1 Corinthians 6

1Ye ponto citake om akwek wokutyet oko yeya ake, kuroke kulene kusut neto musankut kuwo wule mite piko ce menket Yiyintet, ye kotomwocini kusat ŋaleca pikap Yiyintet. 2Puryo kot oŋnket akwek kule pikap Yiyintet kuce mutyini musankut koret? Kunyo ye akwek kuce mosomutyi musankut koret, kupuryo kot omuci mpo kot amut musankut cepo ŋalek ce tukusic? 3Puryo kot oŋnket kule acek kuce mosicemutyi malaykanik musankut? Mosukupurunenec kulene mocemut musankut nyepo soponto nyitenyi? 4Kunyo nteye kakwa ŋalek ce yucoto mososut ra ŋaleca kupa wule mite piko co menkete wule yunto koyenet nyepo pikap Yiyintet? 5Ŋolyo nyo nyepo kalilan koromun om wule omite! Puryo kot kumite cito akenke wule omite akwek nye ŋom nye muce kumut musankunek cepo mpo yeya? 6Ntene kwere yeya ake yeya ake wokuwosontyi om taytap piko co menket Yiyintet. 7Kunyo poru kule kwosute koromun omnye owosontyinikey nkit. Omne macäm akwek ye kalel citake kwiwok miyotyet? Omne mocäm akwek ye kanyapanak piko alake? 8Kunyo yec oyicinikey akwek nkit miyotyonik, onyapankey akwek nkit oŋnkocorokyikey nkit mpo yeya! 9Oŋnket akwek kupoyit manta kule puryo komuce kot kunyor ci nye miyat poytoyisyetap Yiyintet. Monte ciperperkey omnye puryo kot kunyoru poytoyisyetap Yiyintet piko ce, syepisyi koruk, nto ce soye kerkeyik, nto ce sakwoyot, nto co cesyepekey moronik nkit, 10nto ce corsyi, nto pokitisyek, nto ceŋomsi, nto ce ponisyi, nto ce moroŋis, nto ce corik. 11Kyokerkeykey akwek picoto, ntene kiciwunok om miyotyonik oŋnkyikoytok opoyitu Yiyintet. Kicesatak onyolu om wule mite Yiyintet kupunte Mokoryontenyo Yesu Kristo om Muyet Nyetilil nyepo Yiyintenyo. 12Mosukumwoy citake kule, “Ce cömwo ani ayiy kiy ake tokol.’’ Yunyoto, ntene puryo kot kutoponec tukuk tokol. Omuci omwowu kule, “Ce cömwo ani ayiy kiy ake tokol, ntene puryo kot ocöme kot kusuto kito ake oyiku mutworintenyi.’’ 13Mosukumwoy citake kule, “Po omik moyet, oŋnkupo moyet omik.’’ Yunyoto manta, ntene mosukunum Yiyintet coto tukway. Porto nyepo cito kunye puryo kot kupo sakwayanat, ntene po Mokoryontet nto Mokoryontet kunye poye porto. 14Kiŋet Yiyintet Mokoryontet Yesu kotutune met oŋnku neto kunye mosukuŋetec citutune met om swamenyi. 15Oŋnket akwek kule porwonik cikwok kuce kereryanik cepo portap Kristo. Omuci ra anäm kereryantet nyepo portap Kristo oŋnkayiy kwek portap korko ce moroniyo? Memukoktos! 16Puryo kot oŋnket akwek kule ye kokuyomo cito porto nyenyi oko korko nye cemoroniyo kukokwek akenke oko neto? Poru silutekap Yiyintet kutok topon kule, “Mosukwek picoto oyenku porto akenke.’’ 17Ntene ye keyomokey cito oko Mokoryontet kokwek Muyet nyenyi akenke oko neto. 18Asanekey sakwayanat. Puryo kot kowurtoy cito porto ye kayiy miyotyonik alak tokol, ntene wurtoy cito porto nyenyi nkit ye kayiy sakwayanatet. 19Puryo kot oŋnket akwek kule porto nyemwoŋ kunye kotap Yiyintet nye minye Muyet Nyetilil? Puryo kot opoyekey akwek nkit, ntene opoye Yiyintet. 20Kikwalenak akwek neto peyit nyewo, kunyo oyiyisye porwonikwok kukasta woyintap Yiyintet.

will be added

X\