kule oponte lakweyet oŋnkurok yec kusenkere cicoto yeyanyi kutokumite cito nyoto wule mite menonet okoy mpo pantanyi. 10Ci ake tokol nye cöme yeyanyi kunye ponto nyo lakweyet oŋnkupuryo kot kuponto kiy nye muce kusokyi citake kwiy miyotyet. 11Ntene mitowune menonet wule mite ci ake tokol nye senkere yeyanyi, wesetote cicoto menonet orit oŋnkupuryo kot konkete wule weti, omnye kikokor menonet konyek ceci. 12Osilwok ani akwek lekokwani, omnye cikolyoy miyotyonikwok om kaynetap Kristo. 13Osilwok ani akwek mpo Papa, omnye oŋnket akwek neto nye kimite kuceke towunot. Osilwok ani akwek oyiperik omnye kyopël akwek oyinot cekwol yitik! 14Kosilwok ani kwek lekok omnye oŋnket akwek Papa. Kosilwok ani akwek mpo papa, omnye oŋnket akwek neto nye kimite kuceke towunot. Kosilwok ani akwek oyiperik, omnye oponte akwek swamet oŋnkumitowune Yiyintet wule omite akwek, kunyo kyopël akwek oyinot cekwol yitik. 15Monte cecäm koret nto mpo tukuk ce mite koret. Ye kacäm citake koret, kupuryo kot kumitowune cömisyetap Papa wule mite neto nyoto. 16Om kiy ake tokol nyepo koret, kuyu corokyinotet nyepo miyotyet, oko tukuk ce köse piko oŋnkumäc, oko tukuk tokol cepo koroni ce silekey piko, kuce puryo kukwone tukucoto mpo akenke wule mite Papa, ntene kwone pate koret. 17Mite kupote koret oko kiy ake tokol nye corokyini piko. Ntene musukusop okokoy cito nye yiye yisyet nye möce Yiyintet. 18Lekokwani, karik ye ŋete koret! Kicemwowok akwek kule musukuco puniyontet nyepo Kristo; kutok yawut punikap Kristo ce caŋ, kunyo cinketi kule karik ye ŋete koret. 19Kipuryo kot kupo picu luket nyinyacek, nto kipure wule cemite acek, kunyo kipete cek wule cemite acek sukuŋet kuporkey kule puryo kot kupo cek luket nyinyacek. 20Ntene kiŋapenak Kristo Muyet Nyetilil, kunyo oŋnket ŋalek cepo manta. 21Kosilwok ani akwek nye puryo kot ku kule omnye monket akwek ŋalek cepo manta, ntene omnye oŋnket akwek ŋalecato po manta, oŋnkonket mpo kule puryo ŋolyo nyepo mwiynan nye muce kenyis kucone wule mite ŋalek cepo manta. 22Kunyo ŋo nye mwiyn? Cito nyoto kunyo toye kumwowu kule Yesu kunye puryo kot ku Kristo. Cito nyoto kunye puniyontet nyepo Kristo. Toye cico Papa oko Werit. 23Omnye ci ake tokol nye katay Werit kukatay mpo cicoto Papa. Nto ci ake tokol nye kacäm Werit, kupontokey cicoto mpo oko Papa. 24Kunyo orip topon om mukuleywekwok lokoywek co kyolim akwek keny. Ye korip akwek ŋalek co kyolim kuceke keny, kuye mosopurte koyomotet oko Werit oko Papa. 25Kito nye kikurtowec acek Kristo nkit ku soponto nye mopoku. 26Kosilwok ani ŋalecu ce nöme piko co syem kule cemasak akwek. 27Ntene akwek nkit kuce kiŋapenak Kristo Muyet Nyetilil. Ye tokopurune Muyet Nyetilil wule omite akwek, kupuryo kot omöce akwek citake nye kenetak. Omnye nete Muyet Nyetilil ŋolyo ake tokol, oŋnku ŋolyo nyepo manta ŋolyo ake tokol nye nete neto nye puryo mwiynan. Kunyo arup konetisyet nyepo Muyet Nyetilil oŋnkopurune wule mite Kristo. 28Kunyo lekokwani, opurune wule mite Kristo cekwilokisye om pesyet nye cone neto nye puryo kot ceponte kalilan nye cewunyekey. 29Oŋnket akwek kule po manta Kristo, kunyo misyini oŋnket kule ci tokol nye yiye ŋalek ce toponec kunye lekwetap Yiyintet cito nyoto.

will be added

X\