1 Corinthians 8

1Kunyo, yawut ŋolyontet nye nöme omik ce kocesoci Kerkeyik. Cinket kuyu wulo cemwoytoy kule, “Ceponte acek tokol ŋomnonet.’’ Ntene ŋomnonet nyoto kunye sute cito kusutkey parak om silotet, ntene teksi cömisyet. 2Ye sote cito kule oŋnketi kito ake, kunye menkete kiyoto kupoyit manta kuyu wule misyini. 3Ntene cito nye cöme Yiyintet kunye nkete Yiyintet mpene cicoto. 4Kunyo ŋolyontet nye nöme ye kakyam omik ce kocesoci karkeyik, cinket acek kule kerkeyinto kunye kiy pate nye puryo kot kumite koret mpo kisic. Cinket kule mite Yiyintet akenke pate nkit. 5Omnye nka kot kumite co cekure kule yiyik ce caŋ oko mokorenik ce caŋ. 6Nto om acek kumite Yiyintet nye Papa akenke nkit pate, nye kitoŋintet nyepo tukuk tokol, oŋnku nye cesope acek om neto, oŋnkumite Mokoryontet akenke Yesu Kristo nye kicitany tukuk tokol kupunte neto, oŋnku nye cesoptosi acek om wule mitowune neto. 7Ntene puryo kuponto ci tokol ŋomnoni. Kikonketune piko alake kerkeyik kuloyit. Kunyo okoy yawut ye kam omik ce kocesoci kerkeyik kusot kule kakyam ce punyo kot kupo Yiyintet, ntene omnye moponto kasoteywek cikwa swamet kusot kule kakwiy miyotyet. 8Omik kuce puryo kot komuce kusat kunyol soponwekyo om wule mite Yiyintet, puryo kot kupotwec acek kiy ye mnakyam, oŋnkupuryo kot cenyoru kutos kiy ye kakyam. 9Kunyo oripkey, monte kyiy kuyunyoto omnye muce piko alak ce puryo kot kuponto swamet kosuci miyotyet. 10Omnye ye kakäsiŋ cito nye puryo kot kuponto swamet mite nyi nyo yiku ŋom yomisyi om kotap kerkeyik kupuryo kotitire cicoto ŋalecato kwam omik ce kocesoci kerkeyik. 11Kunyo mokwaran cicitenyi moponto swamet, omnye kesac ŋomnonet nyeŋunyi. Yeya nyitenyi kunyo kimecini Yesu Kristo neto. 12Kunyo om aret nyeyunyitenyi, keyiy nyi miyotyet om wule mite Kristo oŋnkiyiy miyotyet om wule mite yeyaŋuŋ oŋnkipar kasoteywek cikwa co moponto swamet. 13Kunyo, ye muce kusutyi omik kosuto yeyamwani komo oyome ani yec penynto mpo kisic, sukuŋet mente kot osutyi kosuto yeyamwani.

will be added

X\