1 Corinthians 4

1Roke oŋnketec kule ciku acek mutworikap Kristo ce kicikoci kurip ŋalekap Yiyintet cepo manta ce wuŋotin. 2Kito akenke nye cemokyini mutworintet nyoto ku kule kikokenekey Mokoryontet. 3Kunyo asute kwek ŋolyo nye miniŋ ye komutwo ani akwek musankut, nto mpo ye komutwo piko musankut. Puryo mpo kot omutyinikey ani nkit musanku. 4Puryo kot oŋnketi kule oyiku lelat, ntene puryo kuporu kule moponte lelis, Mokoryontet kunye mutwo ani musankut. 5Kunyo puryo kuroke omut musanku kutompo kot kupunto pesyet nye kweyat. Möce kukany musankut okoy kuco Mokoryontet. Mosukuco oŋnkuluci lakweyet tukuk cepo menonet oŋnkupor ŋalek ce wuŋotin ce mite mukuleywekap piko orit. Yoto kuye kunyor ci tokol kakastayet ye yeme nye cone wule mite Yiyintet. 6Mpo yeya, sukuŋet akalyak; koyoyeke ŋalecu tokol Apolo oko anito. Koyiyisye kwek koporunot sukuŋet oŋnket akwek kule mwowu ne ŋolyontoni, “Orip monte cekeyte silutek.’’ Puryo kuroke ci ake tokol om akwek kusil citake oŋnkunyil ake. 7Ŋo nye kikoniŋ nyi yiku nyewo kupël piko alak? Kipuryo kot kukoniŋ Yiyintet tukuk tokol ce ponte? Nteye kinyoru, omne sesilkey kuyunye kipuryo kot ku kokotut? 8Oponte akwek yawut tukuk tokol ce omöce! Kwomokoren keny! Kwoyeku kinkonik nka kot puryo kot ciku acek! Kunyo amöce ani kule ntoyiku akwek kinkonik sukuŋet ciku mpo acek kinkonik oko akwek. 9Omnye osoti ani kule, kukupartec Yiyintet acek kiyokik ciku cepo letutap piko tokol, kuyu pic ce kocimutyi musankut cepakäc, om taytap koret oko malaykanik oko piko. 10Ciku acek perper kupo kaynetap Kristo, ntene oyiku akwek ŋomec om Kristo! Puryo kot ceponte acek swamet, ntene oponte akwek swamet! Cenyilec acek, ntene ciyweyok akwek! 11Ce ponte acek rupet oko melelya okoy mpo yawut. Kicilac sorokotok, cepirec, cimpokoti om koret tokol. 12Kyiyisyi om swamet sukuŋet cikalyekey. Ye kocecupec, cesomnci acek cekto kupeyok. Ye kacitaŋanyec, yoto cemuytoci. 13Ye kacecupec cewekyi om ŋalek cepo tolosyet. Kicekerkeyitu acek oko tutwek cepo koret. Kiciku kwontun nyepo koret okoy kupunto pantanyi. 14Kosilwok ani kuyunyitenyi, ntene nye puryo kot omöce kule sukuŋet asornenok. Kayiy kuyinyi saŋet anetak kuyu lekokwani ce ocöme koromun. 15Omnye nka mpo ye oponte akwek konetik kantoyik pokolwokik ce caŋ om soponwekwok om wule mite Kristo, ntene oponte Papa akenke pate. Omnye kyoyiku ani papamwoŋ om soponto nye oponte akwek om Kristo, omnye kyosutwok lokoywek ce toponec. 16Kunyo kosomok kule orup wule ayunte ani. 17Kunyo koyoku Timosewo kuco wule omite akwek. Neto kunye werimwani cämanet nye cikenekey om Mokoryontet. Mosukusutwok neto akwek arosyek cikwani om Kristo ce oneti pikap Yiyintet om wulyo tokol. 18Kusilkey alake om akwek, kusote kule puryo kot aconi ani orutocok akwek. 19Kunyo ye kacäm Mokoryontet mosaco lakwar saŋet akäs ani nkit nye puryo kot ku ŋalek ce ŋolole pate, ntene akäs mpo kito nye mokwiy piko co silekay. 20Omnye Puryo kot ku ŋalek pate poytoyisyetap Yiyintet, ntene swamet. 21Oŋnkono nye okweye akwek? Maconte Korokto nto maconte mukuleyto nyepo cömisyet oko tolosyet?

will be added

X\