1 Corinthians 9

1Puryo kot oyiku ani ne cito nye tyakat? Puryo kot oyiku kiyokintet? Tompo kot akäs ani ne Mokoryontenyo Yesu? Puryo kot oyiku akwek ne pikap Mokoryontet om yisyet nye kyayiy ani? 2Nka kot puryo kot kucöme piko alake kule ayiku ani kiyokintet, ntene ocöme akwek, omnye akwek pelutyet nye poru kule ayiku ani kiyokintet nyepo Mokoryontet. 3Ye karenya piko, ŋalek ce omwowu ye oyetekey kucu kule. 4Puryo kot ceponte acek ne kamukeywek kyam omik oŋnkyeyesye kupo yisyet nye kiciy? 5Puryo kot ceponte kamukeywek cepetekey korko kuyu piko ce tupco om Mokoryontet. Kuyu wulo kyiytoy kiyokik alake oko mpo Kefa oko mpo yeyanyitap Mokoryontet. 6Nto acek nkit so oko Parnapa ce yiyisyi sukuŋet cenyoru omik ce kyome? 7Kikäs ŋo kenyis sikorin nye pcicinikey musyaret nkit? Nto kikäs ŋo kopotin nye puryo kot kwome omik cepo mparenyi? Nto mesewontet oŋnkono nye puryo kot kulwe ceko cepo kecirekyi? 8Omwowu ani so ŋalecu om kamukeywek cepo cito? Puryo kot kumwowu ntarastinek kuyunyoto? 9Omnye kicesil om ntarastinekap Moses kule, “Mente arat yeyto kutit ye mite kuwore nkanuk.’’ Kunyo sote pa Yiyintet yeyto? 10Kimwoy Yiyintet ŋalecato kunämec acek. Kicesil ŋalecutecu kunämec kupoyit manta! Cito nye potisyi mparet oko cito nye wore omik, kuce yiyisyi kukene kule cepcicine omik. 11Kicekol acek om wule omite akwek kupuswek cepo Yiyintet. Kunyo ŋolyo pa nyepo kakitat ye kokenyoru acek latik cepo kisisyet om wule omite akwek. 12Nteye ponto piko alake kamukeywek kunyor latik om wule omite akwek, kupuryo kot ceponte acek ne kamukeywek ce pëlisyi? Ntene tompo kot kyiyisye acek kamukeyweca, kunyo kucemuytoci wuyinwek tokol sukuŋet mente kot cesutyi konokut aret nyepo lokoywek ce toponec cepo Kristo. 13Oŋnket akwek kupoyit manta kule, nyortoy piko co yiyisyi kotap Yiyintet omik kukwane kotap Yiyintet, oŋnkupicicintos omikap korosek piko co koytoy korosek om otepto nye pele korosek. 14Kunyo kimwoy Mokoryontet kuyunyoto kule roke kunyoru musyaret piko co mwoytoy lokoywek ce toponec om yisyet nye yiye. 15Ntene tompo kot oyiyisye ani kamukeyweco mpo akenke. Kunyo puryo mpo kot osile yawut parwani kule sukuŋet kyiwo yunyoto. Omnye puryo ci nye muce kuwec silotet nyimwani kwek ŋalek cepo püc pate, roke amey ani kusir ye kotoyostoy kukerekta citake ye mosilkey. 16Puryo kot oponte ani kamukeywek osilkey pate omnye omwoytoy lokoywek ce toponec, ntene kicemwowo kule yiy kuyunyoto. Kunyo ŋolyo nye miyat koromun ye puryo kot amwayte lokoywek ce toponec! 17Nto kyayiy yisyet omnye ocöme nkit nto kwomoce kule cekono musyaret, ntene oyiye kuyu yisyo nye kikono Yiyintet. 18Kunyo onyoru musyara ne? Onyoru pate musyaret nye omwoytoy lokoywek ce toponec nye puryo kot amöce kule cekono kiy, nye puryo mpo kot oyiyisye kwapi kamukeywek om yisyemwani nyepo lokoywek ce toponec. 19Oyiku ani tyakat nye puryo kot oyiku mutworin nyepo citake tokol, ntene aweckey oyiku mutworin nyepo ci tokol sukuŋet awec ce caŋ kuyu wule mukoktos. 20Ye amite oyiyisyi om wule mite Yutayek, apuri kuyu Yutoyin sukuŋet awec cekto, nka kot kupuryo kot omite ŋonyutap ntarastinekap Moses, ntene opuri kuyu nye poyto ye amite oyiyisyi oko piko cepoytoy ntarastinek sukuŋet awec cekto. 21Kuyunyoto ye opontekey lamek, opuri kuyu lamek, ce moponto ntarastinek sukuŋet awec lamek. Puryo kot kuporu coto kule moyweyi ani ntarastinek omnye poyto ntarastinekap Kristo. 22Apuri ani kuyunye moponte koyenet nyepo swamet ye pontekey oko piko ce moponto koyenet nyepo swamet sukuŋet awec cekto. Kyoyiku kiy tokol om wulo mite tokol, sukuŋet onyoru piko ce mosoru. 23Oyiye ŋalecu tokol kupo toponiyetap lokoywek ce toponec sukuŋet onyoru kupeyokyi. 24Oŋnket akwek kupoyit manta kule konye mweyek piko tokol ce mwenekey ntene pëlisyi akenke nye nyoru kokututyet. Kunyo okonyi akwek mweyek sukuŋet opëlisye onyoru kokotutyet. 25Ripekey koromun ci ake tokol nye mite wule cinete piko co konye mweyek. Yiye kuyunyoto kule cenyoru kokotutyet nyepo nkwatyet nyepo taptet nye poku lakwar. Ntene kyiye acek kule cenyoru kokotutyet nye mopoku. 26Kunyo akonyi ani otyikini kule awaŋnte topon. Puryo kot otuluci ani kuyu ci nye tuluce tapan. 27Otoŋonyi porto nyimwani oŋnkorip sukuŋet mente kot cetaya om letut ye komwoci piko alak lokoywek.

will be added

X\