1 Corinthians 5

1Kunyo kucemwoy kupoyit manta kule, oponte akwek sakwayanatet nye miyat koromun nye puryo mpo kot cenyortoy wule mite lamek co menket Yiyintet. Kucemwowo kule purtoykey cito korketap kwan! 2Kunyo omuci akwek osilkey kulene? Roke onerekisye koromun, oŋnkokwet cito nye kweye ŋaleca kuŋete wule amite akwek! 3Ntene nka kot amite wule low om porto om wule omite akwek, ntene opontekey oko akwek om kasoteywekwani om kaynetap Mokoryontet. kwomutyi ani keny musankut cito nye kikwiy ŋolyontoni miyat. 4Kunyo ye koyomekey akwek wanak, oŋnkyepontekey oko akwek om kasoteywekwani om swametap Mokoryontenyo Yesu Kristo nye mitowune wule cemite acek. 5Yoto kuye roke okoyte portap cicoto kuwo wule mite Setanit kyaranta, sukuŋet cesor soponto nyenyi om pesyetap Mokoryontet. 6Puryo kot kuroke osilkey akwek! Oŋnketi ŋolyontoni mwowu kule, “Kocini mumarek ce tukusic kukut pusyek tokol.’’ 7Misyini onumu mumaryantani nye ponto miyotyet nyepo keny sukuŋet otililitu onyolu akwek topon, sukuŋet akerkeyitu oko pusyek ce puryo kot cetase mumarek, kuyu wulo oŋnketi ani kule oyiye akwek kuyunyoto. Kunyo kukwitita keny sakwenyo nyepo Keytayet, omnye kicekon Kristo nye Keciryetap korosyontet nyepo sakwetap Keytayet! 8Möce kyam kunyo sakwenyo nye puryo kot ku mukatyantet nyepo keny nyepo miyotyet oko sakwayanatet, ntene om mukatyantet nye moponto mumaryantet, nyoto ku mukatyantet nyepo tililinto oko manta. 9Om parwet nyo kyosilwok ani, kyomwowok kule monte ciyomekey oko piko to sakwoyonot. 10Ntene kipuryo omwowu kule piko ce menket Yiyintet, co sakwoyonot nto co moroŋis nto ce yirye ntarastinek nto co soye kerkeyik! Omnye ye kotay akwek cekto kuporkey kule kaŋete koret sukuŋet komonyortosi oko cekto. 11Ŋolyontet nye kyomwowu kunyi kule, puryo kot kurok kot oyomekey akwek oko cito nye kurekey kule oyiku yeya oŋnkurok yec kwiye sakwayanat nto moroŋya nto nye soye kerkeyik nto nye perpersyi nto nye pokite nto nye corsyi. Monte mpo cipur oŋnkoyomisyi oko cito nye yunyo! 12- 13Ntene puryo kot ku yisyemwani omutyi musanku piko cepo saŋ. Yiyintet kunye mosukumutyi cekto musankut. Ntene puryo ra kot kurok omutyi akwek musankut piko cepo lukemwoŋ? Kuyu wulo mwowu silutekap Yiyintet kule, “Onumune kucone lukemwoŋ cito nye miyat.’’

will be added

X\