1 Corinthians 3

1Kunyo mpo yeya, kipuryo kot oŋololwok ani kuyu piko ce ponto Muyet Nyetilil nyoto, ntene kyoŋololwok kuyu piko cepo koroni, ce lekoy ce minkec om koyenet om wule mite Kristo. 2Kyapayenak ani ceko ntene nye puryo kot ku omik ce wuyec, omnye kitompo kot ayem akwek, kunyo nka mpo yawut tompo kot ayem. 3Omnye topuri kuyu piko cepo koroni. Ye tokumite corokyinotet om kwenumwakwek, oŋnkowokutosi akwek kwakwek nkit kupuryo kot kuporu coto kule oyiku piko cepo koroni cepurtoy kopurto nyepo koret? 4Ye mwowu akenke om akwek kule, “Apoye ani Paulo’’ Kumwoy ake kule: “Apoye ani Apolo’’ Kupuryo ne kot oyiyisyi akwek kuyu piko cepo koret? 5Ntene Apolo ku ŋo? Nto Paulo ku ŋo? Ciku acek pate mutworikap Yiyintet ce kintowok sukuŋet oyen. Yiye ci ake tokol om acek yisyet nye kikoci Yiyintet. 6Ani kunye kyakole kupuswontet. Apolo kunye kipise peko kupuswontet. 7Ntene Yiyintet nye kikoci kupit. Kunyo puryo kot ku nyewo koromun cito nyo kole, nto mpo nyo pise peko. Yiyintet nyewo omnye neto kunye kocini kupit. 8Kerkey kwoyecin cito nyo kole oko nyo pisisyi, ntene mosukukoci Yiyintet ci ake tokol om acek kuyu wule yunto yisyet nyo kikwiy. 9Omnye ciku acek piko ce kyicintosi om yisyet nyepo Yiyintet oyiku akwek mparenikap Yiyintet oŋnkoyiku koto nyenyi. 10Kuyu wule yunto kokotutyet nye kikono ani, kunyo kyacec yisyet nyepo tekset kuyu cito nye ŋom, kunyo mite citake kutece kutosyi, ntene misyini kurip ci ake tokol wule tektoy. 11Omnye puryo komuce citake kucec yisyet ake kusir yisyet akenke nyepo manta nyo kicece, nyoto ku Yesu Kristo. 12Mosukutec piko alake koto kwiyisye Saput nto karin nyelel, nto rwontok ce piciyec, kwiyisye alak ketik nto suswek nto solik. 13Kunyo mosicekäs toponiyet nyepo yisyet nyepo ci tokol om pesyet nye cone Kristo. Omnye pesyet nyoto kunye mosukuŋoŋ yisyo nyepo ci tokol, mosukusyem mata kupor wule yunto toponiyet nye ponto. 14Ye kemukta mata yisyet nye kikwiy cito, mosukukoci cicoto kokotutyet. 15Ntene ye kalay kupok yisyet nye kikwiy cito mosukupot yisyonoto, ntene oŋnkyisop neto kuyu nye kacilil kupunte mata. 16Oŋnket akwek kupoyit manta kule, oyiku akwek kotap Yiyintet, kunyo minye Muyet Nyetilil mukuleywekwok orit! 17Ye karanta kowurta citake kotap Yiyintet, mosukwaranta Yiyintet cicoto, omnye tilil kotap Yiyintet. Kunyo oyiku akwek kotap Yiyintet. 18Puryo kot kuroke kuperperkey citake nkit, ye sote citake om akwek kule oyiku ŋom, kuyu wule yunto kopurto nyepo koret, kuroke kuweckey kuperperit sukuŋet kuŋomit kupoyit manta. 19Omnye kiy ake tokol nye sute koret kule po ŋomnon, kunye perperyo pate nyoto om taytap Yiyintet. Kuyu wulo mwowu silutekap Yiyintet kule, “Tëce Yiyintet piko ce ŋomec om ŋomnonemwa.’’ 20Kumwowu yec silutekap Yiyintet alak kule: “Nkete Yiyintet kule puryo kot kuponto latik kasoteywek cepo piko ce ŋomec.’’ 21Kunyo puryo ci nye misyini kusilkey om tukuk ce muce kwiy piko. Ntene cikwakwek tukuk tokol kupoyit manta. 22Nto mpo Paulo nto Apolo nto Kefa, nto koret, nto soponto, nto met, nto pesyosyecu, nto pesyosyek co kwoni, kuce cikwakwek tokol. 23Opoye akwek Kristo, nto Kristo kunye po neto Yiyintet.

will be added

X\